Адууны баяр эхэлж байгаа юм байна.

Монголын үндэсний хурдан морины уралдааныг дэлхийн дээд амжилтын Гиннесийн номонд бүртгүүлэх 3000 морины уралдаан, 10.000 морьтны жагсаал гээд монголын их өв соёлыг дэлхий нийтэд сурталчлах томоохон ёслол өнөөдөр эхэлж байна... Нэг ийм сайхан ч гэхүү, гайхалтай ч гэхүү ямарч л байсан жирийн биш нэг өдөр дэлгэр Монголд минь тохиож байгаа юм байна.

.

Юу болоод, яагаад ийм арга хэмжээ тохиох болов. Хэвлэлд сурталчилснаар бол ММСУХ-ны удирдлагууд гадаад харилцаагаа хөгжүүлэх тал дээр нэлээдгүй анхаарч өнгөрсөн 7-р сард Азийн морин уралдааны 34-р чуулганаар Монгол улс Азийн морин уралдааны холбооны удирдах зөвлөлийн гишүүн орон болсон юм байна Мөн түүнчлэн өнгөрсөн жил Парист болсон хуралдаанаар Монгол улс Олон улсын морин уралдааны холбооны гишүүн орон болжээ. Улмаар ММСУХ маань өнөөдөр Азидаа гишүүнчлэлтэй, Олон улсдаа гишүүнчлэлтэй, Олон улсын томоохон нэр хүндтэй байгууллага болж чадсаныг цохон тэмдэглэх нь зүйтэй байх ... гэсэн байна.

.

Унаа ч хүүхэд уралдааны замд эндчихэд эмгэнэл,мэдэгдэлч гаргадаггүй ММСУХ-ны яруу алдар үүгээр дуусахгүй юм байна.Монгол адуугаа паспортжуулах, баруун аймгуудад “Монгол уяач 3000” зөвлөгөөнөө хийнэ гээд маш олон ажлыг хийхээр төлөвлөөд байгаа гэнэ. Эдгээр төлөвлөгөөд ажлуудын нэг бол яахын аргагүй дэлхийн адууны баяр болох юм байна. 1263 онд Хубилай хаан дэлхийд анх удаа адууны яамыг Монгол улсад байгуулж байсан бөгөөд тэр цагаас хойш 750 жил өнгөрсөн байна. Өөрөөр хэлбэл Монгол улсад адууны яам үүссэний 750 жилийн ой 2013 онд тохиож байгаа юм гэнэ.

.

Үнэхээр гайхалтай юм.Түүхэнд аль нэг улсад олон яам тамга байгуулагдаж байсан тэгэхэд Адууны яамтай орон харин ч байгаагүй байх. Энүүгээрээ нөгөө Гиннест аль хэдийн орохоор болсон юм биш үү. Манайхаас олон адуутай түүнийгээ янз бүрээр илэрхийлсэн орон байж болно. Гэхдээ адууны яамтай байсан гэдгээ нотолж чадахад одоо боллоо биш үү.

.

Нэгэнт зохион байгуулалт нь хангагдаад албан ёсоор эхэлж байгаа арга хэмжээнд амжилт хүсэх учиртай. Араа даана гэдэг шиг 3000 хурдан буяны туурайн төвөргөөнөөс босох тоос байтугай ард нь үүсч болзошгүй олон асуудлыг тооцох шиг тооцож зохион байгуулсан байж таарна. Хэвлэлүүд хойд эцгийн царай гаргаж энэ арга хэмжээнд олон талаас нь шүүмжлэлтэй хандаж “хийрхэл” гэж бичиж байгаа. Уяан дээр нойргүй хонож, бариан дээр өндөлзөж, хурдан морь уяахын гайхам сайхныг мэдэрч, жилээс жилд нэмэх насаа биш наадмаас наадамд ахих түрүүгээ бодож амьдардаг олон уяачдын таалалд нийцэж байгаад нь хүндэтгэлтэй хандах ёстой байх.

.

Харин хүссэн үр дүн нь гарч хөх толбот Монголчууд дэлхийд өрсөлдөгчгүй морьтон түмэн гэдгийг таниулах тэр санаа илэрхийлэл нь тод томруун гараасай даа.Үнэхээр монголын их өв соёлыг дэлхий нийтэд сурталчлах томоохон ёслол болох юм бол урам,баярын үгийг харамгүй дайя.Харин хийрхсэн баярхсан хэдэн уяачдын ялгарал бардамнал болж,монголын хурдан адууны 3000 гэсэн тооны шоу,болвол хайран хөрс шороо,хүүхдийн амь насны эрсдэл болж нэрээ хугалсан хэрэг болно.

.

Ард нь эдийн засгийн ямар хаялга байгааг одоогоор хэлж мэдэх юм алга.Энэ уралдаан морио давхиулсан хүн болж хүний уясан хурдан морийг нэр дээрээ ”түрээсэлж” бичүүлж болох зар яваад эхэлсэн байна лээ. Мэдээж хөөрхөн үнэ ханштай байгаа. Ямартай ч ард нь бизнес бас явж байгаа юм шиг байна.

.

Зохион байгуулагчдын хэлж байгаагаар энэ арга хэмжээнээс Монголыг адууны орон юм байна гэж дэлхий нийт таньжхүлээн зөвшөөрөхийн гэсэн. Бидний ойлгож байгаагаар дэлхий нийт бишрэхээр сүр дуулиантай зүйл болвол дэлхийн мэдээллийн сувгуудаар цацагдаад эхлэх учиртай.

.

Яг одоо сувгаа соль. Бодвол дэлхийн хамгийн хурдан морьд азийн цээжинд байх Монголын талд цуглаад байгаа талаар дэлхийн том мэдээллийн суваг бүрээр гарч байгаа байлгүй.

Үнэхээр ингэж сурталчилдаг бол ёстой гоё, юу яасан Гиннес

.

П.Баярхүү /тоймч/