Монгол Улсын төр эзгүй 24  цаг болох нь. УИХ-ын дарга Д.Дэмбэрэл өнөө өглөө арлын орныг зорьсон. Японы Парламентын Зөвлөхүүдийн танхимын даргын урилгаар дөрөв хоногийн албан ёсны айлчлал хийхээр ийнхүү дөрөө жийжээ. Ерөнхий сайд Индонезид, Ерөнхийлөгч Кутейтэд айлчилж байна. Дараа нь Катар айлчлаад энэ сарын 14-нд буцаж ирнэ. Харин  Ерөнхий сайд түрүүлж эх орондоо  ирэх юм байна. Маргааш Чингис хаан олон улсын нисэх онгоцны буудалд газардана албаныхан тосно гэсэн төлөв байна. Тэгэхээр Үндэсний аюулгүй байдлын зөвлөлийн гишүүд гадаадад явна гэсэн үг.  Үндсэн хуулиар төрийн гурван өндөрлөг буюу Үндэсний аюулгүй байдлын зөвлөлийн гишүүдийн нэг нь төрийн жолоог атгаж үлдэх ёстой билээ. Гэтэл өнөөдрийн байдлаар төрийн тамга, Төрийн ордон эзгүй  үлджээ. Хуучин цагт  эзгүй үлдсэн улс орон руу атаатан дайсан дайрч газар нутгийг нь эзлэн авдаг гашуун түүх  олон бий. Одоо  цагт ийм зүйл болохгүй ч төрийн хар хайрцагт салхи сийгэхгүй, далимдуулагчид гадна, дотноос байхыг үгүйсгэхгүй. Ерөнхийлөгч, УИХ-ын дарга, Ерөнхий сайд нар бүрэн эрхээ хэтэрхий их ухаарч айлчлалдаа санаа тавьснаас төрийн жолоог эзгүй орхиж болохгүй гэдгийг умартжээ. Ирц нь хангалттай ч танхимд суух гишүүн цөөтэй парламент нь ч энэ өдөр эл хуль. Үдээс өмнөх хуралдаанд 40 гишүүн ирсэн гэж бүртгэгдсэн ч танхимд 10 гаруйхан гишүүн сууж байна. Үдээс хойшхи хуралдаан ирц бүрдэнэ гэхэд итгэлгүй. 10 гаруй гишүүн Ерөнхийлөгч, Ерөнхий сайд, спикерээ дагаад талийж одсон. Хотын утаанаас салж  халуун дулаан орноор аялж, хотын утаанаас түр хугацаанд ч гэсэн зугтаж явахыг  үгүйсгэхгүй. Эцэг эх нь гараад явахаар дэггүйтээд, гадуур гараад тэнээд явчихдаг шиг  айлын дүр зураг өнөөдөр Төрийн ордонд ноёрхож байна.  Энэ сиймхийг ашигласан гишүүн  хувийн болон хувьсгалын ажлаа амжуулж явахыг үгүйсгэхгүй. Сүүлийн хэд хоног байнгын хороо ч  ирцээ бүрдүүлэх гэж зодог болсон. Танхимд ирж нүүрээ харуулж бүргүүлчихээд усанд хаясан чулуу шиг алга болдог буруу жишиг тогточихоод байна.  Энэ нь өнөөдрийн чуулганд ч давтагдсаар.