МАН-ын бага хурал өнөөдөр хуралдаж, Ерөнхий сайдад нэр дэвшигчээ тодруулна.  Тус намын Удирдах зөвлөл өчигдөр орой хуралдаж, Ерөнхий сайдад нэр дэвшигчийг бага хуралдаа оруулж ирэхээр хэлэлцсэн боловч шийдэлд хүрч чадалгүй өнөөдөр үргэлжлүүлэхээр болсон.  

Дараагийн Засгийн газрыг бүрдүүлэх асуудалд МАН-ынхан нухацтай хандаж байгаа гэж сайнаар харж болох хэдий ч нэгэнтээ олон нийтийн нүдэн дээр өрнөж буй албан тушаал, эрх мэдлийн төлөөх бүлэг, фракцуудын хагарал даравч далдай, булавч бултайж байгаа хойно, яалтай билээ.

Тэр дундаа Удирдах зөвлөлөөсөө эхлээд Ерөнхий сайдад нэр дэвшигч дээрээ тохирч чадахгүй байгаа нь нууц биш. Удирдах зөвлөл Ерөнхий сайдад нэр дэвшигчийг Бага хуралдаа оруулах журамтай. Гэтэл Удирдах зөвлөлийн 33 эрхэм Ерөнхий сайдад нэр дэвшигч дээр шийдэлд хүрч чадахгүй байгаа нь МАН дахь фракц, бүлэглэл тохиролцож чадаагүйтэй холбоотой.  Тус намын Удирдах зөвлөл Харин МАН-ын Бага хурал энэ сарын 25-нд буюу даваа гаригт хуралдана. Дашрамд, МАН-ын Удирдах зөвлөл 33 гишүүнтэй. МАН-ын даргаас    гадна УИХ-ын нэр бүхий 24 гишүүн болон У.Хүрэлсүх,  Д.Амарбаясгалан, Ц.Бат-Энх, Т.Гантулга, Ц.Сандуй, С.Төмөр-Очир,  Х.Булгантуяа Н.Төмөрхүү, Су.Батболд багтдаг. Ерөнхий сайдад нэр дэвшихээр яригдаж байгаа УИХ-ын дарга Ц.Нямдорж, Шадар сайд У.Хүрэлсүх, УИХ-ын гишүүн Ө.Энхтүвшин нар  Удирдах зөвлөлийн гишүүд.

Ямартай ч УИХ-ын гишүүн Ө.Энхтүвшин Ерөнхий сайдад нэрээ дэвшүүлэхээ мэдэгдэж, ил захидал илгээгээд байгаа. Тэрбээр МАН-ын даргын албан тушаалаа М.Энхболдод шилжүүлж байсан, нам дахь  “Шударга ёс” жигүүрийн тэргүүн. Удирдах зөвлөлөөс Ө.Энхтүвшингийн нэрийг дэвшүүлэхгүй ч бага хурлын гишүүд заалнаас оруулж ирэх магадлал өндөртэй. Учир нь Ө.Энхтүвшинг МАН-ын дарга М.Энхболдтой ханцуйн дотроо тохироо хийсэн гэх мессэж явж байгаа. Ерөнхий сайдад нэр дэвшигчийг батлах эрх бага хурлын 330 төлөөлөгчид бий. Бага хурлын гишүүдийн олонхи нь хотын фракцынхан. Тиймээс хэдийгээр Удирдах зөвлөлөөсөө нэрийг нь оруулж ирсэн ч хотын фракцтай тохироо бүрдээгүй бол сценари өөрчлөгдөх талтай.

Удирдах зөвлөлийн өмнөх хуралдаанаас  Шадар сайд У.Хүрэлсүхийг Ерөнхий сайдад нэр дэвшүүлэх шийдэлд хүрсэн гэх бор шувуу нисч байсан. Гэвч Бага хурал хуралдах хүртэл асуудал эргэж буцсан бололтой.  Мөн УИХ-ын дарга Ц.Нямдоржийн нэр дээрх албан тушаалд томилогдох магадлалтай эрхэмд явж байгаа.

МАН-ын төв штаб Ерөнхий сайдад нэр дэвшигчээ тодруулахаар дуншиж байгаа энэ үед НИТХ-ын XI хуралдаан болсон. Энэ хуралдаанаар нийслэлийн МАН-ын дарга Ц.Сандуй НИТХ-ын даргаасаа чөлөөлөгдөх хүсэлтийг төлөөлөгчид шийдвэрлэсэн. Гэхдээ дараагийн НИТХ-ын даргаа томилж чадаагүй. НИТХ-ын даргад МАН-ын бүлгээс төлөөлөгч Д.Баярсайханыг, заалнаас төлөөлөгч С.Амарсайханыг дэвшүүлсэн. НИТХ-ын хурлын төлөөлөгч Д.Баярсайханыг  Сонгинохайрхан дүүргийн ИТХ-ын дарга, Засаг даргын орлогч хийж байснаар нь андахгүй. Мөн түүнийг Ц.Нямдоржийн хүн гэдэг. Харин төлөөлөгч С.Амарсайханы хувьд УИХ-ын гишүүн асан С.Отгонбаярын дүү гэдгээр нь олон нийт гадарлана.  НИТХ-ын даргад нэр дэвшсэн дээрх хоёр эрхэм нууц санал хураалтаар оноо тэнцсэн. Тиймээс НИТХ дахь МАН-ын бүлэг тав хоногийн завсарлага аваад байгаа билээ. Ийнхүү төр, засгийн эрх барьж байгаа  МАН-д шийдэгдээгүй асуудал ар араасаа хөвөрч байна.

Ямартай  ч урьд шөнөжин Ерөнхий сайдад нэр дэвшигчээ дэмжүүлэхээр Бага хуралдаа ирсэн хот, хөдөөгийн гишүүдийг лоббидох “татаар ажиллагаа” явагдсан байх.

Тиймээс олон нийт эрх баригчид Ерөнхий сайдад хэнийг нэр дэвшүүлэхийг өнөөдөр харах үлдлээ.

Н.Энхлэн