2024 оны УИХ-ын сонгуулиар АН-аас жагсаалтаар их хуралд орж ирсэн Ц.Мөнхтуяа иргэдийн төлөөлөл болж энд суух эрхтэй хүн мөн үү? гэх хэлэлцүүлэг нийгмийн сүлжээгээр өрнөж буй. Түүний гаргаж буй авир олон нийтийн дургүйцлийг хүргэж, дахин гал дээр тос нэмэв. Өнчин хүүхдүүдэд зориулж цуглуулсан хандивын мөнгийг хувьдаа завшсан асуудал эрхэм гишүүнийг хэн бэ? гэх хариултыг төвөггүй өглөө. 

Парламент дахь боловсролын салбарын төлөөлөл УИХ-ын гишүүн Ц.Мөнхтуяа саяхан өөрийн фэйсбүүк хуудаснаа ''Багш нарын төлөө гээд зөндөө л асуудал шийдүүлэх юм. Орж ирээд ганц лайк дарчихаж чадахгүй сууцгаах юм зарим нь. Хэдэн лайк болохыг харж сууя'' гэж гомдол мэдүүлж байв. Хууль тогтоох дээд байгууллагад хууль батлалцаж, санаачлах ажилд бус лайк горьдож, сэтгэлээ чилээсэн нь олны эгдүүцлийг хүргэв. Гэтэл УИХ-ын гишүүн Ц.Мөнхтуяагийн өнчин хүүхдүүдэд зориулсан хандивын мөнгийг тухайн үед хувьдаа завшиж, зориулалтын бусаар зарцуулсан нь илчлэгдмэгц нөхөж хийсэн асуудал сөхөгдлөө.

Тодруулбал 2022 оны 12-р сард өнчирч үлдсэн дөрвөн хүүхдэд туслах аяныг тэрээр санаачлахдаа холбооныхоо гүйцэтгэх захирал н.Идэржавхланд хандив цуглуулах санал тавьжээ. Холбоогоороо дамжуулан  багш, иргэдээс нийт 80 сая гаруй төгрөг цуглуулсан байна. Гэтэл уг мөнгийг Ц.Мөнхтуяа  Д.Мөнхбаатартай нийлж хувьдаа хэрэглэснийгээ холбооны бас бус ажилд зарцуулаад 25 сая төгрөг үлдчихлээ. Удахгүй буцаагаад хийчихнэ хэмээж байжээ.

УИХ-ын гишүүн Ц.Мөнхтуяа, Д.Мөнхбаатар / хоёр Мөнхөө / нар 2018 оноос хойш Монголын багш нарын үйлдвэрчний эвлэлийн холбооны үйл ажиллагааг идэвхитэй явуулж, олонд танигдсан хоёр. Харин одоо Д.Мөнхбаатар нь Ц.Мөнхтуяагийн зөвлөх хийгээд ажиллаж буй.

Хандивын мөнгө цугларсан ч байрандаа орж чадаагүй дөрвөн өнчин хүүхдийг Монголын багш нарын үйлдвэрчний эвлэлийн холбооны гүйцэтгэх захирал н.Идэржавхлан өөрийн төрсөн дүүгийн түрээсийн байранд оруулсан байна. Ингээд хэсэг хугацааны дараа УИХ-ын гишүүн Ц.Мөнхтуяа дур мэдэн зарцуулсан мөнгөө босгож дээрх байрыг худалдан авчээ. Гэхдээ өнчин хүүхдүүдийн нэр дээр бус н.Мөнхтулга гэгч огтын хамааралгүй хүний нэр дээр байрных нь гэрчилгээг гаргуулсан байх юм. 

УИХ-ын гишүүүн Ц.Мөнхтуяа саяхан өөрийн цахим хуудаснаа, ''албатай биш, хүний босгоод өгсөн байранд аятайхан байж чадахгүй бол хөөж гаргаад, ядарсан ахмад багшаа оруулж болно'' хэмээн бичлэг хийсэн. Гэхдээ уг мөнгийг олон нийт өнчин үлдсэн дөрвөн хүүхдэд л хандивласан гэдгийг эрхэм гишүүн умартаж болохгүй. Хандивын мөнгийг анхнаас нь зориулалтын бусаар зарцуулсан, байрны нэрийг гуравдагч этгээдийн нэр  дээр шилжүүлсэн зэрэг нь нийтэд ил болмогц өөрийгөө хаацайлж, яаран увиагүй байр суурь илэрхийлсэн нь олон нийтийн дургүйцлийг өдөөв.  Хэдийгээр болчимгүй үг, үйлдэл гаргасандаа уучлал эрсэн ч юуны учир Мөнхтулга гэгчийг байрны өмчлөгчөөр бүртгүүлсэндээ тайлбар хийхээс татгалзаж буй. Өнчин үлдсэн дөрвөн хүүхдийн хамгийн том нь 18 нас хүрсэн ч уг байрыг нь зарж үрчихвэл яах вэ? гэдэг асуудлыг тэрээр ярьж буй. Хэрвээ ийм болгоомжлол бий бол уг байрыг холбооныхоо нэр дээр бүртгэж болох. 

Ц.Мөнхтуяа гишүүн Монголын багш нарын үйлдвэрчний эвлэлийн холбоонд байхдаа дээрх будилааныг хутгасан. Хутгасан будлианаа нэг талд нь цэгцэлж чадаагүйдээ зээл авсан хүнийхээ нэр дээр уг байрны гэрчилгээг гаргуулсан уу? эсвэл өөрийн, Д.Мөнхбаатарын хамаарал бүхий этгээдийн нэр дээр хандивын мөнгөний байр оччихсон уу? гэдгийг хууль хяналтын байгууллага мухарлах хэрэгтэй болж буй. 

Монголчууд ядарч, туйлдсан нэгэндээ хандивын гараа харамгүй сунгадаг. Үүнийг нь ашиг хонжоо хайгсад хувьдаа завшиж, зориулалтын бусаар зарцуулдаг хүмүүс олширчээ.

Ц.Мөнхтуяа гишүүн УИХ-д боловсролын салбарын төлөөлөл гэж хэлэгдэхэд тун хэцүү үйлдлийг удаа дараа гаргаж, чуулганы танхимд хуурай агсамнаж байсан ч саяхан.