Сайд нарын давхар дээлний хормойноос баахан нөхөд чаргууцалдан тайл, тайч гэж эрийг нь эгдүүцүүлж, эмийг нь ичээж байна. Иймээс аргагүйн эрхэнд Засгийн газрын танхим хамгаалалтын байдалд шилжлээ. Дээлийг тайлдаг юмаа гэхэд хөлсөө сэврээж, хатгаа авчихгүйгээр аятайхан тайлчихъя гээд байхад л “одоо тайл, тайч” гэж улайран дайрах юм. Улс төр гэж ингээд нэг увайгүйтэхээрээ юун галзуу Бумаа, согтуу Дондог гэдэг л болох юм даа. Засгийн газрын толгойд шидэх ийм нягт хэрнээ тун нарийн сүлжсэн нэхээсийг ганц Ерөнхийлөгч, бас ганц сөрөг хүчин дангаараа нэхчихэж чадахгүй. Энэ бол давхар дээлтнүүдийн хөлсийг сэврээх замаар давхар Засгийн газрыг тонгорч, үлдсэн жаахан юман дээр нь хоол зуушинд орох гэсэн хоёрдугаар ээлжийнхний хорхойсч, хамтарч нэхсэн урд нэхэгдэж байгаагүй тун нарийн сүлжээ нэхээстэй тор гэж улс төр судлаачид хэлж байгаа нь бараг үнэн биз.

6

Давхар дээлтэй сайдуудыг хусах замаар Засгийн газрыг доргиох нь өнөөдөр гэнэт яригдаагүй, аль хавраас хойш хөөрөлдсөн сэдэв болохоор иргэд нэг их тоохгүй байна. Одоо байгаа гишүүн-сайдууд их мөнгөтэй, нөлөөтэй улс, тэр хуулиа мөрдөгдөж эхлэх огноог дараагийн сонгууль хүртэл ухраачих аргаа олчихсон байгаа гэж олон нийтийн олонх харж, засгийг цаашаа юу хийхийг харж сууна. Хаврын турш завсарлаж амарч байхдаа үгсэж тохироо л биз, худлаа улс төр хийж Үндсэн хуулиараа л оролдох гээд байгаагийн оршил гэж хардах хэсэг ч байгаа юм. Энэ хуулиар Засгийн газар тарлаа гэхэд бид л хөөрхий эзэнгүй мэт хөлд нь хэсэг чирэгдэх байх, өөр ер нь тэд /гишүүд/ яах вэ дээ гэж нэг өвгөн энэ талаар ярихыг ч хүсэхгүй байгаагаа хэлж байна. Улстөрчдөд гомдсон зарим нь энэ 76 бүгдээрээ дан давхар дээлээ тайлаад тарчихвал шулуухан юм гэж эгдүүцэх иргэд ч байна. Улс төр дэх аливаа сонин содон үйл явц хэт гэнэтийн биш л бол хэрхэн өрнөөд яаж төгсөх, юу зөгнөөд байгааг нь иргэд бараг урьдчилаад хэлдэг болсон байна. Дээрээ төртэй байх, тэр төр нь тунгалаг цэвэр, голч шударга байхыг ард түмэн хүсдэг.

6

Ард түмэн аливаад голыг нь олж хэлдэг. Давхар дээлийг тайлах дээр дуу нэгдсэн байгаа МАН болон бусад төлөөлөл Үндсэн хуулийн гажуудлыг засах, засаглалын зөв замналын төлөө байна уу, тоосон дундаас хөл харж Засгийн газрыг унагааж, тогтворгүй байдал бий болгох замаар иргэдийн бухимдал, ядуурал дээр дөрөөлөн ирэх сонгуульд олонх болох эхлэл гэж үзэж байна уу. Ердөө л энэ асуултын 100 хувьтай тэнцэх хариултыг олохоор олон нийт үйл явдлыг ажиглаж байгаа. Үүн дээр МАНАН-г үлээн сарниаж, шударга ёсыг тогтооно гэсэн МАХН, МҮДН-ын бүлгийг асуудалд хэр шударга хандах эс бол бөөрөнхийлөн бултах эсэхийг харья гэж суугаа. Н.Энхбаяр гэж хүний ясаа цайтал тэмцэж байж босгосон фонн дээр нэр дэвшиж, жагсаалтаас зүүгдэж гарч ирсэн “Шударга ёс” эвслийн улстөрчид 2 жилд яаж төлөвшсөн аль хүчин нам руу хазайсныг одоо харж, дүгнэх боломж гэж олон түмэн цэгнэж байгаа.

6

Давхар дээлний цаана олон хүний давхар санаа, улс төрийн  нүүдэл ил харагдах юм.  Бас Монголын төрд нүүрлэсэн засаглалын гажуудлыг засч залруулах ямар амаргүй, бараг оройтсон болохыг энэ бүхний эцэст ард түмэн харах юм. Засгийн газрын тухай хуульд нэмэлт өөрчлөлт орж тэр нь батлагдсан өдрөөс мөрдөгдөж эхэлбэл Засгийн газрын танхим ханхайгаад ирнэ. Үүнийг дагаад одоо хоосон оргиод эхэлчихсэн байгаа төр бодитой хямарна. Хөлд нь ард түмэн чирэгдэж хоёрдугаар ээлжийг хоолны ширээндээ заларч, дараагийн сонгууль хүртэл дахин шинэчлэл гээчийг хэрхэн хийхийг тэвчээртэй  харах хэрэгтэй болно.

7

Өөдрөгөөр харья ч гэсэн манайд засаг солигдоход уламжлал залгамж бодлого гэж байдаггүй. Үгүйсгэл, агуу их үгүйсгэл бас дахин үгүйсгэл, түүнийг засах ээлжит шинэчлэлийн бодлого, эцэст нь сонгууль дөхөхөд бүхнийг зөвтгөх популизм л үлдсэн байдаг.

7

Пүрэвжавын Баярхүү /тоймч/