Засгийн газрын өчигдрийн хуралдаанаас нийслэлийн Засаг дарга хоёр орлогчтой ажиллах шийдвэрийг гаргасан. Гэвч өнөөдөр орлогчийн тоо нэмэгдэж, дөрөв болжээ.

Сонгуульд ялалт байгуулж, дөрвөн жил төр барих эрх авсан нам албан тушаалын бөөн өртэй байх нь гачлантай. Намын төлөө ингэж, тэгж зүтгэсэн, ажилласан гэх суудал горилогчдын цуваа элдэв албан тушаал бий болгож, төрийн бүтцийг улам л данхар болгох юм.

Эрх баригч МАН-ынхан хэмнэлт хийнэ, төрийн бүтцийг цомхон болгоно хэмээн дуугарсан ч бодит үр дүн харагдахгүй байна. Өчигдрийн Засгийн газрын хуралдаанаар 10 дэд сайдыг томилов. Ер нь бол 13 дэд сайд томилогдох ёстой ч МАН-ын Удирдах зөвлөлийн тодруулсан гурван хүн Ж.Эрдэнэбатын танхимынханд гологдсон юм уу даа, түдгэлзүүлжээ. Сайд нараа томилохдоо хэдэнтээ эргэж буцсан МАН-ынханд дэд сайдын буцаалт бол асуудал биш. Дараагийн хуралдаанд дахин гурван нөхрийн нэр орж, ирээд батлагдана биз. Дэд сайдын асуудал яригдаж эхлэхтэй зэрэгцэн яамдад энэ албан тушаалын шаардлага байхгүй талаар бид бичиж байсан. Сайд, Төрийн нарийн бичгийн дарга ажиллаж байхад дэд сайд гэх шахааны хүн, албан тушаал үнэндээ илүү байгааг жирийн уншигчаас эхлээд төрийнхөн ч хэлдэг. Гэвч МАН-ынхан сонгуулийн өрөө төлөхийн тулд 13 шахааны хүнд дэд сайд гэх сэтэр зүүж, яамдын ширээг бөглүүлэхээр болов. Ерөнхий сайд Ж.Эрдэнэбат “яамдыг эзэнгүйдүүлэхгүйн тулд” дэд сайд нарыг томилно гэх утгатай тайлбар хэлсэн байна лээ. Төрийн яамдад эзэн болж очиж байгаа твиттерчид нь хэрхэн ажиллахыг, яаж эзэн байхыг харж л байя.

МАН-ын өөр нэг шахаа нь хотын дарга Су.Батболдод ирэв бололтой. Өчигдрийн Засгийн газрын хуралдаанаар Нийслэлийн Засаг дарга хоёр орлогчтой ажиллана гэх шийдвэрийг гаргаж, албан мэдээ нь zasag.mn сайтад гарсан байв. Өглөөхөн цагаан дээр хараар тод бичигдсэн байсан энэ мэдээ одоо харин устгагджээ. Учир нь хотын дарга дөрвөн орлогчтой ажиллахаар болсон гэнэ. Хотын орлогч гэх албан тушаалд хоёр хүнийг нэмж шахсан гэсэн үг. Одоогоор ИТХ-ын төлөөлөгч Ш.Анхмаа, ЗГХЭГ-ын Ажлын албаны даргаар ажиллаж байсан ИТХ-ын төлөөлөгч П.Баярхүү, нийслэлийн намын хорооны дэд дарга Д.Энхтөр, НИТХ-ын төлөөлөгч Б.Батбаясгалан нарын нэр хотын орлогчид дуулдаж байна. Тэдний аль хоёр нь албан ёсны шахааны хүн болохыг МАН-ынхан л мэднэ.

Хотын экс дарга Э.Бат-Үүл зургаан орлогчтой ажиллаж, ад үзэгдэж байсан. Харин МАН-ынхан зургаа гэсэн тоог дөрөв болгон бууруулжээ, хэмнэлт нь бололтой. Засгийн газрын шийдвэрээр хоёр орлогч байсан бол хэмнэлт гэх үг бодит сонсогдох байлаа. Гэвч МАН дахин хоёр хүнд өр төлөх шаардлагатай тулгарсан бололтой, орлогчийн тоог дөрөв болгов. Сонгуулийн үеэр МАН-ын удирдах хот хоёр орлогч даргатай ажиллана гэх үгийг улиг болтол сонссон хүн олон бий. Харин сонгуулийн дараа бол хоёрыг 20 болгохоос сийхгүй аж. 

В.Хэрлэн