Сонгуулийн ерөнхий хорооныхон  бүрэлдэхүүнээрээ золтой л АТГ руу явчихсангүй. Өнгөрөгч долоо хоногт хамгийн барцадтай байсан хүмүүс гэвэл тэднийг хэлнэ. УИХ-аас өгсөн үүрэг даалгаврын дагуу автоматжуулсан аргаар сонгогчдын санал тоолох машин олж танилцуулах болсон билээ. Үүнийг дагуу  Төрийн байгуулалтын байнгын хороонд санал тоолох машин хэмээн БНСУ-ын  “MIRU” компанид үйлдвэрлэсэн сканнерыг танилцуулахаар авчирсан юм. Уг сканнерын  тухай урд өдөр нь мэдсэн гишүүд Сонгуулийн хуульд тодорхой заасан зүйл заалтыг СЕХ зөрчиж байгаа талаар хар пиарыг  цацаад эхэлсэн байлаа.  Мөн дээр сканнерын талаарх  бүхий л бүтэхгүй мэдээллийг цуглуулсан байв. Урьдаас бэлтгэлтэй байсан гишүүд СЕХ-ны дарга Н.Лувсанжав даргад хатуу үгийг хайр найргүй хэлж бүрэлдэхүүнээр нь АТГ-т өгч шалгуулах дээрээ хүртэл тулсан юм. Зарим гишүүн яагаад АНУ-ын мэргэжлийн компани байхад Солонгосын зүгээр нэг сканнер үйлдвэрлэдэг компанийг сонгох болов. Хэдэн төгрөгийн  авлига авсан хэмээн ёстой л хэл амыг нь сугалах дөхсөн. Өмнө нь Америкийн ES&S компанийн DS200 машиныг авах хэрэгтэй  гэж сонгоод явуулж байхад юуны учир больсныг тодруулж байв.  Н.Лувсанжав дарга СЕХ-ны дарга амбицтай нэр дэвшигч, сонгогч, улстөрийн намын зүгээс байнгын дайралтад орж ядаргаанд ордог жишгийн эхлэлийг энэ удаа эдэлсэн юм. Тэрээр "АНУ-ын компани хариуцлага хүлээх баталгаа гаргаж  өгөхөөс татагалзаад хэлэлцээрээс гарсан. Харин БНСУ-ын компани банкны сканнер үйлвэрлэдэг ч гэсэн манай саналыг хүлээн авсан болохоор сонгосон" хэмээн учир явдлаа  тайлбарласан ч гишүүд хүлээж авсангүй. Нэн даруй сонгуульд ашигладаг, санал тоолдог машин олж санал болохоор оруулж ирэх үүрэг өгөөд сканнерыг нь тэврүүлэн буцаалаа. Ажлаа хаяад байсан багш нартай хэлэлцээрийн ширээнд сууж цалин нэмэх хугацааг наашлуулах  амлалт өгсөн Засгийн газар ажилдаа шуурхайлан орсон. Ингээд төсвийн байгууллагын ажиллагсдын цалин хөлсийг 2012 оны хоёрдугаар сарын 1 болон  тавдугаар сарын 1-ний өдрөөс хуулиар тогтоосон хэмжээгээр нэмэгдүүлэх болсон юм. Тодруулбал хоёрдугаар сарын 1-нээс төсвийн байгууллагын ажилчдын цалин 23 хувиар нэмэгдэх болж байна. Ийнхүү төрийн албан хаагчдын санаа амарсан ч Үйлдвэрчний эвлэлийн ажил дуусаагүй. Гурван талт хэлэлцээрийг үеэр яригдсан ажлуудаа дуусгах,  нийгмийг нуруун дээрээ үүрч баялаг бүтээж байгаа хувийн хэвшлийнхнийг цалин нэмүүлэх ажил үлдсэн гэнэ. Ингэж цалин мөнгөний асуудал нэг тийш шийдэгдэж байхад иргэдийн ажил амралтыг зохицуулсан бас нэг хууль батлагдаж байлаа. Энэ нь  Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай, Үндэсний их баяр наадмын тухай хуульд нэмэлт оруулах тухай хууль юм. Уг хуулийн төслийг УИХ  дахь хоёр намын бүлэг ерөнхийд нь дэмжсэн ч бөхийн барилдаанд амжилт гаргасан бөхчүүдэд цол өгөх гэдэг дээр санал зөрөлдөж байв. УИХ-ын олонхи гишүүн Монгол Улс үндэсний рэх чөлөө тусгаар тогтнолоо олж авсан түүхэн өдрийг  бүх нийтээр амарч тэмдэглэх нь зөв. Харин  бөхөд цол олгоно гэдэг байж болохгүй гэж байлаа. Уг хуулийг төсөл УИХ-аар хэлэлцэгдэж байгаа сургаар бөхчүүдийн гарын алаг загатнаж,  хөнжилдөө хурхирах завгүй баахан найраа төлөвлөсөн гэж байгаа.  Гэвч бөхчүүдийн  хүсэн хүлээж байсан цол нэмэх тухай заалт хууль батлагдах үеэр байхгүй болов. Хэдийгээр арванхоёрдугаар  сарын 29-ний өдрийг бүх нийтийн амралтын өдөр болгон тэмдэглэн өнгөрүүлэх болсон ч  бөхийн барилдаан болох ч цол олгохгүй байхаар болов. Харин  “ Нийтээр тэмдэглэх баярын болон тэмдэглэлт өдрүүдийн тухай “хуулийн нэрийг “Үндэсний эрх чөлөө, тусгаар тогтнолоо сэргээсний баярын өдөр” гэж өөрчилсөн  юм. Улстөр нийгмийн салбарт ийнхүү өрнөлттэй байгаа бол иргэд шинэ жилийн баяраа тэмдэглээд  хэрүүл тэмцэл, ажил хаялт, шуугиан дуулианыг тоох  сөхөө алга. Монголчууд баярын өдрүүдэд хар муу мэдээлэл сонсгох дургүй билээ. Б.Ургамал