Долоо хоногийн дараа 5 дахь Ерөнхийлөгч тодорно. Наадмын бөх начны даваанаас сонирхолтой болдгийн адил сонгогчдод сурталчилгааны төгсгөлд илүү анхаарал нь идэвхжих болов уу.

Намуудын сурталчилгааны явцдаа цуглуулсан бонусаа нэмэх зарим нэг хоцрогдлоо нөхөх саналыг эргүүлж болох халз мэтгэлцээний тов дуулдаж эхэллээ. Гурван намын төлөөлөл уулзаж, ирэх 23,24-ний аль нэгэнд телевизээр шууд мэтгэлцэх товыг урьдчилан тохирсон мэдээ байна.

.

Нэр дэвшигчдийг шалгалт өгч байна гэж үзвэл хэн хэн ямар асуулт сугалаанд таарвал баярлаж бас ямар асуултаас бэргэж цэрвэх бол. Мөрийн хөтөлбөр нь Ц.Элбэгдоржийнх арай гайгүй бусад нь хэт ерөнхийлсөн байдалтай сулхан хөтөлбөрүүд гэж иргэд шүүмжлэлтэй хандаж байгаа.

Тэгээд ч өнгөрсөн хугаацанд явагдсан сурталчилгаа мөрийн хөтөлбөрийн тухай бараг л сурталдсангүй. Харин хэн, хэн бэ гэдгийг харуулах тал дээр илүү хүч анхаарал хаясан талдаа явагдаж ирсэн. Үүнтэй холбоотойгоор мөрийн хөтөлбөрийн агуулга санаа бүдгэрч ирсэн талтай байх.

.

Одоо шууд мэтгэлцээнд мөрийн хөтөлбөр нь үндсэн хөзөр ба сонгогчдод өөрийгөө илэрхийлэх яриа тайлбарынх нь гол зангилаа болох юм.

МАХН-аас нэр дэвшигч Н.Удвалын хувьд эрүүл мэндийн асуудлаар давамгайлах ёстой болоч одоогийн байгаа мөрийн хөтөлбөрт энэ талаар тийм сүрхий анхаарал хандуулж уулга алдахаар зүйл харагдахгүй байгаа. Тухайлбал, 25 зүйл бүхий мөрийн хөтөлбөр дотор нь эрүүл мэндийн асуудалтай холбогдох хоёр заалт байгаа. Тодруулбал, “Монгол хүний аюулгүй байдал ялангуяа эрүүл мэндийн аюулгүй байдлыг хангах Үндэсний аюулгүй байдлын “ХОТОЧ”-ийг бий болгоно”, “Хүний эрүүл мэнд, хүрээлэн буй орчинд сөргөөр нөлөөлж байгаа ундны усны хомсдол, цөлжилт, ус хөрс, агаарын бохирдол, цөмийн болон бусад химийн аюултай хог хаягдал зэргийн хор хөнөөлийг нэн даруй арилгаж дахин шинээр үүсэн бий болохоос урьдчилан сэргийлнэ” гэсэн. Энэ бол маш том ерөнхийлсөн заалт гэж шүүмжлэх хүн байгаа. Ерөнхийдөө ярианых нь гол тулгуур нь шударга ёсны сэдэв байх болов уу.

:

