Өнөөдрийн байдлаар нэг ам.доллар 3455 төгрөгтэй тэнцэж буй. Нүүрсний орлого буурч, импорт өсөж байгаа нь гадаад валютын нөөц шавхагдах эрсдэл дагуулж буй. Үүнийгээ дагаад ам.доллар төгрөгийн эсрэг чангарч байна. Оны мөнө 5.5 тэрбум ам.долларын нөөцтэй байсан Монгол улс өнөөдрийн байдлаар 4.8 тэрбум ам.долларын нөөцтэй. Валютын нөөц буурч байгаа нь ам.долларын эрэлт үүсгэж, ханш өсөхөд нөлөөлж буй. Хэдийгээр арилжааны банкууд доллар зарахад хязгаар тогтоогоогүй гэж байгаа ч 10 мянган ам.доллар сольчих арилжааны банк алга. Багахан хэмжээний долларыг асуудалгүй сольж байгаа бол зарим банкууд заавал нэг хоногийн өмнө урьдчилж захиалгаа баталгаажуулах ёстой гэх сонин шаардлага тавьж буй нь долларын хомсдол үүссэнийх.

Үүнийг Монголбанкны гаргасан мэдээлэл ч харуулна. Нэгдүгээр сарын дүн мэдээгээр гадаад валютын нөөц 4.8 тэрбум ам.доллар байгаа нь оны эхнээс -11.24 хувиар буурсан үзүүлэлт.

Энэ бол таван сарын хэрэглээний нөөц хэдий ч экспортын орлого, импортын зарлагыг давж чадахгүй нөхцөл үүслээ гэхэд төлбөрийн тэнцэлд шууд дарамт үзүүлнэ. Цаашлаад урсгал данс алдагдалтай гарч, нөөц шавхагдах эрсдэл бий болно. Үүнийг төвбанкны ерөнхийлөгч үгүйсгэсэнгүй.

Б.Лхагвасүрэн Монголбанкны ерөнхийлөгч: Валютын гадагш урсгал өндөр, урсгал тэнцэл маш том алдагдалтай байна

"Өнгөрсөн онд Монгол Улсын экспорт 4 хувиар, харин импорт 26 хувиар өссөн үзүүлэлт гарсан. Өөрөөр хэлбэл, валютын гадагш урсгал өндөр, урсгал тэнцэл маш том алдагдалтай байна. Урсгал тэнцлийн алдагдлын томоохон хэсгийг үйлчилгээний тэнцэл бүрдүүлж байна. Монгол Улс гаднаас үйлчилгээ авч байгаа өр төлбөр буюу алдагдал 3 тэрбум ам.доллар гэж яригдаж байна. Энэ байдал өөрчлөгдөхгүй бол дарамт цааш үргэлжилнэ.'' гэв.