Гурван хүний нэг нь Солонгос орныг зорьдог болсон Монголчуудад И-Март тийм шинэ зүйл биш. Цагаа хэмнэж захиалгаа онлайнаар онцой хямдаар хийж хэрэгтэй бараа хүнсээ авах давуу талтай И-Март дэлгүүрт манайхан заавал биеэрээ очиж орлого оруулахаар бөөгнөрч кассын машиныг нь гацааж дуулиан тарьсан. 

Сөүл зэрэг хотуудад энэхүү сүлжээ дэлгүүр үнэндээ цочтол хямдардаг тохиолдлууд байдаг. Энэ хямдралд ихэнхдээ хугацаа нь дуусах дөхсөн хүнсний бүтээгдэхүүнүүд байдаг. Бүр тулаад ирвэл бараг зүгээр өгчихдөг.  

Манайхан шинэ юманд сэргэг ханддаг ард түмэн л дээ. Ам дамжсан яриагаар хачин хямд Солонгос дэлгүүрт орж үзэхээр амралтын өдрөө бүтнээр зориулж Е-Мартыг зорьцгоох болжээ.

10 жилдээ  бараг ганц үйлдвэр баригддаг манай улсад дэлгүүр, буудал сардаа нэг нэмэгдэж нээлтээ хийх юм. Зах зээлийн жамаар өрсөлдөөд байгаа юм байхгүй. Зүгээр дэнж хотойтол дэлгүүр хэсэх байх Хоббитой залхуу ард түмний сонирхолд нийцүүлж байгаа нь энэ юм уу гэмээр. Солонгосын сүлжээ дэлгүүр Монголд орж ирснээр хэрэглэгчдэд ямар давуу тал бий болов гэдэг талаар хувийн бодлоо л хуваалцахаар ийн урт оршил буулгав.

Хатуу үнэтэй, хуурамч хямдралтай монопол шахуу болсон сүлжээ дэлгүүрүүдийг И-Март -ын дуулиант нээлт огцом хямдрал байдалд оруулсан байх талтай. Мөн цаашлаад эрэлт ихтэй электрон барааны зах зээлд арай итгэл төрүүлэхүйц брэнд бүтээгдэхүүнийг шууд Солонгосоос нийлүүлдэг байж болох.

Нөгөөд талдаа яагаад И-Март- аас эх орны үйлдвэрийн цагаан будаа, алаг салатыг худалдан авч Солонгосруу мөнгөн урсгал нээх хэрэгтэй юм бэ гэж бодлоо. Хүн хорхоотой цай, аяга шаазан ТВ, угаалгын машин зэрэг ориг Солонгос брэндийг энэ сүлжээнээс хямдхан авч болох. Харин гадаа түрээсийн лангуун дээр талх сүүн дээр тавхан төгрөг нэмж заран хоногийн хоолоо олохоор гүрийж байгаа Должин, Доржийн минь орлогыг Е-Март булаагаад байна. Хотын төв дүүргийн хэдэн захын лангуу түрээслэгчид И-Март нээгдсэн эхний өдрүүдэд дампуурах шахсан байх. Лангуун дээр нь нэг дахин хямдхан байгаа бичиг хэрэг, үзэг балыг И-Мартын“цочмоор хямдхан” гэсэн шошго доороос бөөндөөд авч байлаа. Үнэн хэрэгтээ гэрийнх нь хажуудах лангууны бараатай адил бүгд шахуу “Made in China” гэсэн шошготой байгааг анзаарч байгаа хүн ховор харагдана.

Баялаг бүтээгчдийн ТВ-ээр яваад байдаг сүртэй лоозон энд харагдсангүй. Үндэсний үйлдвэрлэгчдийн сэтгэл дэвсэн тогтоосон онцгой хямдрал ч энд алга. Сүлжээ дэлгүүрийн нарийн шатлалтай тогтоосон татвар шингэсэн бололтой Дорж, Должингийн лангуунаас хямдхан харагдсангүй. .   

Сониуч зан болоод сурцтай менежментэд автсан иргэд доод, дунд баян ядуу бүгд л И-Мартыг зорьж байна. Сүртэй ч юм авахгүй л харагдана. Сүрхий ч нэрэлхүү улсдаа манайхан. Хүний өмнө хоосон сагс түрээд гарахаасаа ичиж байгаа бололтой. Хажуу дэлгүүрт нь шинээрээ байдаг банана, варень, сүү таргийг хэд хэдээр нь сагсанд хийж түрсэн харагдана.

Энд л харин Эх оронч загнамаар санагдлаа. И-Март шинэ орчин, үйлчилгээний соёл, үнийн хямдралыг үзүүлж байгааг үгүйсгэн нутгархах гэсэнгүй. Танай хажууд, Миний дэлгүүрт, энгийн лангуун дээр байдаггүйг л эндээс авч баймаар. Хямралыг хамтдаа туулцгаая гэдэг. Энэ их энгийн зүйлээс, лангуу түрээслэн жоохон ашиг харж суугаа нэгнээ дэмжсэн 100 төгрөгний худалдан авалтаас ч эхлэнэ.

Б.Хэгжүүн