Гэр бүлийн зургаан гишүүнээ угаарын хордлогод алдсан 18 настай цэрэг хүүгийн мэдэгдлээс хойш улстөржилт хүчээ авч, намрын чуулган хаалтаа хийсэн ч төрийн ордон хөл хөдөлгөөн ихтэй байна. Л.Оюун-Эрдэнийн Засгийн газрыг огцруулах улстөрийн акц албажиж, УИХ-ын гишүүн Ч.Лодойсамбуу Ерөнхий сайдыг огцруулах үндэслэлээ албан бичиг болгов. Ерөнхий сайдыг огцруулах эсэх асуудал УИХ-ын гишүүдийн гарын үсгээр дэнслэгдэх бөгөөд жинхэнэ ус тосоороо ялгарна. Түүний гаргасан үндэслэлд УИХ-ын 32 гишүүн гарын үсэг зурахад хангалттай бөгөөд УИХ-ын даргад өргөн мэдүүлж, Их хурлын босго давах хуулийн боломж бүрдэнэ. Хамтарсан Засгийн газрыг огцруулах асуудал тийм ч амаргүй байх нь тодорхой. Л.Оюун-Эрдэнийн Засагт АН-аас зургаан сайд, ХҮН намаас хоёр хүн бий.

Тиймээс сайдлын суудлаасаа тийм ч амархан мултарчихгүй гишүүд Ерөнхий сайдыг огцруулах албан бичигт чөдөр болж, цээжээрээ Л.Оюун-Эрдэнийг хамгаална. Хууль зүй дотоод хэргийн сайдын өнөөдрийн мэдэгдэл ч ингэж үнэртсэн. Бурууг цагдаагийн удирдлагууд руу чиглүүлсэн ХЗДХ-ийн сайд О.Алтангэрэл муухай харагдав. Зургаан хүний амиар улстөр хийж буй УИХ-ын гишүүд муухай байна.