-Гуравдугаар сарын 21-ний дотор 580 сая ам.долларын өрийг төлөх ёстой-

Монгол Улсын Гавьяат эдийн засагч Б.Осоргарав эх орныхоо эдийн засагт хувь нэмэр оруулж, өөрийн зүгээс 10 сая төгрөг, 10 адуу, алтан бөгжөө хандивлаж буйгаа өчигдөр дуулгасан. Тэрбээр “Би ээжийнхээ ачийг бодож 10 сая төгрөг, аавынхаа алтан сургаалийг эрхэмлэж ногттой 10 адуу хандивлаж байна. Эрдэс баялгийн дээж болгож алтан бөгжөө хандивлалаа” хэмээн утга учрыг нь тайлбарласан.

Тэгвэл Гавьяат эдийн засагчийн “Эх орноо эдийн засгийн хүндрэлээс гаргахын төлөө” уриатай хандивын аяныг УИХ-ын Б.Дэлгэрсайхан үргэлжлүүлж, улсад 100 сая төгрөг хандивлаж буйгаа өнөөдөр мэдэгдэв. Б.Дэлгэрсайхан гишүүн “Монголын үндэсний компаниуд аянд идэвхтэй оролцох хэрэгтэй. Эдийн засаг хямралтай, ард иргэдийн амьжиргаа хүнд байгаа энэ цаг үед боломж бололцоогоороо дэм болж, нэгдэж орно байх гэж итгэж байна” хэмээн бизнес эрхлэгч төрийн түшээгийн хувиар эх орондоо хувь нэмрээ оруулж буйгаа дуулгав.

Монгол Улсын Засгийн газар ирэх гуравдугаар сарын 21-ний дотор 580 сая ам.долларын өрийг төлөх ёстой. Энэ бол таван жилийн өмнө Хөгжлийн банкаар дамжуулан авсан зээлийн төлбөр. Энэ өрийг асуудалгүй төлнө гэдгээ Ерөнхий сайд Ж.Эрдэнэбат хэлсэн. Тэрбээр “Монгол Улс 2017 оны эхний улиралд 580 сая долларын өр төлнө. Засгийн газар энэ өрийг саадгүй, эдийн засагтаа дарамт болохгүйгээр, ачааллыг нь ард түмэндээ үүрүүлэхгүйгээр төлөх гарц шийдлээ олсон, хугацаандаа төлнө” хэмээн мэдэгдсэн. Гэхдээ Ерөнхий сайд хэзээ, хаанаас мөнгө олж төлөхөө хэлээгүй.

УИХ-ын эдийн засагч гишүүдийн нэг Ч.Хүрэлбаатар энэ өрийг хэрхэн төлөхийг тодорхой болгохыг Засгийн газраас шаардсан удаатай.  Ч.Хүрэлбаатар “Дотоодоосоо энэ 580 сая ам.долларыг хамж гаргаад өрөө төлөх юм бол ам.долларын ханш өсөөд гүйцэгдэхгүй. Тэгэхээр гаднаас мөнгө зээлэх тухай асуудал орж ирж магадгүй. Хэрэв ингэж төлөвлөж байгаа бол Засгийн газар тэр зээлэндээ баталгаа гаргуулах асуудлаа оруулж ирж болдоггүй юм уу, Ж.Мөнхбат сайд аа, Ц.Мөнх-Оргил сайд аа. 580 сая ам.доллар зээлье гэж байгаа бол баталгаагаа УИХ-аар гаргуулах ёстой ш дээ. Хэрэв баталгаагүй бол хэн ч мөнгө өгөхгүй” хэмээн Засгийн газрынхан даруйхан арга хэмжээ авах ёстойг сануулсан.

Ерөнхий сайд өнгөрсөн оны нэгдүгээр сарын 6-нд Засгийн газар 580 сая долларын өрийг саадгүй төлнө хэмээн мэдэгдсэн. Үүнээс 10 хоногийн дараа Ч.Хүрэлбаатар гишүүн хэрхэн төлөхийг лавлан асууж, гарц хайснаас хойш энэ талаар ярьж байгаа хүн алга. Хоёр сарын дараа 580 сая долларын өрийг төлөх ёстой. Гэвч хэрхэн төлөх нь өнөөдөр ч тодорхойгүй байна.

Тиймээс “Өр төлөх аян” өрнүүлвэл ямар вэ, Ерөнхий сайд аа. Гавьяат эдийн засагч Б.Осоргарав эхлэлийг нь аль хэдийнэ тавьж, 10 сая төгрөг, 10 адуу, алтан бөгжөө хандивлачихлаа. Б.Дэлгэрсайхан гишүүн түүчээлж, 100 сая төгрөгөө төрийн дансанд хийхээ мэдэгдлээ. Тэд өөрсдийн хүслээр эх орондоо хувь нэмрээ оруулж буй. Тэгэхээр төрөөс, Засгийн газраас жаахан хүч нэмээд өгвөл бид солонгосчуудаас дутна гэж үү. Бизнесийн салбарын томчуудаас эхлээд төрийн түшээд, мянгат малчдад албан ёсны уриалга хүргүүлж, эх орондоо тус нэмрээ оруулахыг хүсвэл тэд татгалзахгүй гэдэгт итгэлтэй байна. Хилийн чанадад суугаа монголчууд ч эх орныхоо төлөө санаж сарвайх нь ойлгомжтой.

Солонгосчууд хуруун дахь бөгжөө мултлан эх орондоо өгч, их хямралаас гарч байсан эв нэгдлийн бодит түүхтэй. Монголчууд бусдаас дутна гэж үү. Бидэнд ч эх орноо аврах сэтгэл, зүтгэл байна. Өрөн дээр өр нэмэн гадаадаас гуйж явахын оронд эх оронч иргэддээ хандаад үзвэл ямар вэ. Айлаас гуйхаар авдраа уудал гэсэн эртний сайхан үг бий шүү дээ.  

В.Бат