Өнгөрөгч өдрүүдэд жирийн иргэд заавал сонсч өргөн олноор шүүн хэлэлцэх нэгэн ажлын санаачлага албан ёсоор яригдсаныг бид бараг анзаарсангүй өнгөрлөө. Дан, давхар дээлний асуудал буюу намуудын улс төржсөн шуугиан дор бага дунд орлоготой иргэд  урьдчилгаа төлбөрийн дарамтнаас гарч байртай болох боломжийн талаар Үүл даргын дэвшүүлсэн нэгэн зоримог төсөл нам дарагдах шахав. 8 хувийн гэх тодотголыг урдаа авсан ипотекийн зээл хэрэгжээд жил дамнан явж байна. Эрэлт ихтэй энэ зээл цааш үргэлжилж иргэдийг орон сууцжуулахад байрны үнийн өсөлт дээр нь урьдчилгаа төлбөрийн асуудал гол дарамт болж байгаа. Хотын удирдлага дахин төлөвлөлтийг эхлүүлсэн ч бодит үр дүн харагдах байдалд одоогоор тийм сүрхий мэдрэгдээгүй байна.

1

Харин өнгөрөгч энэ хавраас Үүл дарга хотынхныг хотжуулах олон санал төслийнхөө нөөцөөс анхаарал татахуйц нэг саналыг  гаргаж ирлээ. Санаа нь бол урьдчилгаа төлбөр өгөх боломжгүй иргэд орон сууцтай болох боломжийг олгож байгаа төсөл юм. Арга нь их энгийн. Та сар бүр өөрийн орлого цалингийн хэмжээ боломжоосоо хамааран тодорхой мөнгийг /180-200 мянган төгрөг/ хотыг барилгажуулах санд өөрийн нэрийн дансанд хийж 4-5 жилийн дараа хамгийн багаар 29 орчим ам метр нэг өрөө байртай болох боломжтой.

1

Төслийг хэрэгжүүлэх, иргэдтэй тулж ажиллах байгууллага нь Нийслэлийн орон сууцны корпораци. Энэ байгууллагад нийслэлийн барилга барих боломжтой хоосон газруудыг өгч байгаа бөгөөд энэ газар дээр барилга барих ажлыг эхлүүлэхийн тулд эхний ээлжинд 15 тэрбум төгрөгийн санхүүжилтийг төрөөс гаргахаар болж төсвөө батлуулсан байгаа. Энэ нь бодит үр дүнгээ өгвөл цалинтай, орлоготой ч урьдчилгаа төлбөргүй иргэд Нийслэлийн орон сууцыг дэмжих санд таван жилийн турш сар тутам мөнгө төлж байртай болох юм. Өөрөөр хэлбэл, урьдчилгаанд өгөх мөнгөө сар тутам орон сууц корпорацид өгч байшингаа бариулж дуусгах. Сар бүр 180 мянган төгрөгийг Нийслэлийн орон сууцыг дэмжих санд өгвөл таван жилийн дараа 29 ам метр нэг өрөө орон сууцны ордер өгнө. Хэрэв сар бүр 200 мянган төгрөг төлбөл таван жилийн дараа 49 ам метр хоёр өрөө байрны ордер авна. Үлдсэн төлбөрийг орон сууцанд орсны дараа сар бүр үргэлжлүүлж төлөөд 10 жилийн хугацаанд дуусгах боломжтой гэсэн төсөл.

1

Дундаж орлоготой түрээсийн байранд амьдардаг иргэдэд энэ төсөл ойрхон сонсогдох байх. Тэд сар бүр байрны түрээст 200 мянга байтугайг төлж байгаа тул орон сууцны 30 хувийн урьдчилгаа мөнгөө бөөгнүүлж чадахгүй явсаар байгаа. Ийм иргэд энэ төсөлд дуртайяа хамрагдаж түрээсийн байранд өгөөд байгаа мөнгөө орон сууцны санд өгч байртай болохыг сонгож ирээдүйгээ харсан алхам хийхэд бэлэн байна. Тэдэнд ганц л асуулд байгаа юм. Байрны ордероо авах хүртэл таван жил хаана амьдрах вэ. Хэрвээ сардаа 250 мянгыг өгөөд таван жил амьдрах халуун хүйтэн устай ахуй орчин цэвэрхэн түр байр байдаг бол сар бүр 200 мянгаа орон сууцны корпорацид өгөөд 5 жил хүлээх гэр бүл олон. Одоо орон сууц хөлсөлж байгаа иргэд хамгийн багадаа сард 450 мянган төгрөгийг байрны түрээст өгч байгаа юм. Энэ түр амьдрах орон байрны гачаалыг төр ямар нэг хэмжээгээр эхний удаад шийдээд өгвөл  түрээсийн байрны эздийн халаасанд орж байгаа мөнгө барилга бүтээн байгуулалтын санхүүжилт болж хэн хэндээ тустай ажил болно. Төрдөө итгэж сар бүр мөнгөө өгөх иргэн олон. Гэвч тэдэнд өнөөдөр амьдрах  байр орон гэдэг өөх уушигны яриа шиг асуудал болчихоод байгаад л бүх гацаа байна. Энэ гацаа гарвал Үүл даргын иргэдээ орон сууцжуулах уг төсөл жинхэнэ утгаараа биеллээ олно гэх санал дайж Үүл даргыг дэмжье, энэ төсөлд зүтгэе гэсэн иргэд олон байгаа.

1

Пүрэвжавын Баярхүү /тоймч/