‘’Эрх чөлөөний эвсэл’’ намаас өнөөдөр /2025.02.11/ төв талбайд Засгийн газрыг огцруулах жагсаал зохион байгууллаа. Гэтэл жагсаал эхэлсэн даруйдаа шаардлага нь өөрчлөгдөж Ц.Элбэгдорж, Ч.Сайханбилэг нарыг гадаадаас авчирч, хариуцлага тооцуулах жагсаал болж хувирав. Өөрөөр хэлбэл ‘’No Ц.Элбэгдорж, No Ч.Сайханбилэг’’ жагсаал ‘’Эрх чөлөөний эвсэл’’ намын жагсаалыг булаав.

Нөгөө талаас Засгийн газрыг эсэргүүцсэн жагсаалын хүчийг сулруулах үүднээс зохион байгуулалттайгаар шаардлагыг өөр зүг чиглүүлсэн ч байж мэднэ.

Уг нь Засгийн газрыг огцруулах жагсаалаар Засгийн газарт хариуцлага тооцох, утааны асуудлыг шийдэх гэх мэт байсан юм. Гэвч жагсаалд оролцсон иргэд Засгийн газрыг өмөөрсөн байдалтай, Засгийн газрыг огцруулах санал гаргасан Ч.Лодойсамбуу гишүүнийг Ц.Элбэгдорж, Ч.Сайханбилэг нартай хамтран Засгийн газрыг огцруулах гэж байна хэмээн буруутгаж эхэлсэн.

Зарим эх сурвалж МАН-ын нэр бүхий гишүүд Ц.Элбэгдорж, Ч.Сайханбилэг нарыг гадаадаас авчирч, хариуцлага тооцуулах жагсаалыг зохион байгуулсан гэж хардаж буй.