Ван Сү гэдэг нэг Солонгос танилтай боллоо. Цахилгаан дайны төлөвлөгөө гэдэг шиг энэ нөхөр Монголын сошиал ертөнцөөр дамжуулан дорхноо бүхний танил болчихов. Гэвч түүнийг яг хэн болох, Монголд юу эрхэлдэг, ямар ангиллын визтэй зэрэг тодорхой албан эх сурвалжийн мэдээлэл одоогоор алга. Кирилл үсэг рүү  галигласан Ю Ван Сүнг гэсэн нэг нэртэй л байна. Харин энэ эрхмийн хийсэн гэх нэгэн бичлэг манай сонгуулийн шинэ драмын цувралыг эхлүүлээд байна. Би 50 сая вонн нэр дэвшигчид өгсөн нь хууль зөрчжээ, уучлаарай гэсэн утгатай бичгийг төрийн сонгуулийг зохион байгуулж байгаа Сонгуулийн Ерөнхий Хороонд илгээсэн юм байх. Шууд л Монголын иргэн шиг сонгуулийн хороо руу бичиг уучлалт явуулсан юм байх. Яг солонгос драм шигээ  цуврал өрнөлтэй. МАХН-ын дэмжинэ гэсэн нэртэй ч дандаа эсэргүүцэж байдаг нэг ТББ энэ драмын нэг ангид нь бас гол дүрийг авчээ. Эд нар МАХН-аа дэмжинэ, гэхдээ энэ мөнгө авсан асуудлыг шалгаж өгнө үү гэж мөн л шууд СЕХ-нд өргөх бичиг барьж. Эх сурвалжийн мэдээлж байгаагаар энэ ТББ-ын нэр барьсан нөхдүүд 2013 оны Ерөнхийлөгчийн сонгуулиар яг энэ барилаараа ажиллаж МАХН-аа дэмжинэ. Гэхдээ С.Удвалыг бол “үгүй” л гээд явж байсан ширлэсэн нүүртэй нөхдүүд бололтой. Ингээд Монголын үзэгчдийн танил драм “Эхнэрийн урхи” -аар бол Үнжэ, Эрэ хоёр бэлэн болж. Нэгэнт факт гарч ирсэн тул СЕХ Цагдаагийн байгууллагад хандаж таарна. Цагдаагийн байгууллага үүнийг шалгаад эхэлсэн. Шинжээч тогтоосон гэж үзээд шүүхэд шилжүүлсэн.

Манай Ван Сү эрхэм өөрийгөө илчилсэн бичгээ СЕХ-нд өгөхийн өмнө драмын триллер болгож сошиал сүлжээнд бичлэг оруулж тараасан. Тэгээд араас нь СЕХ- нд бичиг шидсэн. Ван Сүнгийн энэ драмыг нь хэрхэн төгсгөхийг харин монголчууд өөрсдөө эвлүүлэх хэрэгтэй болж байна.

Үнэнээс хол сонсогдох ч өөрийнх нь нүүр огт харагдахгүй байгаа бичлэгээ өөрөө л санаачлан сошиалд оруулсан гэж таамаглахаас аргагүй. Одоогоор бичлэгийг хэн анх тараасан тухайд тодорхой мэдээлэлгүй байна. 

Энэ чинь Монгол төрийн сонгууль шүү дээ. Юун Солонгос нөхөр гарч ирэн бужигнуулаад эхлэв. Яагаад өөрөө бөхийж тонголзож уучлалт хүсэхгүй бүгээд байна. Солонгос улс манайхыг бодвол хуулийг нарийн чамбай гаргадаг. Бас бүгд том бага хүн гэхгүй хуулиа дагаж мөрддөг. Сонгуулийн хууль нь ч хатуу байж таарна. Энэ нөхөр эх орондоо бол 50 сая вонн амалчихаад хууль зөрчихжээ, уучлаарай гээд зогсож чадахгүй. Харин Монголын хуулийг сайн судалжээ. Чадаж байна. Хэрвээ энэ драмын өрнөлөөр С.Ганбаатар нэр татагдвал сонгуулийн дүн аль нэг талдаа эрс эргэнэ. Өөр сөрөг үр дүн ч гарч болзошгүй. Эцэст нь монголчууд Ерөнхийлөгчөө сонгосон тав дахь сонголтын үр дүнг нэг Солонгосын иргэн 100 сая төгрөгийн  шуугиан тариад өөрчилсөн хэрэг болно.

50 сая воннын асуудлыг хуулийн хүрээнд шалгаж, шатлалаараа өгсөж буй тул улстөржүүлэн хэн нэгэн хөндлөнгөөс нөлөөлөх эрхгүй. Харин бие даасан улсын сонгуулийн хэрэгт нөлөөлж, талцал хуваагдлыг өдөөж байгаа энэ Солонгост нөхөрт яаж хариуцлага тооцох вэ. Баахан будилаан хутгачихаад хилээр гараад нисчихвэл хэрүүлээ тэвэрч үлдсэн бид л хохирно.

Ю Ван Сүнг гэж хэн бэ ... !!!

Пүрэвжавын Баярхүү / тоймч /