2008 оны сонгуулийн дараах үймээн буюу "Долдугаар сарын нэгэн"-нд гарсан үймээнээр таван хүн амь үрэгдсэн. Уг хэрэгтэй холбоотой чухал баримтууд болох  цагдаагийн албан хаагчийн тэмдэглэлийн дэвтэр, сумны хонгио зэргийг  УИХ-ын гишүүн Х.Тэмүүжин олон нийтэд ил болгосон нь нийгэмд дуулиан тарьсан төдийгүй нойрмог улстөрийг сэргээсэн юм. Гэтэл эл мэдээллийг няцааж “Цагдаагийн ар гэрийн холбоо” ТББ-ын  тэргүүн  Л.Алтангэрэл сэтгүүлчдэд мэдээлэл хийж "2008 оны долдугаар сарын нэгний үймээний үеэр цагдаагийн ажилтнуудад удирдлагууд нь галт зэвсэг тарааж өгөөгүй. Үүнийг ч өөрийн биеэр 100 хувь нотлоно" гэсэн. Мөн "УИХ-ын гишүүн Х.Тэмүүжин сонгуулийн сурталчилгаа болгож  хуурамч байж болох тэмдэглэлийн дэвтрийг гаргаж  олон нийтэд үзүүлсэн нь ард түмнийг төөрөгдүүлж байна" гэсэн нь олон хүнд эргэлзээ төрүүлсэн юм. Тийм ч учраас Х.Тэмүүжин гишүүний гарт орсон "Хар дэвтэр"-т нэр дурьдагдсан  цагдаагийн ажилтнууд гишүүнд хандан ил захидал илгээсэн билээ. Гэтэл “Долоодугаар сарын 1-ний” гэх тодотголтой хэргийг Сүхбаатар дүүргийн шүүхэд шилжүүлсэнтэй холбоотойгоор Эргүүл хамгаалалтын газарт ажиллаж байсан офицер, ахлагч нар УИХ-ын гишүүн Х.Тэмүүжинд дахин ил захидал илгээжээ. Энэ ил захидал нь мөн л УИХ-ын гишүүн Х.Тэмүүжин мэдээлэлтэй холбоотой юм. Тодруулан хэлбэл, Эргүүл хамгаалалтын газрын нэр бүхий алба хаагчид энэ мэдэгдлийг эсэргүүцсэн ил захидал илгээсэн байна. Эргүүл хамгаалалтын газарт ажиллаж байсан офицер, ахлагч нарын ил захидалд “Бодит байдал дээр ийм зүйл болоогүй. Олон нийтийг хамарсан эмх замбараагүй байдлын дараа буюу 2008 оны долоодугаар сарын 2-ны 03.00 цагийн үед УКТЭ-ийн ойролцоо хүн нас барсан тухай мэдээлэл цагдаагийн байгууллагад ирсний дагуу Сүхбаатар дүүргийн Цагдаагийн хэлтсийн жижүүрийн бүрэлдэхүүн, шинжээч, прокурор, хөндлөнгийн гэрчийн хамт үзлэг хийж, хуульд заасны дагуу бэхжүүлж авсан. Энэ байдал хэзээ ч давтагдахгүй. Бэхжүүлсэн баримт сэлтийг өөрчлөх, нэмэх хасах боломж байхгүй. Ийм байхад хэд хоногийн дараа хэргийн газраас хонгио түүлгэж сургуулийн сумныхыг тараасан гэдэг нь байж болохгүй явдал. Бид ийм зүйл огт хийгээгүй. Энэ бол гүжирдлэг. УЕП-ын дэргэдэх Мөрдөн байцаах албанаас 2008 оны долоодугаар сард хэргийг шалгаж эхэлсэн үед шинжээч томилж, тус газрын дансанд бүртгэлтэй бүх бууг хураан авч, буудлага хийж, хонгио, сумны хошууны загварыг авч, буу нэг бүрийг нарийвчлан шалгасан. Нэгэнт шинжилгээ хийсэн хонгио, хошууны загварыг авсны дараа буюу 2008 оны наймдугаар сарын 22-нд бид буудлага үйлдэж, цохилуурын өөрчлөх боломжгүйг та бодож үзнэ үү. Бууны цохилуурыг авч солих нь жирийн цагдаагийн хийдэг ажил биш” гэсэн байна. Ийнхүү эсэргүүцлийн ил  захидалд дарагдаж буй УИХ-ын гишүүн Х.Тэмүүжин хариу мэдээлэл хийгээгүй. Тиймээс Х.Тэмүүжин гишүүний "тэсрэлт" ил захидалд дарагдаж байгаа бололтой.