Хилийн чанадад байгаа Монголчууд маань Ерөнхийлөгчийн сонгуульд саналаа өглөө.

Одоо эх орондоо оволзох, сүрхий улс төрчих чадвартай та бидний ээлж ирж байна. Сурталчилгаа үндсэндээ төгсгөл шатандаа орлоо гэж болно. Уулзалт яриа, нүүр тулсан ухуулга өндөрлөх шатандаа орж, нийгэмд том асуудал тавьж түүнийхээ энгээр  даазтайхан мэдээлэл сурталчилгаагаа хаяж, шийдвэрлэх ялалтын цэгээ хатгах үе рүүгээ эргэж байх шиг байна. Өдөр тутмын сонины тэргүүн нүүрүүдийг нээхэд ташаа тулан ханхалзаж байгаа нийтлэл, топ сэдэв бол авилга мөнгө угаалтын хэргүүдийн эргэн тойрондох мэдээллүүд зэрэгцээд нэр дэвшигчдийн тодотгосон болон бүдгэрүүлсэн нийтлэл ярилцлага байна.

6

Өнгөрсөн 20-д хоногийн сурталчилгааны ард нэр дэвшигчдийн талаарх бидний ойлголт  юугаар баяжив, юугаар дундрав гэдгийг товч харцгаая.

Б.Бат-Эрдэнэ нэр дэвшигчийн хувьд бүгдийн мэдэх аварга, төрийн түшээ нуруутай сайхан  эр хүн гэдгээс гадна, Улс төрийн зүтгэлтэн үнэхээр мөн үү, Ерөнхийлөгч хүний үүрэгт ажлыг хийхэд хувь хүний өөрийнх нь боловсрол, чадвар хүрэх үү гэдэгт дээр сонгогчдын мэдлэг бага ч атугай дээшилсэн байх. Учир нь сүүлийн үед Аваргыг дэмжиж байгаа иргэд, хуульч хүн нэр дэвшиж байгаад баяртай байна гэж их ярих болсон байна. Нөгөө намаас нь шидсэн байж болох хэд хэдэн нийтлэл мэдээллээс Аваргын талаарх хүн чанартай, жудагтай эр хүн гэсэн олон нийтэд нэг мөр байсан ойлголт багагүй сарнилаа. Намынх нь нэг нөхөр нэр дэвшигчидээ сэтгэл дундуур явдгаа шууд хэлж, үүндээ Самбо бөхийн холбооны эргэн тойрондох үйл явдлын талаар холбон ярьсан нь хөвөгчид буюу төвийг сахих байр суурьтай хэсэгт сүрхий нөлөөлж, аваргыг дэмжих эсэхээ эргэж харах байдалд хүргэх шахлаа. Учир нь ихэнх сонгогчийн хувьд жудаг ба нөхрийн мөн чанараа гээсэн хүн гэдэг бол цаашдаа явахгүй л нөхөр гэсэн ангилалд орно. Аварга бол бөх л хүн, тэгэхээр бөхөөрөө л бай гэж ярих хүн цөөрсөн тал байна. Харин энэ нөхөр уг нь зүгээр гэхдээ  Ерөнхийлөгчийн ажлыг дааж хийж чадах уу. Төвийг сахисгээл дүлэгнүүлээд байвал хэрэггүй дээ гэж харах хүмүүс олон  байгаа. Гэхдээ аварга урагшаа ахисаар л байна.

6

Ц.Элбэгдорж нэр дэвшигчийн “хэлснээ хийсэн” талаар бол хүмүүс нэг их маргахгүй байна. Энэ талын мэдээллээр иргэдийн тархи руу дахин их чигжих гэх хэрэггүй юм. Авилгын торыг бүгдийг нь хөвөөгүй ч олон нийтэд сүлжээ нь ил харагддаг болгож өгсөн гавьяатай нь маргах хүн цөөхөн байна. Гэхдээ энэ нь түүнийг дахин сонгох ногоон карт бол биш. Одоо нийгмийг шуугиулж байгаа хэргүүдийг ганц одоогийн Ерөнхийлөгчийн гавьяа болгож фон хийх гэж улайрвал харин ч эсрэгээрээ нийгэм сөргүүлээд энэ АН нь тэгвэл  үнэхээр цэвэр гэж үү гэж ширэв татаад нөгөө тал руугаа эргэхэд бэлэн л байгаа. Хэд хоног өрнөсөн авлига мөнгө угаалтын хэрэг явдлаар Ц.Элбэгдорж нэр дэвшигчийн талаарх эерэг ойлголт нэмэгдсэн гэж хэлэхэд хэцүү л байгаа юм. Харин өөр сонголт алга даа, энэ 3 дотроо бол Эби л байх шив дээ гэх яриа, дүгнэлт сүүлийн хэд хоногт зонхилох хандлагатай байгаа нь ажиглагдаж байна. Өөрөөр хэлбэл, Ц.Элбэгдорж нэр дэвшигчийн хийсэн, хийх хоёрыг дэнсэлж шалгуур болгон сонгох хэсэг байгаа ч ерөнхийдөө бол  Аварга, Эби хоёрынхоо хэн хэнийх нь сайн талыг шингээсэн гуравдагч төгс талдаа Ерөнхийлөгчийг төсөөлж үгүйлж байгаа цөөнгүй хэсэг бий. Гэхдээ тэд дөрөв дэх хүн буюу төгс нэр дэвшигч байхгүй гэдэгтэй эвлэрчихсэн яваа л даа.

6

Н.Удвал нэр дэвшигчийн талаар иргэд  хэр олон саналыг Аваргын талаас бултуулж чадах вэ гэдэг эцсийн саналын тоон дээр нь бооцоо тавих маягийн зүйл л ярьж байна. Уг нь гардаг бол дэмжчихмээр л байна, ер нь гарахгүй ч байлаа саналаа өгсөн ч яадгийн гэх тодорхой шийдсэн дэмжигчид түүнд байгаа.

Ерөнхийдөө өнгөрсөн хугацаанд бидний нэр дэвшигчдийн талаарх үндсэн ойлголт мэдээлэл шинэ содон мэдээллээр нэг их баяжсангүй. Үүнийг хэвлэл мэдээлэл, сурталчилгааны ажлын хүрээнд л тоймлож байна. Нэр дэвшигчдийн эх орноо тойрон давхиж хийсэн олон уулзалт амлалт, ярилцлага, гар барилтын ард бас их зүйл эргэж өөрчлөгдсөн биз ээ.

6

Одоо хатуухан хэлэхэд, хар мэдээний 7 хоног эхэлж байна гэхэд хилсдэхгүй. Хэн нэгнийгээ харь гарагийнхантай хуйвалдаж, энд тэнд хаус барьсан байна гэж ч нотолж магад. Хэн хэнийгээ юу ч гэсэн байлаа, миний ард түмэн аливаад авах гээхийн ухаанаар дутаж байгаагүй.

6

Намууд сурталчилгааныхаа хаалтын тоглолтоо хийх тойргоо гаргаж, цуглуулж авсан онооноосоо нэгийг ч алдахгүй байх, болж өгвөл нэмэх тактикийн хувилбараа хэрэгжүүлж эхэллээ.

Ард олон урьдын л адил шударга, цэвэрхэн л өрсөлдөөрэй дөө  гэсхийгээд харж л сууна.

6

П.Баярхүү /тоймч/