Найзынхаа утас руу залгалаа. Хааяа,  Хааяа сэтгэл сэмрэх юм ...гээд л С.Жавхлан дуулж байна. Энэ залуугийн дуу бүр нь чихэнд наалдацтай нэг л өөр байдаг. Анд руугаа залгахаар л энэ дуу явна. Дотор бачуу, стресстэй явахад  энэ дууг сонсохоор нэг зай гарах шиг, далд мэдрэмж төрнө. Тэгээд ч тэр юм уу шалтаг гарвал найз руугаа залгана. Дуу нь сайхан дуу, утсаа авахгүй жоохон удаасай...

_

Хань руугаа залгалаа. ...Намрын сэрүү унасан ч яахав дээ...Насаараа чи минь хажууд байх хойно гээд С.Жавхлан дуулж байна. Миний хөөрхий ханьдаа өдөр бүх хэлмээр байвч амждаггүй хэдэн сайхан үгийг энэ дуу хэлээд байх шиг санагдана. Хань минь надад ч бас сайхан үгсийг энэ дуугаар хэлээд байх шиг. Утсаа авахгүй жоохон удаасай, зурагтаар клипээр үзсэнээс яг ингэж ханийнхаа утас руу нь залгахад л энэ дуу явах нь сайхан байдгийн.

.

Ангийн охин руу /одоо бол бүсгүй л дээ/ залгалаа ...Алсад суугаа ээжий минь, амьсгаа даран алсыг ширтээстэй ...С.Жавхлан. Найзын минь ээж нь саяхан бурхан болцийн зайлуул, тэгээд энэ дуугаар эхийн ачийг хариулахаа умартаж, мөнх юм шиг санаж төөрч будилж яваа нэгэнд өөрийн бие сэтгэлээрээ, хагацал нулимсаар мэдэрсэн ухаарлыг дамжуулдаг байх. Уг нь ажил явдлаас өмнөхөн ...бурхнаас нуусан амраг ч бил үү, нэг тийм дуу тавьчихсан байсан санагдана. Утсаа авахгүй жоохон удаасай, ээжийн тухай сайхан дуу эгшиглээд байна.

 .

Энэ бол одоо цагийн бидний гар утасны серверээс авч болох хамгийн энгийн түгээмэл болсон  үйлчилгээ. Анд минь ч, авааль эхнэр минь ч, ангийн бүсгүй ч тэр С.Жавхлангийн тэр сайхан дуунуудыг надад бас бусдад өөрийн утсаар сонсгосныхоо төлөө өнөөх Мобикомдоо нэгжнээсээ хэдийг “суутгуулж” төлдөг гэдгийг би эхлээд анзаарч мэдээгүй юм. Охин “моби” барина. Би ч бас тэрийг нь нэг хэд хоног барьсан санагдана. Байсхийгээд л Hi Tоne тэгж хямдарлаа, ингэж хөнгөрлөө, энэ кодийг илгээгээд тэр дуугаа татаж аваарай гээд л урилга заллага мессеж тасрахгүй байсан санагдана. Ганц миний бор охинд биш өөрийнхөө тэмүүллээрээ Мобикомыг  хөтлөх гэсэн 2 сая гаран ард түмэнд энэхүү ая дуу татан авах урилга хүрч, тэр хэмжээгээр, дуу татах нэгэндээ илгээх, бэлэглэх гээд л нүсэр сүлжээ хамарсан  бизнес үл үзэгдэх орчинд, асар хурдтай явагдаж байдгийг бид зөвхөн төсөөлж л чадах юм. Эдийн засгийн агуулгаараа хэчнээн мөнгө байх вэ. Одоо хамгийн олон дуугаа хайр гамгүй татуулж, өөрөө ч сайн мэдэлгүй Мобикомын орлого үйлчилгээнд хувь нэмрээ өгсөн С.Жавхлан гавьяат гэхэд 300 сая орчим төгрөгт л ярьж байна.

 .

