Гэр бүлийн зургаан хүн нэг дор угаартан нас барж, цэргийн алба хашиж байсан 18 настай хүү өнчирч үлдсэн явдал Засгийн газрыг огцруулах хэмжээнд хүргэв. Маргааш /2025.02.11/ төв талбайд Л.Оюун-Эрдэнийн Засгийн газрыг огцруулахыг шаардсан жагсаал болно. Түрүүчийн долоо хоногт УИХ-ын гишүүн Ч.Лодойсамбуу Засгийн газрыг огцруулах албан бичиг өргөн барихаа мэдэгдсэн. Гэхдээ энэ нь багадаа 32 гишүүний гарын үсгээр хүчин төгөлдөр болж, Их хурлын босгыг давах Үндсэн хуулийн зохицуулалттай. Л.Оюун-Эрдэнийг огцруулахыг дэмжсэн гишүүд төрийн ордонд хуруу дарам байна. Ч.Лодойсамбуугийн байр суурийг их хурлын зарим гишүүд улс төржилт хэмээж, гарын үсгээ зурахгүй гэдгээ ил, далд илэрхийлж буй. АН-ын дарга Л.Гантөмөр ч Засгийн газрыг огцруулахыг дэмжиж гарын үсгээ зурсан гишүүдийг буруутгаж буй. Иргэд Л.Оюун-Эрдэнийг огцруулчихвал асуудал шийдэгдэх мэтээр дүгнэж, нийгмийн сүлжээгээр Засгийн газрыг огцруулахыг шаардаж буй сэтгэгдэл тасрахгүй байна. Манай редакцийн зүгээс Shuud.mn сайтынхаа фэйсбүүк пэйж хуудсаар дамжуулан ''Засгийн газрыг огцруулахыг дэмжиж байгаа эсэх''-д өнгөрөгч амралтын хоёр өдөр иргэдийн саналыг авч ажиллав. Уг цахим санал асуулгад хоёр өдрийн турш нэг мянга гаруй иргэн оролцжээ. Тэдгээрээс 770 гаруй иргэн Л.Оюун-Эрдэнийг огцруулахыг шаардсан бол 200 гаруй нь огцруулах хэрэггүй гэж үзжээ. Харин 600 орчим сэтгэгдэл ирүүлсэн нь харилцан адилгүй байлаа. 

Нэгэн цагт ''Шударга тав'' хэмээх лоозогнолыг тэргүүлж, Ц.Цэдэнжавын ''Чиний төлөө үхье'' шүлгээр уянгалж явсан Ерөнхий сайд Л.Оюун-Эрдэнэ Засгийн газраа унагах эсэх амаргүй цаг үетэйгээ нүүр тулж буй.