МАН-ын нэр дэвшигч Б.Бат-Эрдэнэ бэрхийг туулахаар бүтээгдсэн хүн болохоо харуулж хүн зонтойгоо гар барьсаар л, уулзсаар л явна. Аварга маань Говсүмбэр аймгаар сүнхийгээд гарсан сураг байна. Энд иргэд саналаа өгөх гэж яарч байгаагаа илэрхийлжээ. Энэ талаар  Баянтал сумын иргэн А.Өлзийхутаг “Би өмнө нь Ерөнхийлөгчийн бүх сонгуульд саналаа өгч байсан. Энэ удаад бушуухан саналаа өгч, үр дүнг нь үзэх гэж үнэндээ их яарч байна. Би гарцаагүй Б.Бат-Эрдэнэ аваргадаа санал өгнө. Учир нь түүний мөрийн хөтөлбөрт хүчний байгууллагыг улс төрөөс хол байлгах тухай чухал заалт орсон. Шүүх, прокурор дэндүү нэг талыг барьсан шийдвэр гаргаж, улмаар монголчуудаа нам, үзэл бодлоор нь алагчилж, талцуулчих гээд байна шүү дээ. Тиймээс ийм цөвүүн цаг үед яг л аварга шиг хүн үгүйлэгдэж байна. Тэр жинхэнэ эв нэгдлийг илэрхийлэгч байж чадна” гэж байв. Нэр дэвшигч энэхүү үгийг баталж, Говьсүмбэрчүүдтэй уулзалт хийх үеэрээ “Талцалгүй Монголын төлөө ажиллана” хэмээн амлажээ. Сүүлийн үед ТВ-ээр их гарах болсон том жижиг чулууны талаар сурталчилгаанд зохих хариуг нь өгөх болсон гэж аваргын фенүүдийн шийдсэн бололтой байна. Уулзалтын үеэр нэгэн ануухан буурал “Том чулуу гэнэ үү, жижиг чулуу гэнэ үү нэг юм яриад байх болжээ. Утгаа гаргаж ядаад байх шиг. Тэгвэл тогоо даахгүй жижиг чулуу газраа хөөддөг юм шүү дээ” хэмээн Цогоо гуай, Хүрэлхүү хоёрт хариу барьсан байна.

.

Н.Удвал нэр дэвшигчийн үнэнч фэн болсон ээжүүд эмэгтэйчүүд Face, Twitter-ээр гайхуулад байгаа Эби болон Баагий аваргын талынхныг айлмайруулахаар шийджээ.

Нэлээн дээхнэ юм уу даа нэр дэвшигч Н.Удвал Монголынхоо бүх ээж, эмэгтэйчүүдэд хандаж захидал бичсэн юм байна. Тэднээс захидлын хариу ирсээр байгаа ба өнөөдөр Богд дүнжингарав уулын өвөрт 1000 ээж цуглан, нэр дэвшигч Нацагийн Удвалд бичсэн захидлын хариуг шууд клип байдлаар явуулж байгаа юм байна. Ээжүүдийг клипний “натур”-таа гарахад нь нар инээмсэглэн угтаж мөн зэрэг бороо шивэрч, шонхор шувуу дүүлж угтсан гэнэ. Ер нь нэр дэвшигч Н.Удвалыг хаа ч явсан бороо хураар угтаж байгааг анхаарахгүй байхын аргагүй болоод байна. Мөн түүнийг дэмжихээр ирсэн ээжүүдийг ч тэнгэр ивээж, өнөөдрийн зураг авалтын үеэр бороо зүсрэн орсноо намдаж, нар мандаж тэнгэр цэлмэсэн байна. Ээжүүд энэ клипээ ‘’Цагаан сүүний хувьсгал’’ хэмээн нэрийджээ. Мянган ээж тэнгэрт залбирч Богд уул, Сонгинохайрхан, Чингэлтэй, Баянзүрх хайрхандаа сүүн цацал өргөж, Монгол Улсын сүлд хийморь өөдөө байхыг ерөөж, эмэгтэй нэр дэвшигчээ газар тэнгэртээ даатгажээ.

.

