УИХ-ын гишүүн Ч.Лодойсамбуу Засгийн газрыг огцруулах үндэслэлээ танилцуулаад долоо хоног өнгөрч буй. Үндсэн хуулиар УИХ-ын гишүүдийн дөрөвний нэг нь буюу 32 гишүүн Ч.Лодойсамбуугийн саналыг дэмжиж гарын үсэг зурсан тохиолдолд УИХ-д өргөн барих эрх зүйн үндэс бүрдэнэ. Харин одоогоор АН-ын хоёр гишүүн л Засгийн газрыг огцруулах албан бичигт гарын үсэг зурсан. АН-аас хамтарсан Засгийн газарт зургаан гишүүн ажиллаж буйгаас намын дарга Л.Гантөмөр Эдийн засаг хөгжлийн сайдаар ажиллаж буй. Л.Гантөмөр бол Засгийн газрын гишүүн гэдгээрээ тангараг өргөж үүрэг хүлээсэн. Кабинетын зарчмаар Засгийн газрын бодлогыг дагаж ажиллах учиртай. Тиймдээ ч Засгийн газрын эсрэг аливаа юм ярьж болохгүй гэсэн үг.  Харин Ч.Лодойсамбуу УИХ-ын гишүүний бүрэн эрхийнхээ хүрээнд өөрийн байр сууриа илэрхийлж, Засгийн газрыг огцруулахыг санаачлах, дэмжих ч эрхтэй. Эрхээ эдэлж буй гишүүнд хариуцлага тооцно гэдэг ардчилсан улсад байж болохгүй дарангуйлал гэж үзэх хүмүүс цөөнгүй. Гэтэл АН-ын дүрэм зөрчиж, намынхаа эсрэг дуугарч буй гишүүдэд хариуцлага хүлээлгэнэ, 2028 онд АН-аас нэр дэвших эрх олгохгүй гэж Л.Гантөмөр хатуу байр суурь илэрхийллээ. АН-ын дүрэмд УИХ-д энэ намаас дэвшиж сонгогдсон бол намын бодлого, зорилтыг хэрэгжүүлэх үүрэгтэй гэж тэрээр санууллаа. 

АН-ын гишүүд хамтарсан Засгийн газрыг огцруулахаар төрийн ордонд гүйлдэх нь Л.Гантөмөрт таалагдахгүй байгаа ч тэрээр намын хурлаа хийж, үгэнд нь орохгүй яваа гишүүддээ хариуцлага хүлээлгэхээ тэгж их яараагүй бололтой.