Нэр дэвшигч Б.Бат-Эрдэнэ /МАН/ одоо явж байгаа сурталчилгаагаар бол уул уурхайн асуудал дээр суурь оноогоо нэмэх гэж чармайх  байх. Гэхдээ энэ тал дээр түүний хэлэх гол санаа нь баялгийг ашиглах гэхээсээ онгон байгаль унаган төрхийг хамгаалах гэдэг дээр илүү дуугарах талтай байгаа. Мөн өөрийн санаачилж батлуулж байсан Урт нэртэй хуулийн төслийн талаар нэг их дурьдахгүй байх. Сүүлийн үед энэ хууль бодит байдалд дээр хэрэгжих үндэслэл муутай болсон ба төр хуулийн хэрэгжилтийг хангаж нөхөн олговрын мөнгийг гаргаж дийлэхгүй болсон талаар нэг бус удаа мэдээлэгдсэн. Мөн Б.Бат-Эрдэнэ нэр дэвшигчийн оноо авахаар зүтгэх нэг сэдэв бол Оюутолгойн гэрээ. Түүний мөрийн хөтөлбөрт “Оюутолгойн хөрөнгө оруулалтын гэрээг харилцан ашигтай, тэнцвэртэй байх нөхцлөөр сайжруулна” гэсэн өгүүлбэр орсон байгаа. Мөн Ашигт малтмалын нийт лицензийг дахин шалган магадлаж, зөвхөн улс, орон нутгийн хөгжлийн эрх ашигт нийцсэн орд газруудыг ашиглах эрх зүйн орчин бий болгож, төрөөс хатуу хяналт тавьж хэвшүүлнэ гэсэн нь ч байгаа. Харин авлига хээл хахуулийн тал дээр “Миний гар цэвэр” гэдгээ нэлээн том дуугаар хэлэх болов уу.

.

Учир нь шууд нэвтрүүлэг дээр ...гэхдээ ..миний бодлоор ...таны ард танай намын асуудалтай нөхдүүд нуугдаад байна уу гэх мэт чиглүүлсэн болон өдсөн асуулт тавигдахгүй.

АН-ын нэр дэвшигч Ц.Элбэгдоржийн хувьд /мэдээж хууль, шүүхийн байгууллагын шинэчлэл дээр ярих тайлагнах зүйл их бий, яаж өгөгдсөн минутад багтааж, базаж хэлэх вэ гэдэг л асуудал байгаа байх. Залгаад нийгмийг авилгын торноос салгаж авах тухай Топ сэдэв нь байна.

.

“Монгол улсын  төлөө зүтгэе” гэсэн түүний мөрийн хөтөлбөрт “...Авлига, хээл хахууль, төрийн хүнд суртал, албан тушаалтнуудын хууль бус үйл ажиллагаатай үргэлжлүүлэн тэмцэнэ. Хууль зөрчигчидтэй хөрөнгө чинээ, нам улс төр, танил тал харгалзахгүй ижил тэгш хариуцлага тооцож ажилладаг жишгийг хуульчлан тогтоож хэрэгжүүлнэ.

.

Авлига, албан тушаалын гэмт хэрэгтэй тэмцэх эрх зүйн орчныг үргэлжлүүлэн боловсронгуй болгоно. Шалгах шаардлагатай өндөр албан тушаалтны бүрэн эрхийг түдгэлзүүлдэг болно. Авлигаас учирсан эдийн засгийн хохирлыг заавал төлүүлнэ. Авлига өгснөө хуулийн дагуу илчилсэн иргэнд ял шийтгэл оногдуулахгүй байх бодлого баримтална” зэрэг онцлон ярих зүйл багагүй байгаа. Ийн өнөөдрөөс олны анхаарал 3 нэр дэвшигчийн шууд мэтгэлзээнд хэрхэн биеэ авч гарах вэ гэдэг дээр төвлөрч тэр нь илүүрхэнэ, ингэнэ тэгнэ гэсэн таамаг яриа ч гарч эхэлж байна.

 .

Шууд мэтгэлцээн бол бөхийн тааврыг хагалах шөвгийн 4-ийн барилдаан биш, мөн уран илтгэлийн тэмцээн ч биш гэдэг нь хэнд ч ойлгомжтой. Харин улс эх орны тусгаар тогтнол, аюулгүй байдал, иргэдийнхээ амар тайван амьдрал хийгээд шударга ёсны баталгааг хангасан МУ-ын төрийн тэргүүн байж чадна гэдгээ олон түмэндээ нотлон харуулах нэг том бололцоо л юм.

 .

П.Баярхүү  /тоймч/