Нацагийн Удвалын илгээсэн захидалд ээжүүдийн хариу захидлыг сийрүүлбэл “Эх нутгаа нэхэж сонгоцгооё, Элгэн түмнээ өмөөрч сонгоцгооё. Гамшиг дагуулсан улс төрөөс салж сонгоцгооё, Эх орноо аварч сонгоцгооё. Ирээдүй хойчоо бодож сонгоцгооё, Эв нэгдлээ сахиж сонгоцгооё, Эхтэй бүхэн эгшиж сонгоцгооё” хэмээсэн байна. Мөн Монголын эмэгтэйчүүдээс гадна иргэд сонгогчид Монгол улсын өнцөг булан бүрээс нэр дэвшигч Н.Удвалыг дэмжиж байгаагаа илэрхийлэн, баяр хүргэж, нэг минутад нэг мессэж ирж байгаа гэнэ. Утасных нь цэнэг тэсэх үү. Ийнхүү Н.Удвал нэр дэвшигч өвөрмөц, урьд байгаагүй цаашид ч давтагдахгүй өвөрмөц сурталчилгаагаараа нөгөө хоёроо сандаргах нь бололтой.

.

Нэр дэвшигч Ц.Элбэгдорж зургадугаар сарын 17-нд Дархан-Уул аймгийн Шарын гол суманд ажиллаж сонгогчдын зүрхэндэх шар усыг бас л буцалгаж өгсөн бололтой байна. Хууль зүйн сайд Х.Тэмүүжин түүнийг дагалджээ.

.

Уулзалтын үеэр Х.Тэмүүжин сайд сүүлийн үед илрээд буй авлигын байх магадлалтай хэргүүдийн талаар ярьж, Монголын хөгжилд чөдөр болсон авлигатай Ц.Элбэгдорж л үргэлжлүүлэн тууштай тэмцэж чадах хүн мөнөөс мөн болох талаар дахин тодотгож өгсөн байна. “Авлигачдын авсан мөнгийг буцааж ард түмэнд нь өгөх ажлыг нэр дэвшигч Ц.Элбэгдорж л хийж чадна. Намайг анх Хууль зүйн сайд болоход авлигатай хатуу тэмцэх даалгаврыг Монгол Улсын Ерөнхийлөгч надад өгч байсан” гэж Ерөнхийлөгчтэй ойр дотно ажиллаж байгаагаа олон нийтэд мэдрүүлсэн бололтой байна.

.

Нэр дэвшигч Ц.Элбэгдорж “Монгол орныг олон жил эрчим хүчээр хангаж явсан Шарын голын иргэд цаашид ч Монгол орноо эрчим хүчээр хангана. Монголд хийх олон ажил байна. Олон асуудлыг бид шийдэж ирсэн, цаашид ч шийдэх олон асуудал байна. Монгол Улс нүүрсний асар их нөөцтэй. Нүүрсний уурхайн ам бүр дээрээ цахилгаан станц баривал Монгол орон эрчим хүчний диваажин болно гэж гадныхан хэлдэг. Арваад жил ярьсан тавдугаар, зургаа, долдугаар станцаа барья. Багануур, Шивээ-Овоод цахилгаан станц барья” гэлээ. Ерөнхийлөгчийн очсон газар бүр л нэг юмтай болох талаар тал амлалт сонсдог болжээ. Дээр Говьсүмбэрийнхэн усны асуудлаа лав ОК болгоно гэсэн амлалтыг хэлүүлж, түүнийгээ бичлэгээр баримтжуулж аваад үлдсэн гэж байгаа. Одоо Шарын голынхон цахилгаан станцтай болох шахуу л юм болоод явчихлаа.

.

Нэг сонин мэдээ нэмж дуулгахад, хоёр Мөнх аварга нийлээд суучихсан Ц.Элбэгдорж нэр дэвшигчийг дэмжиж байгаа ТВ реклам цацагдаж эхлээд байна. Үүнд дүгнэлт өгөх гээд яахав. Иргэн хүн хэнийгээ дэмжих өөрийх нь л хэрэг. Өнөө бөхийн жудаг, мөс чанар энэ тэрд нь харин хэр таарч байгаан бол доо.

Сонгууль хаяанд ирлээ.

.

П.Баярхүү /тоймч/