Бас хэрээ ч баярлана. Ер нь бол хэцүү цаг үеийг далимдуулж, хүчээ сэлбэж байгаа амьтныг араатан талаас нь бодвол буруутгах аргагүй ч эзэн нь малаа барж байхад нохой нь зоолж байгааг сайрхах зүйл биш. Цэвүүн цагийг далимдуулж гаргадаг амьтны тэр араншинг хүний нийгэмд өнөөдөр МАН-ынхан гаргаж байна. Эдийн засгийн байдал хүндэрч, Н.Алтанхуягийн Засгийн газар урд хормойгоороо хойдохоо нөхөж, дээсэн дөрөөн дээр дэнжигнэж байхад МАН-ынхан түлхэж унагах аргаа хайх болов. Ах намынхны аман дээр мөнхийн бэлэн байдалд байдаг “Ард түмний төлөө” гэх үгэндээ хүрдэг байсан бол өдийд асуудлыг арай өөр өнцгөөс харах байсан. Ядаж л Монголын ард түмний төлөө хамтран ажиллаж байгаа дүр эсгэх байлаа. Гэвч дараагийн сонгуулийн нүхээ малтаж, АН-ыг дэвслэх аргаа эрэлхийлж байна. Угтаа бол энд АН, МАН гэх улс төрийн хүчин ямар ч хамаагүй. АН эсвэл МАН гэсэн нэрээр ард түмэн хоол хийж идэн, хөнжил болгон хөдрөхгүй. Зөвхөн Засгийн газар гэх улс төрийн бүтэц чухал. Засаг унаж, сайн сайхныг авчирч байсан түүх бидэнд байхгүй. Нэг нь унаж, нөгөө нь эмхлэгдэн байгуулагдах гэсээр улам л туйлддаг гашуун туршлага бол бий.

.

Эдийн засаг хүндэрсэн нь үнэн. Эдийн засгийн хөгжлийн сайд Н.Батбаяр хямраагүй гэж хичнээн эсэргүүцээд ч, Н.Алтанхуяг туйлдаагүй гэж цээжээрээ хамгаалаад ч нэмэргүй, тодорхой асуудал. Ам.долларын ханш нүдний өмнө өсөн нэмэгдэж, төгрөг туйлдаж байгааг хааж халхлах боломжгүй бодит үнэн. Тэглээ гээд энэ улам уруудана гэсэн үг биш. Тэнгэр нэг өдөр бүрхлээ ч нөгөө өдөр цэлмэдэг. Мөнхийн харанхуй, бүрхэг байх мэт аашлах МАН-ынхныг “Муу хүний амнаас мангас” гэхээс өөр зүйрлэлгүй. Үнэндээ бол МАН-ынхан муу амлахаас өөрийг хийж чадахгүй. Улс төрийн хүрээнд бүрэн ганцаардсан учраас тэр. Парламентад суудалтай намууд тэднийг хэн гэдгийг мэднэ. Хамтарч байгаад ар хударгаар нь юу хийснийг АН мартаагүй. Нэгэн дээвэр дор байгаад хоёр тийш болсон МАХН ч ялгаагүй. Саяхан МАХН, МҮАН-ын “Шударга ёс” бүлгэмийн мэдэгдэл гаргажээ. Мэдэгдэлд “МАН-ынхаар бол Монголд болж бүтэж байгаа юм нэг ч алга. МАН улс орноо мундаг хөгжүүлж байтал АН тэргүүтэй эвсэл гарч ирээд сөнөөчихсөн мэтээр бүхнийг харлуулан үгүйсгэх явуургүй арга хэрэглэж байна... МАН засаг төрийн бүх асуудалд тээг саад болохыг чармайж байгаа нь улс орны хөгжил дэвшилд гай болж байна” гэжээ. Мэдээж АН-тай хамтарч байгаа өнцгөөс харвал энд ач холбогдол өгөөд байх зүйл биш. Нөгөө талаар МАН-тай хамтарч засгийн эсрэг хөдлөх нам, эвсэл байхгүйн жишээ. Ингэж ганцаардаж, хүчгүй болсон МАН аргаа барахдаа үйлдвэрчний эвлэлийг барьж авлаа. Ерөнхий сайд, УИХ-ын даргад хүргүүлсэн мэдэгдлийг нь дэмжиж байгаа царай гарган, иргэдийн хамгийн том нэгдэл болсон үйлдвэрчний эвлэлийг бамбайгаа болгохоор шийдсэн бололтой. Тиймдээ ч МАН-ын бүлгийн дэд дарга Д.Оюунхорол МҮЭХ-ын ерөнхийлөгч Х.Амгаланбаатарыг хүлээн авч уулзан, Засгийн газрын баримтлах ёстой чиглэлд санал нэгтэй байгаагаа илэрхийлж, гал халуунаар гар барилцав. Д.Оюунхорол МҮЭХ-ны дуртай сэдэв болох цалин нэмэх шаардлагыг Засгийн газарт удаа дараа тавьснаа дуулгахаа ч мартсангүй. Товчхондоо бол МАН үйлдвэрчний эвлэлийн байгууллагыг өгөөш болгон ашиглаж, баригдахгүй байгаа загасыг дэгээдэх гэж санаархаж эхлэв.

