Зарим нэг түшээд сэтгүүлчдийн хандыг дарья л гэсэн юм байх. Эрүүгийн хуулийн өөрчлөлтдөө тусад нь оруулья “барий” гэсэн байна.  Өмссөн зүүснийг нь гоочлоод, хувь хүн рүү нь дайраад элдвээр хэлээд байхаар хэн ч гомдоно.  Гишүүн болчихоод хүн бүр "Түшээ Түшээ" гэж түшээд, түүнд нь чих дасаад байхад "ичээч ичээч" гээд зарим нь сошиалаар матарлаад байхаар сэтгэл зүйн хувьд ямар байхыг ойлгож байна.  

Энэ нийгэмд хэвлэлийн сэтгүүлчид, чөлөөт нийтлэлчид, үзэл бодлын индрээр өөрийгөө чимдэг блогчид, жиргээч постлогч бүгд  хүн гүтгэх эрхгүй.  Гэтэл тэд  дийлэнхдээ яагаад "76 ба ард түмэн" гэж хуваасан мэт гишүүдээ чимхэж суух болов.  Худал гүтгэлэг тараасан бол хариуцлага хүлээх тухай ойлголт алга болсон бус шударга ёс алга болчихоор олон нийтийн хэрэгслээр хардлага давамгайлдаг ардчиллын хэмнэл энэ шүү дээ.

Энд жирийн сэтгүүлчийн ёс зүй байдгаараа байгаа. Жирийн гэдгийг хашилтад авах ёстой байх. Жирийн бус төлбөртэй сэтгүүлийн баг нэгжийг улстөрчид өөрсдөө бүрдүүлж, санхүүжүүлж нэг нэгнийхээ эсрэг цаасанд боосон чулуу шидээд байгааг бүгд мэдэж байгаа.  Иргэний үзэл бодлоо илэрхийлэх,  хардах эрхийг энд хольж хутгаж болохгүй юм. Урьд сонинг холбоогоор нь худалдаад авчихдаг байсан бол одоо сошиал ертөнцийг хянах боломж бага, бараг хяналтаас гарчихаад байна. Өөр ухамсар боловсрол түвшин бүхий хүмүүс энэ цахим ертөнцийн бохир тоглоомонд хамгийн ихээр татагдаж нээлттэй нийгмийн нэг том орон зай сошиалыг тас хараар будаад байгаа.

Монголын сошиал тивийнхэн зөвхөн эр эм гишүүдийг нас хүйс,  өмссөн зүүснээр нь дайраад  гүтгээд байгаа ч бус эгэл нэгнийг ч үзэшгүй муухайгаар нь хэлж матарлах нь хэрээс хэтэрсэнийг энд хэлэхгүй өнгөрөөж байна.   Ийм зүйл дээр хууль санаачлах тухай хэн нэг гишүүн дуугарах цаг аль хэдийнэ болсон.  Гэтэл манай хэд өөр хоорондынхоо дайнд энэ хар тойргийг ашигладаг тул үнэндээ яг барьж аваад хэлэлцэхгүй дөлөөд байдаг. Өнгөрөгч 2012 оны сонгуулиар Л.Эрдэнэчимэг гишүүний халамцуу яриа, халуун үнсэлт, саяхны Д.Оюунхорол сайдын гитарын гоцлолыг үнэндээ сэтгүүлч нар гар утсандаа туучихсан биш ордон дотроосоо орой улстөрчдийнх нь I phone -оос гарсан байгаа.  Тэгэхээр сэтгүүчдийн хариуцлагыг чангатгаж  хуулинд хиймээр байна уу, гишүүдийн ёс зүйг яримаар байна уу. Тэгсэн хэрнээ сэтгүүлчдийг чангалаад өгье гэж хуулийн хэлэлцүүлэгтээ санал өгөөд байх.

Канад зэрэг хөгжилтэй улс твиттер болон бусад сошиал орчинд хүн гүтэсэн, нэр хүндэд халдсан  жиргээ, постыг хаадаг болох, дахин мэдээлэл оруулах эрхийг хязгаарлах, хуурамч нэр хаягаар орох боломжийг хаах боломжийг судлаад хэрэгжүүлж эхэлж байна. Мэдээж үүнд  сар их мөнгө хаяж байгаа. Учир нь нийгмийг эрүүл саруул байлгаж, хүний эрх, нэр төрийг адил тэгш хангах бол энэ улсуудад ямарч мөнгөнөөс үнэтэй зорилт нь. Харин манайд эсрэгээрээ . Сошиалиар өөр рүү нь хаясан шүлсийг  сэтгүүлчдийн хацарт наах гээд  байх юм .

ПҮРЭВЖАВЫН БАЯРХҮҮ / ТОЙМЧ /