Эдийн засгийг эрчимжүүлэх 23 төрлийн арга хэмжээ авах төлөвлөгөөг Засгийн газраас боловсруулж олонд зарлалаа. Үндэсний үйлдвэр, дотоодын аж ахуйн нэгжийн тогтвортой үйл ажиллагааг хангах, үүнд жижиг бизнес эрхлэх зөвшөөрлийг хөнгөвчлөх, татвар, түрээсийг тодорхой хугацаанд тогтвортой байлгах арга замыг судалж шийдвэрлэх, дунд хэмжээний компаниудын бизнес эрхлэх орчинг сайжруулж, тэдгээрт зээлийн болон зээлийн даатгалын дэмжлэг үзүүлэх, бичил, жижиг, дунд бизнесийн хөгжлийн санхүүжилтийн арга хэлбэрүүдийг боловсронгуй болгох чиглэлээр Засгийн газар, Монголбанкны үйл ажиллагааг уялдуулах зэрэг нэлээдгүй зүйл төлөвлөжээ. Харин тогтоолын төсөлд байгаа дотоодын үйлдвэрчлэгчдийн тэр дундаа жижиг, дунд бизнес эрхлэгчдийн үйлдвэрлэсэн барааг төр худалдаж авах тухай дэмжүүштэй санаа харагдаж байгаа. Банкинд зээлтэй иргэн Доржийн хийсэн ажлын бээлий байгаад байхад солонгосын үнэтэй ажлын бээлийг сонгоод шахаа хийчихдэг төрийн нөхөд байдаг нь үнэн. Үүний цаана чанарын асуудал яригдах боловч тэдний бүтээгдэхүүнийг бид худалдан авч мөнгө урам өгч байж л тэд цаашид өрсөлдөх хэмжээнд үйлдвэрлэгч болж хөгжих юм. Үйл ажиллагаа, үйлдвэрлэлдээ их хэмжээний бараа, материал худалдан авдаг төрийн байгууллагууд болон төрийн өмчийн оролцоотой аж ахуйн нэгжүүд Монголд үйлдвэрлэдэг бараа, бүтээгдэхүүнийг худалдан авдаг байх, ингэхдээ дамжуулан зуучлагчгүйгээр үйлдвэрлэгчээс шууд авдаг болох эрх зүйн орчинг бүрдүүлнэ гэсэн энэ зорилтыг яаравчлан хэрэгжүүлэх ёстой юм. Энэ бол эдийн засгийг өнөө маргаашгүй эрчимжүүлэхэд тийм их харагдах нөлөөтэй биш ч цаагуураа том хаялгатай ЖДҮ-д үзүүлэх бодитой дэмжлэг болох юм.
5
Засгийн газрын тогоолын төслийн төсөлд төсвийн орлогыг бүрдүүлэх, хууль тогтоомжийн биелэлтийг хангах нэрийн дор хувийн хэвшлийн аж ахуйн нэгжүүдийн үйл ажиллагаанд хэт дарамт учруулсан, давхацсан хяналт шалгалтыг хийхгүй байх, хяналт шалгалтыг зөвхөн эрсдэлд суурилсан зарчимд хийж байхаар тусгах тухай ч дурдсан байна. Гэхдээ энд нэн ихээр анхаарч тусгах ёстой зарим зүйл орхигдсон байх шиг байна.
5
Төрийн өөрийнх нь нүсэр үрэлгэн байдал, үр ашиггүй төсвийн зарцуулалт, цагаан захтнуудын хулгайгаар найз нөхдийн хэлцлийн түвшинд завшигдаж байгаа мөнгийг хамгаалах төсвийн зарцуулалтыг хянах талаар тодорхйлон зааж оруулах ёстой. Давхар дээлний асуудал тавигдаж ирэх саруудаас Засгийн газар дэнжигнэж магадгүй гэсэн таамаг сургаар төсвийн хөрөнгөнөөс амжиж завших гэсэн зангиатай луйварчдын элдэв арга мэх идэвхжиж болохыг ч анхаарах хэрэгтэй юм. Энэ талд хийх хяналт шалгалтыг нэмэгдүүлэх талаар тогтоолд тусгах заавал ёстойг намын бүлгүүд хэлэлцэхдээ анхаарах биз. Учир нь төсвийн хөрөнгөнөөс хулгайлж завших нь хэдхэн 100 саяар биш хэдэн тэрбумаар, сургууль цэцэрлэг хороолол босгочих мөнгөөр яригддаг болоод байгаа нь ядарсан эдийн засагт том нэрмээс болж байгааг ярих ёстой.
5
Ер нь бол эдийн засаг ингэж сульдаад байгаа нь нүүрсний үнэ өсөхгүй байгаа, Оюутолгой доллар оруулж ирэхгүй байгаадаа ч биш юм. Бүх шатанд авилга сүлжилдэж төсвийн мөнгө буруу гараар орж улс төрийн намуудыг санхүүжүүлэгч хэдэн бүлэглэлийн булаацалдаан болсны цаад сүүдэр ил гарч байгаа юм. Мэдээж ийм зүйлийг Засгийн газар тогтоолдоо оруулж намын бүлгүүд хэлэлцэхгүй л байх. Энэ Засгийн газар ард түмэнд таалагдах сайшаагдах олон ажлыг хийж эхлүүлсэн. Харин одоо эдийн засаг яагаад унасныг зөв оношилж ард түмэнд өөрсдийгөө сурталчлахаа жоохон азнаж, эдийн засгийг өндийлгөх алхмуудыг нэн түрүүн хуруу даран хийж эхлэх ёстой.
6
Ам.долларын өсөлтөөс гар дээр авдаг мөнгө нь өдөр бүр үнэгүйдэж байхад ажлын байр нэмэгдэж үүгээр цалинтай орлоготой иргэдийн тоо бодитой өсч байна, бондын мөнгөө том үйлдвэрүүд барихад өгчихсөн, удахгүй экспортоос доллар цутгана гэж сурталдах нь өнөөдрөө аргалж яваа ядарсан олны чих рүү яагаад ч орж өгөхгүй байгааг эрх баригчид мэдрэх ёстой. Засгийн газар одоо сурталчилж биш хийж, шийдэж ажиллах ёстой цаг үед тулж ирээд байгааг улс төр, эдийн засаг, нийгмийн амьдралд өрнөөд буй олон үйл явц хэлж сануулж байна.
5
Засгийг огцрох тухай сураг иргэдэд сайн юм авчрахгүй тул эрхэм гишүүд эдийн засгийг сэхээх арга зам дээр түлхүү суувал сайн байгаа юм.
4
Пүрэвжавын Баярхүү /тоймч/
| Уншиж байна |