Хурд группын барьж байгуулсан Рапид харшийн байр хулганатай гэвэл та итгэх үү. Бүр есөн давхрын айлд хулгана гүйлддэг гээд бод доо. Гараж эсвэл нэгдүгээр давхарт бол айж цочоод өнгөрөхсөн. Гэтэл дээд давхрын бүр тодруулбал 29 дүгээр байрны 37 тоотод мэрэгч амьтан гүйлдэж байгааг Рапид харшийг бүтээн байгуулагчид хэрхэн тайлбарлах нь сонирхол татах асуудал. Харин “Цэнгэлдэх өргөө” СӨХ-ныхон бол “угаасаа хулганы голомтон дээр баригдсан барилга. Тэгэхээр ямар ч арга байхгүй” хэмээн хэнэггүй царайлна. Тэгэхээр Хурд компанийнхан энэ газрыг хулганы үүр голомттой гэдгийг мэддэг байсан гэсэн үг. Хэзээ нэг өдөр хэн нэгэн оршин суугчийнх нь гэрт хулгана гүйлдэж, хүүхэд багачуудыг айлгаад зогсохгүй, элдэв халдварт өвчний эх үүсвэр болж болзошгүйг мэдсээр байж харшаа барьчихсан болж бараг таарлаа. Байшингаа анх барихдаа л нүдэн балай, чихэн дүлий байсан хүмүүс хор цацаж, хавх тавиад ч тасрахгүй байгаа хулганын үүр уурхайгаа үл тоомсорлох нь мэдээжийн хэрэг биз. Энэ бол “Хурд” группын барьж байгуулсан Рапид харшийн нууц үүцийн зөвхөн эхлэл нь.

1

Хамгийн сүүлд Рапид харшаас илэрсэн бас нэг “но” нь байрны метр квадратын асуудал. “Хурд” группынхан мөн л метр квадратаас хумсалчихсан. Мэргэжлийн байгууллагаар хэмжилт хийлгэсэн 18 айлын байрны метр квадратаас дутсаныг холбогдох байгууллагаас мэдээлсэн. Гэтэл “Хурд”-ынхан хүлээн зөвшөөрөхгүй, өөрсдөө хэмжилт хийсэн гэнэ. Хачирхалтай нь байрны метр квадратаас дутсаныг хүлээн зөвшөөрөхгүй байсан компани таван айлын гомдлыг шийдвэрлэсэн гэнэ. Рапид харшийн байрны метр квадратаас хумсалснаа өөрсдөө баталсан гэсэн үг. Одоо цаана нь 13 айлын гомдол байгаа аж. Нийт 4600 айлын хэдийг нь ийм аргаар шулсныг хэмжилт хийж л мэдэх боломжтой. Анх метр квадрат нь ам.доллароор үнэлэгдсэн. Сүүлдээ метр квадратынх нь үнэ хоёр сая төгрөг давсан ч өсөн нэмэгдсэн үнийхээ хэмжээнд хүрэх баталгааг, чанарыг “Хурд” групп өгч чадсангүй. Чамгүй өндрөөр үнэлэгдсэн зүйл чанартай байх ёстой. Товчхондоо бол үнэ дагаж чанар гэдэгсэн.

1

УИХ-ын гишүүн Б.Чойжилсүрэнгээр овоглодог “Хурд” группын барьсан Рапид харшид яригддаг өөр нэг асуудал нь зэвтэй ус. Нэг, 24, 25, 26, 27 дугаар байрны иргэдийг анх ороход л ус нь зэвтэй байсан. Өнөөдөр ч ялгаагүй. СӨХ-ынхон бүр цаашлаад "Хурд"-ынханд хандаад ч тусыг олоогүй. Зэвтэй уснаас болж хүүхдийн биеэр тууралт гарах, ханиад томуу тусах, арьс хуурайшиж загатнах, харшил тусах зэргээр эрүүл мэндээрээ хохирч байгаа иргэдийг үл тоомсорлосон хэвээр л байна. Айлд нь хулгана гүйлдэх, крантаар нь зэвтэй ус гоожих, алга дарам ч ногоон байгууламжгүй, машины зогсоол хомс гэх мэтээр Харшийг гутаах зүйлс энд мундахгүй их бий.

1

Анх баригдахдаа л газрын маргаан дагуулж эхэлсэн Рапид харшийг тойрсон асуудал дуусахгүй. Төв цэнгэлдэхийн ойр орчмын талбайн гуравны хоёрыг эзлэн байрладаг энэ хорооллын газрын асуудлыг сөхвөл чамгүй нууц илэрнэ. Төв цэнгэлдэх хүрээлэнгийн өнөөгийн эзэн Т.Нямдаваа ч холбогдоно. Т.Нямдаваа цэнгэлдэхийн газраас "Хурд" группт зарсан байж болзошгүй гэх мэтийн таамаг цааш үргэлжилж, хөдөлшгүй үнэн болохыг үгүйсгэх аргагүй.

1

В.Хэрлэн