.

Үйлдвэрчний эвлэл олон талаар МАН-д тусалж чадна. Цалин нэм, нийгмийн халамжийг сайжруул гэж жагсах дуртай үйлдвэрчний эвлэлийнхний ам нь ч, арга барил нь ч МАН-ынханд ашиг тустай. Дэмжиж, хамтарч байгаа нэрээр үйлдвэрчний эвлэлийнхнээр талбай дээр жагсаал хийлгэж, “Ард түмний төлөө” гэх үгээ лоозон болгох өдөр ч ирж магадгүй. Хүний гараар могой бариулах тактикаа үйлдвэрчний эвлэл дээр турших нь нэгэнт тодорхой боллоо. Харин бусдын хийх гэж оролдож байгаа ажлыг харлуулах үйл явц нь төгсгөлгүй үргэлжлэх нь тодорхой. Уул уурхайн сайд  Д.Ганхуяг, Эдийн засгийн хөгжлийн сайд Н.Батбаяр, Ерөнхий сайд Н.Алтанхуяг нарын нэгийг зайлуулах замаар засгийг өм цөм болгох нь тэдний зорилго. Энэ ч үүднээсээ Эдийн засгийн хөгжлийн сайд Н.Батбаяраар туг тахихаар болов. Энэ оролдлого нь бүтсэн ч, эс бүтсэн ч дараагийн ээлжинд Н.Алтанхуягт шахалт үзүүлж эхэлнэ. АН-ын дарга эсвэл хувь хүн Н.Алтанхуягт МАН-ынхан хэрхэн хандах нь бидэнд падгүй асуудал. Зөвхөн Засгийн газрын тэргүүн Н.Алтанхуяг эхлүүлсэн ажлаа дуусгах, байг гэхэд байдлыг улам дордуулахгүй байх үүргээ гүйцэтгэх ёстой.

.

Харин Н.Алтанхуягийг баалж, Засгийн газрыг унагалаа хямарсан эдийн засаг сэхэл авч, зогссон хөгжил хөдөлж эхлэх нь юу л бол. Улсын нэгдсэн төсвийн орлого 1.5 их наяд төгрөгөөр тасарч, төсвийн урьдчилсан гүйцэтгэлээр төсвийн алдагдал 1.3 их наяд төгрөг буюу ДНБ-ий 7.5 хувьд хүрсэн гэнэ. Хасах үзүүлэлт гарсанд Н.Алтанхуяг буруутай. Тэглээ гээд сэг үзсэн хар хэрээ мэт гуагчих нь хүнд байдлаас гарах арга зам биш. Харин ч бүр дордуулах муу ёрлол.

.

Н.Алтанхуяг “МАН ажил хийлгэхгүй байна” гэж хэлж байсан удаатай. Бас “Та нарын ялгадсыг цэвэрлэхэд их цаг зарцуулж байгаа” гэж бухимдлаа илэрхийлж ч үзсэн. Энэ нь түүний өөрийгөө хамгаалах гэсэн арга ч байж болно. Гэвч МАН-ын улс төрийн ашиг сонирхол улс орны асуудлаас хэтэрхий дээр юм. "Ард түмний төлөө" гэх үг нь ашиг харж, араа бодож байна гэж хэлж байгаа мэт сонсогдож байна.

.

В.Хэрлэн