УИХ-ын гишүүд галт зэвсгийг хэрхэн зөв ашиглах, хяналт тавих талаар хэлэлцэж  нэлээд маргаж байна. 18 нас хүрсэн бол галт зкэвсэг эзэмших эрхтэй байхаар хуульчилсан нь гишүүдийн санал хураагдахад хүрээд байна. Орон нутгийнхан үүнийг дэмжиж байгаа бол хотоос сонгогдсон  хэсэг нь байж болохгүй. Хатуу хяналттай байх ёстойг сануулна. Хөдөөнөөс сонгогдсон гишүүд  хоттой мал руу чоно дайрвал, “Чи наанаа байж бай. Би цагдаагаас буугаа аваад ирье гэх үү. Тэгээд тэр цагдаа нь тэртээ 100 км-ын цаана байгаа шүү дээ. Малчин айл буутай байж болохгүй юу” хэмээн  ёстой ацан шалаанд оруулах зүйлээр шалгаана. Хуулийн төслийн ажлын хэсгийнхний тайлбарласнаар, яг ч тийм хатуу заалт хуулийн төсөлд байхгүй гэнэ. Онц, хүнд гэмт хэрэгт холбогдсон, эсвэл сэтгэл мэдрэлийн өвчтэй, нийгэмд аюул учруулж болох этгээдийн бууг бүртгэлийн журмаар хураан авах тухай заалт байгаа. Өөрөөр хэлбэл гэмт хэрэгт холбогдоогүй, эсвэл сэтгэцийн хувьд эрүүл, 18 нас хүрсэн Монгол Улсын бүх иргэн буу эзэмшиж болно хэмээн учирлах. Энэ хуулийг төслийг хэлэлцэхэд  хуралдааны танхимд нэг л айдас нөмөрсөн байдал давамгайлж байв. Арга ч үгүй сүүлийн үед нэгийгээ буудсан,  нутагт нэгт ах дүүс өөд өөдөөсөө буу шагайсан, иргэний хөдөлгөөнийхөн ямар ч хараа хяналтгүйгээр аж ахуйн нэгжүүдийн машин механизм руу буудсан гээд галт зэвсэгтэй холбоотой, эдгээрийг журамлах шаардлагатай болсныг гэрчилсэн. Харин нүүдэлчин ёс заншилд тохируулж зөв гарц олохгүй бол энэ хуулийн хувь заяаг шийдэхэд хүндрэлтэй болж байна. Өнөөдөр уул уурхай, томоохон үйлдвэр, банкны салбарынхан, хөрөнгөтэй хувь хүн галт зэвсэгтэй харуул хамгаалалтынхнаар хамгаалуулахыг хүсдэг. Хэдийгээр хууль бүрэн зохицуулалт байхгүй ч өнөөдөр байдал ийм л байгаа. Цаг үеэ дагаад галт зэвсгийн хуулийг сайжруулахгүй бол хууль бус хэрэглээ газар авч хар зах дээрх гараас гарт худалдаа байсаар байна. Мөн галт зэвсэг эзэмших зөвшөөрөл авсан зарим харуул хамгаалалтынхан буу, зэвсгээ  зориулалтын бусаар ашиглах тохиолдол олонтаа гарах болсныг Хууль зүй, дотоод хэргийн яамны Төрийн нарийн бичгийн дарга гишүүдэд хэлж байсан. Тухайлбал, уул уурхайн компанийнхан галт зэвсгээрээ хууль бус ан хийсэн тохиолдол хэд хэдэн удаа гарсан аж. Тэгэхээр шинэхэн хуулиар галт зэвсэгтэй харуул хамгаалалтынхнаар хамгаалуулах шаардлагатай обьектуудыг ялгаж өгөх аж. тэгэхгүй бол сургууль, цэцэрлэгүүд буу агссан дүрэм хувцастай харуул, хамгаалалт авбал хүүхдүүд хүссэн хүсээгүй айдаст автана. Ийм эмзэг, үндэсний аюулгүй байдалтай холбооттой нэгэн чухал удахгүй батлагдах нь. Өнөөдрийн байдлаар иргэдийн гар дээр 40 гаруй мянган галт зэвсэг  байгаа. Тэдгээрийн нэлээд хэдэн хувь нь байлдааны зориуулалттай гэхээр нийгмийг айдаст автуулахаар сонсогдож байна.