Сонин гарчиглаж суутал “АТГ захиалгаар ажилладаг юм болов уу” гэсэн бодол толгойд эргэлдэв. Шударга, үнэний төлөө хуулийн дагуу ажиллах ёстой байгууллагыг ингэж хардсан нь хоёр ярилцлагаас үүдсэн хэрэг. Энэ өдрийн “Үндэсний шуудан” сонинд Эрдэнэс Тавантолгой компанийн гүйцэтгэх захирал асан Б.Энэбишийн “Өөх өгсөн хүнтэй өглөө босоод заргалдана гэдэг л болж байна” гэсэн гарчигтай ярилцлага нийтлэгджээ. Уг ярилцлагад АТГ-аас Б.Энэбишийг шалгаж байгаа гэдгээ огтхон ч мэдэгдээгүй тухай ярьжээ. Гэтэл АТГ-аас аль өнгөрсөн оны тавдугаар сараас Б.Энэбишийг 1.6 тэрбум төгрөгийн үнэ бүхий 10 ширхэг самосмал машин, чанарын шаардлага хангахгүй дугуй зэргийг эрх мэдлээ урвуулан ашиглаж “Эрдэнэс Тавантолгой” компанид худалдан авсан хэрэгт буруутган эрүүгийн хэрэг үүсгэн шалгаж эхэлсэн. Бүр интерполоор эрэн сурвалжилж байгаагаа АТГ-аас мэдээлсэн. Хуулийн байгууллагын мэдэгдэл, хэрэгт нэр холбогдсон хүн хоёрын мэдээлэл зөрүүтэй байгаагийн өөр нэг жишээ “Өдрийн сонин”-д нийтлэгдсэн байна. Тус сонинд Үндсэн хуулийн Цэцийн гишүүн Д.Сугарын ярилцлага гарчээ. Энэхүү ярилцлагад АТГ-аас түүнийг шалгаж байгаа эсэхийг тодруулсан сэтгүүлчийн асуултад Д.Сугар “Чи ийм юманд холбогдчихлоо шалгана гээд дуудсан газар, уулзсан хүн алга л байна. Би харин ч шалгуулж учраа олмоор байдаг” хэмээн хариулсан байх юм. Гэтэл Д.Сугарыг шалгаж, гадаадад нуусан үл хөдлөх хөрөнгө, оффшор дансыг нь илрүүлсэн гэж мэдээлсэн АТГ-ынхны шүлс ч хатаж амжаагүй байна.

.

Ийн эргэлзээ төрүүлсэн мэдээлэлд хачир нэмэх өөр нэг материал www.news.mn сайтад байна. “АТГ хэний заавраар хөдөлдөг вэ” гэсэн гарчигтай уг материалд АТГ-аас мэдээлэл хийх цаг хугацаа улс төрийн томоохон шоутай давхацдаг гэсэн утгыг илэрхийлжээ. УИХ-ын гишүүн Р.Амаржаргал намын нөхдөө шүүмжилж, Ерөнхий сайдад асуулга хүргүүлж байсан, УИХ дээр МИАТ-ийг хувьчлах асуудал яригдсан, МАН-ын зүгээс Сангийн сайд Ч.Улаан, Эдийн засгийн хөгжлийн сайд Н.Батбаяр нарыг огцруулах асуудлыг хэлэлцсэн зэрэг үйл явдалтай АТГ-ын мэдээлэл хийсэн он цаг давхцаж буйг дурджээ.

.

Тэгэхээр АТГ-т итгэж найдаж болох уу. Монгол Улсын хуулийн нэрийн өмнөөс үйл ажиллагаа явуулж, зөв бурууг ялгаж салгах ёстой төрийн байгууллага гүжир аргаар ажлаа явуулдаг уу. Эсвэл хэрэгт нэр холбогдсон нөхрийн өөрийгөө хамгаалах эцсийн арга нь гүрийлт үү. Хэдийгээр үүнийг тодорхой хэлэх боломжгүй ч зөвхөн өөрийнхөө тодруулбал мэдээлэл авах боломжийн үүднээс хууль хяналтын байгууллагууд ямар байдгийг хэлэхийг хүслээ. Өөрөөр хэлбэл, мэдээлэл өгч буй арга хэлбэрээс нь Монголын хууль хяналтын байгууллагууд ямархан дүр зурагтай байгааг харж болно. Зөвхөн өөрсдөө хүссэн үедээ л мэдээлэл өгдөг. АТГ-аас мэдээлэл хийнэ гэсэн сүржин даржин зартай мэдээллийн үеэр мөрдөн байцаалтын нууц гэх ойлголт огтхон ч падгүй. Бүр шүүхээс гэм буруутайг нь тогтоогүй байхад л гэмт хэрэгтэн мэтээр ялладаг хүмүүс нь сэтгүүлчид биш шалгаж хянадаг байгууллагынхан өөрсдөө гэдгээ анзаарах хэрэгтэй. Тэгсэн атлаа сэтгүүлчийн сонирхсон асуултад “шалгаж байгаа” гэхээс өөр хариулт өгдөггүй. Хуулийнхан хүссэн л бол хуулиар хамгаалагдсан хувь хүний нууц ч ил цагаан. Тэр хүний нэр төрд, хувийн амьдралд сэв суух байсан ч үл тоомсорлодог. Харин хүсээгүй цагтаа нууц гэсэн үгээр ам тагладаг нь бодит үнэн. Зөвхөн мэдээлэл өгөх дүр зураг нь ийм.

.

Гэтэл ажлаа гайхалтай хийж байгаа дүр зурагтай АТГ, арчаагаа алдсан авлигачин, идэж уугч нарын дундах гол буруутан нь хэвлэлийнхэн болж, чичлүүлдэг. АТГ-аас өгсөн шалгаж байгаа, шалгасан гэх мэдээллийг дамжуулсныхаа төлөө шуугиан таригч нэр зүүнэ. Мэдээллийн мөрөөр нэр холбогдсон хүнээс тодруулга авчихвал хов хөөцөлдөгч болчихно. Уг нь хэвлэлийнхэн мэдээлэх үүргээ л биелүүлсэн.

:

Өнгөцхөн харвал АТГ шиг ажлаа сайн хийж байгаа байгууллага байхгүй. Дарга цэрэг гэхгүй шалгаж, нууц далд бүхнийг нь илрүүлээд л, заримыг нь “аавынх” руу илгээж, ажил нь гялалзаастай. Гэвч хэн нэгнээс хараат бус, бие даасан гэдэгт нь эргэлзээ төрүүлэх хэрэг явдал мундахгүй их юм. Ер нь АТГ улс төрийн нам, бизнесийн бүлэглэлийн захиалгаар ажилладаг юм биш байгаа?!

:

В.Хэрлэн