Даарсан ч яахав хэмээгээд дан дээлтэйгээ гарсан Х. Баттулгын орыг залгах сайдыг УИХ-ын гишүүн Ш.Түвдэндорж байх юм гэж АН-ынхан зүтгүүллээ. Энэ нь дэмжигдвэл Ш.Түвдэндорж УИХ-ын гишүүн, Засгийн газрын гишүүнийг хавсран гүйцэтгэх ба ингэснээрээ Засгийн газар хуучнаараа давхар дээлтнээ дархлах юм. Хаврын чуулганыг эхнээс нь чөдөрлөсөн дан, давхар дээлний хууль, Сайд нарыг сугалах сугалахгүй асуудал халуун зуныг дамнан чуулганы топ сэдэв болж үргэлжлэх нь тодорхой боллоо. Намаасаа дэмжигдэж сайдад сарвайж байгаа хүнийг цаашаа гэж ил түлхэх хүн гараагүй ч “өөр хүн танай намд алга уу” гэсэн егөө асуултыг сөрөг хүчин тавьж байгаа. Ш.Түвдэндорж гишүүнийг ёстой энэ салбарын хүн биш гэж шүүмжилж байгаа нь нөгөө талдаа сайд хийж чадахгүй хүн гэсэн үг биш. Түүний эзэмшсэн мэргэжил, эрхэлж байсан албан тушаалыг нь харахад үйлдвэр, хөдөө аж ахуйн салбартай огт хамааралгүй, энэ салбараар ойрхон ч орж гарч яваагүй нь үнэн байх. Гэхдээ сайд бол улс төрийн албан тушаал мөн тул тариа ногоо хадуур комбайны асуудлаас гадна томилолтын үр дагавар нь улс төрд эерэг тусч байвал бас сайн. Ямартай ч, хэрвээ Ш.Түвдэндорж сайд болбол давхар дээлээ тайлья гэсэн Ерөнхийлөгчийн санаачилгын хариуд өгөх бас нэгэн хэгжүүн хариулт болох юм. Сайдад нэр дэвшүүлсэн тухай бол Х.Баттулга гишүүн ерөнхий сайдтай “сайндья” гэж Ш.Түвдэндоржоо өргөн барьсан уу, том яамны сайдын хаялгыг фракцдаа хадгалан үлдэх гэж улайрсан уу. Улс төр мэдэх хүмүүс энэ асуултад нам доторх тэмцэл үргэлжилж байгаа гэж товч хариулж байна.

f

Монгол Улсын Ерөнхийлөгч Ц.Элбэгдорж Монгол Улсын Засгийн газрын гишүүн, Үйлдвэр, хөдөө аж ахуйн сайдаар УИХ-ын гишүүн Ш.Түвдэндоржийг томилох асуудлаар зөвшилцөхийг хүссэн Ерөнхий сайд Н.Алтанхуягийн албан бичигтэй танилцаад хариугаа илгээжээ. Уг хариу албан бичигт Монгол Улсын Ерөнхийлөгч өөрийн байр сууриа тодорхой илэрхийлсэн буюу давхар дээлийг тайлах байр сууринаасаа асуудалд хандаж буйгаа илэрхийлжээ.

f

Ерөнхийлөгч Ц.Элбэгдорж хууль тогтоох болон гүйцэтгэх байгууллагын хоорондын эрх үүрэг, хариуцлага, хяналтын тогтолцоог тодорхой болгон зааглах ажлыг энэ удаагийн томилгооноос эхлэх нь зүйтэй гэж үзсэн байна. Иймээс сайдын албан тушаалд УИХ-ын гишүүний нэрийг давхардуулан дэвшүүлэхгүй байх нь зүйтэй гээд Засгийн газрын гишүүнээр УИХ-ын гишүүнийг томилох тухай Ерөнхий сайд Н.Алтанхуягийн саналаас татгалзаж буйгаа илэрхийлжээ. Мөн Засгийн газрын гишүүнийг шинээр томилох саналыг дахин зөвшилцөхийг хариу бичигт дурджээ. Энэ нь төрийн эрх үүргийн гажуудалд хийх засварыг давхар дээлтэй болчих гээд байгаа Ш.Түвдэндоржийн томилгоог буцаахаас эхлээч гэж зөрүүд Засгийн газарт Ерөнхийлөгч дахин зөвлөсөн хэрэг боллоо. УИХ энэ долоо хоногт Үйлдвэр хөдөө аж ахуйн сайдыг томилж, Эдийн засгийн хөгжлийн сайдыг огцруулах асуудлыг хэлэлцэнэ. Тодруулбал, АН-ын Гүйцэтгэх зөвлөлөөс нэр дэвшүүлж буй УИХ-ын гишүүн Ш.Түвдэндоржийг Үйлдвэр, хөдөө аж ахуйн сайдад томилох асуудлыг МАН-аас өргөн барьсан Эдийн засгийн хөгжлийн сайд Н.Батбаярыг огцруулах асуудалтай дараалуулан хэлэлцэхээр байгаа. Товчхондоо зургаадугаар сарын улс төр дахиад л сайдын суудал, сандалын хэрүүл маргаанаар эхэлж байна. Энэ талаасаа зургаадугаар сарын улс төр ард олон ч тийм ч зугаатай байхгүй бололтой байна.

f

Н.Батбаяр сайдыг огцруулах асуудлаар улс төрийг халааж байгаа МАН-ын хувьд санаа нь зөв ч цагаа олоогүй улс төр боллоо гэж үзэх хүмүүс байгаа юм. Эдийн засгийг эрчимжүүлэх 100 хоногийн тогтоолыг МАН дэмжсэн хэрнээ Засгийн газрын сүүлэн дээр нь чулуу тавьж хүндрүүлэх гээд байгаа нь ийм ч сайхан улс төр биш гэж зарим хэсэг шүүмжлэлтэй хандаж байна. Н.Батбаяр гэдэг сайд салбараа унагааж байгаа нь үнэн байж болох ч үзээд алд гэж дэмжсэн 100 хоногоо ч хүлээлгүй, хариуцлага тооцохоор бужигнуулж Засгийн газрыг үндсэн ажлаас нь хөндийрүүлэх нь олны сэтгэлд нийцэх алхам биш. Одоо харин МАН ард түмнээ бодоод засгийг тогтвортой ажиллуулахын төлөө гэж учирлаад Н.Батбаяр сайдыг огцруулах саналаа татаад авчихвал ард түмнээс бөөн нэмэх оноо, бонус хураах магад.

f

Сайдыг сугалах тийм ч хэцүү биш ухаантай нэг нь өөрөө гараад явчихдаг болсныг хаврын улс төр харуулсан. Харин ам.долларыг аргамжиж эдийн засгийг сэхээх амаргүй болсныг бүгд мэдэрсэн. Одоо жирийн хүмүүс бараг цөхрөх гээд байна. Энэ бүхний эцэст Засгийн газрыг 100 хоногийн ажлаа базаж дууссаных нь дараа 2 жилийн ажилд нь үнэлгээ өгч чангахан дуугарахаар ард олон хүлээж байна. Эрчимтэй арга хэмжээтэй 100 хоногийнхоо дараа үнэхээр даахгүй байгаа сайд нараас булууных нь ясыг хурааж авах ажлаа Ерөнхий сайд өөрөө санаачилж хийх хэрэгтэй юм.

f

Зуны улирал жирийн амьдралд зугаатай сайхан байх ёстой. Гэхдээ улс төр хийж зугаацах цаг бол одоо биш.

f

Пүрэвжавын Баярхүү /тоймч/