Хэдэн жилийн өмнө нэг Засгийн газрын үед Ерөнхий сайд нь ч билүү, Шадар сайд нь билүү “толгойлчихсон” өнөөх оюуны өмчийн газрынхантайгаа баг болж аваад Нарантуул зах дээр очсон. Тэгээд том шалгалт явуулж хүний дуулсан дуу, бүтээсэн кино буюу оюуны өмчийг хувилж зарж ашиг олдог байсан нөхдийг буланд шахаж, диск хуурцагийг нь хурааж жалганд хаяж, шатааж бөөн юм болсон. Гэтэл энэ тохиолдолд ганцхан дуучны дууг ашиглаад 300 сая төгрөг олчихоод байгаа Мобикомын “Монгол контент” гэдэг охин компанийг нь нэг удаа 2 сая төгрөгөөр торгож “айлгаж” байсан гэнэ. Хүчтэй, хүчгүйн ангиллаар ингэж л хууль үйлчилдэг нийгэмд амьдарч байна, бид. Одоо л олны анхааралд орж байгаа энэ оюуны өмчийн зарга өчигдөрхөн эхлээгүй бололтой. Анх хэл ам гарсан цагаас нь эхлэн Мобикомынхон энэ заргыг онцгой анхаарч хэдэн жил тойруулж,  бүдгэрүүлж, өөрийнхөө талд ашигтайгаар шийдүүлэхээр нөлөөлөх гэж оролдсоор байгаа талаар өмгөөлөгч нь цөхрөн ярьсан байна лээ. Мөнгөтэй энэ нүсэр компанитай С.Жавхлан тулдаа л нэг юм үзсээр байж энэ хүргэсэн байх. Тэрнээс мань ганц шүлгээ тавиулчихсан бол тэгсгээд ажлын л гарз гээд орхих биз. Ер нь бол энд зарга мөнгө гэхийн цаана Оюуны өмчийн хамгаалалт хуулийн үйлчлэлийг нь эргэн харахгүй бол болохоо байсныг хэлж өгч байна. Хүний оюуны бүтээлийг зөвшөөрөлгүй хулгайлж, хувилж борлуулж ашиг олж болохгүй гэж маш тодорхой хууль байлаа ч нэхэмжлэгч талд үйлчилж чадахгүй байна. Цоорхой ихтэй хуулийг ашиглаж томхон мөнгөтэй Мобиком зэрэг компаниуд үнэтэй хуульч, арбитруудаар өөрийн талд шийдвэр гаргуулж чадаад л байна. Жирийн иргэнд томдсон, том компанийн өмнө жижигдсэн ийм “жул” хуулиудаа эргэн харах болсон юм шиг санагдлаа.

 .

С.Жавхлан олон нийтэд бага жоохон, хөгшин хөвөө гэхгүй хүлээн зөвшөөрөгдсөн олон дуутай, зохиолын дууны салбартаа босоо залуу. Түүний дууг хэлд орсон балчраас таяг тулсан настан ч мэдэж, чихэр хүлхэх шиг аялж байдаг. Телевизээр шууд утсаар дуу захиалдаг дөрвөн оронтой утас яадаг билээ. Ачааллаа даахгүй, халж шатах шахдаг л гэсэн. Тэгэхэд хэдхэн нэгжээр С.Жавхлангийн хэдэн сайхан дууг нэгэндээ илгээх бол хэнд ч үнэтэй, цаг үрсэн ажил биш. Кодыг нь хийгээд Send товчлуур дараад ОК болно. Зөрөөд нэгж унана. Эдийн зэсгийн эргэлтэд орчихсон гэсэн үг. Ийм тодорхой зүйл дээр Мобиком яагаад нэхэмжлэлийг зөвшөөрөхгүй сунжруулаад байгааг гайхах хүн олон байна.

Утсаа битгий аваарай, гоё дуу шүү...гэж хэлэх С.Жавхлангийн фенүүд, Мобикомын хэрэглэгчид “саяараа” байгаа.

 .

Миний ТЭМҮҮЛЭЛ бол шударга нийгэмд амьдрах л байна. Дуучин С.Жавхлан болоод Мобикомын мянга мянган хэрэглэгч ч мөн  адил байх. Энэ тэмүүлэл маань Мобикомыг хөтлөх болтугай.

 .

Таны тэмүүлэл биднийг хөтлөнө-Мобиком. Энэ үг одоо Таны дуртай дуучны дууг хулгайлж, танд зарна-Мобиком гэж хэлэхээр болжээ.

 .

П.Баярхүү /тоймч/