Б.Энхтуяа бүсгүйн үхлийн талаар Малайзаас мэдээлж эхэллээ. Хэрэг болсон газраас нь болон бусад эх сурвалжуудийн тавьж буй энэ мэдээллээс бид юутай үлдэв. Ямар үнэн тодров. “Хохирогч амиа хорлосон юм байна. Хар тамхи ч хэрэглэдэг байсан байж болзошгүй. Нэг их таатай ажил хөдөлмөр эрхэлдэггүй байж. Эх орондоо байхдаа ч янз бүрийн асуудалд орооцолдчих гээд байдаг байсан” гэсэн мэдээллүүд гарлаа. Ерөнхийдөө сүүлийн хэдэн өдрийн мэдээллээр талийгаачийн талаар хар бараан дүр зураг л олон нийтэд буулаа.
.
Өнгөрсөн хугацаанд ээжийнх зүгээс охиноо бусдын дарамтад байсан талаар гаргаж тавьсан яриа, баримт сэлт нь бараг бүгд л худал, согтуу галзуу хүний тэмдэглэл, дэмийрэл болж үлдэж байх шиг байна. Эхлээд хэвлэлийнхэнд л ханддаг байж гэж харамсаж байсан ээж нь одоо тийм алхам хийгээгүйдээ баярлах болж байх шиг байна. Хэрвээ хандсан бол охиныг амьд сэрүүнд нь энэ мэтээр сурвалжлан бичээд хар тамхичин, хүн хог болж яваа гэж дэлгэн эргээд эх орондоо ирэх нүүргүй болгож ч магадгүй л байж. Нэг иргэнийхээ хүний нутагт амиа алдсан үнэн мөнийг тогтоохоор зардал мөнгө, сэтгэл зүтгэл гарган ажиллаж байгаа нэгэндээ хүндэтгэлтэй хандаж байна. Гэхдээ үүний хажуугаар энд үлдсэн бид үхсэн хүн үг хэлэхгүйн ард сүнс нь холдож амжаагүй нэгийгээ хараар будаж улсаараа нэг ярих хэрэг байгаа юм болов уу даа. Энэ хэрэг бусад залууст сургамжтай, дохиотой байж болно. Тийм болохоор мэдээлж ярьж байгаа байх. Гэвч ард нь үлдсэн гэр бүлийнхнийг нь бодоод уй гашуутай энэ үед нь элдэв хов, хар мэдээ гаргахгүй байвал болох л зүйл. Ганц энэ бус энэ мэт олон хүний зовлон хагацал дээр шар хар мэдээ хэмлэх бидний ёс зүй минь хаа хол гээгдсэн байх эмзэглэл төрүүлнэ.
.
Амиа алдсан бусгүйг монголдоо байхдаа л муу явдалтай байсан гэж бид эндээ мэдээлснээр Малайзын талд хүнээ буруутгах завшааныг олгож л байгаа хэрэг. Шалгагдаж байгаа хэрэг тул дэлгэрэнгүй зүйл хэлэх боломгүй гэсэн хэрнээ “Э” бүсгүйг буруутгах талын мэдээллийг хангалттай дэлгэрэнгүй хэлээд амжсан байгаа Малайз дахь интерполийн ажилтныг яс албаны хүн гэх үү, хүний хүн гэх үү.
_
Одоо байгаа шинэ мэдээллүүдээс харахад бүсгүй амиа хорлосон гэдгээрээ тогтоогдох юм шиг байна. Тэгээд энэ хэрэг явдалд буруутгагдаж байсан яам тамгын, хүчнийхний нэр цэвэршиж ажил амьдралаа хэвийн үргэжлүүлнэ.
_
Харамсалтай, хэн ч байлаа гэсэн нэг залуу бүсгүй буруу зам мөрөөр явж амиа алдлаа.
_
Амьд ахиудаа ээждээ ахдаа бичсэн мессэж, утасны дуудлага, өгүүлсэн учир зовлон бүхэн нь ганцхан хоногт утга учиргүй галзуу согтуу хүний аяглал байсан болж, үнэ цэнэгүй боллоо. “Өөрөөсөө л болсон юм байна, хар тамхичин байж” гэсэн дүгнэлтээр хүмүүсийн энэ хэргийн талаарх бодол, байр суурь эргэлээ. Аргагүй баримтанд бодит үнэн байдал ингэж буусан ч байж магадгүй. Гэхдээ л цаана нь олон түмний зэмлэл зэвүүрхэлд онилогдоод байсан зарим нэг албаныхан маш хурдан хэл амнаас бултаж чадлаа. Анх энэ хэргийн талаар ар гэрийнхэн нь мэдээлэхдээ хэн нэгнээс хариуцлага ч юм уу мөнгө нэхэх гээгүй, ийм л байна гэдгийг олон нийтэд хэлж сэрэмжлүүлэх гэсэн байх. Гэхдээ мэдэгдэл хийснийх нь хариуд чимээгүйд одсон охиных нь талаарх бараан мэдээ улс даяар маш хурдан тарлаа.
_
Үүний ард хэн үргэлжлэн зовж шаналах билээ. Хөөрхий ар гэрийнхэн нь ээж, ах эгч нар нь хар хэл ам, хов живийн шүлсэнд булуулна. Охиныхоо шарилыг авахаар хилийн дээс давсан тэднийг эргээд ирэхэд нь уй гашууг хуваалцах ойр дотныхон бас охиныг нь буруу мөртэй байсан гэж жигшин ярих хов живийн хар хэлтнүүд зэрэг тосох нь. Талийгаачийг нэг бол сайнаар дурс, үгүй бол бүү дурс гэж өвгөд маань хэлдэг дээ.
_
П.Баярхүү /тоймч/
| Уншиж байна |