Ээлжит сонгуулийн үр дүнгээр  бий болсон УИХ ямар ч байсан жигдэрлээ. Ер нь бол шөнө л хуралдаад байх болж. Өнгөрсөн өдрүүдэд Байнгын хороодын дарга нараа баталсанаар УИХ-ын даргын зөвлөл бүрджээ. Энэ зөвлөл нь хуралдаж эхэлснээр долоо хоног бүрийн байнгын хороодын болон чуулганы нэгдсэн хуралдааны хуваарь, хэлэлцэх асуудлыг тогтоодог. Ингэснээр энэ долоо хоногоос УИХ-ын ажил илүү тодорхой болж, хуваарийн дагуу үргэлжлэх боломж бүрджээ.

Харин  Засгийн газар 4 сайдаа түдгэлзүүлээд 11 сайдаа томилж тамгыг нь атгууллаа. Ингэснээр Засгийн газар анхны хуралдаанаа хийж, асуудлаа ярьж болох ч нэг танхимаар ажиллах бололцоо хараахан бүрдээгүй байна. Засгийн газрын мөрийн хөтөлбөр гарч түүнийг Их хурал хэлэлцэх ёстой. Засгийн газрын хувьд хэвийн ажиллаж, улс орны амьдрал, нийгэм, эдийн засгийн хүндрэл ба ойрын бүтээн байгуулалтын суурийг зассан мөрийн хөтөлбөрөө гаргахад бүх яамаа гартаа бүтэн атгах нь чухал. Гэтэл дөрвөн яамны сайд нарын нэр дэвшүүлэлт түдгэлзэж, Засгийн газрын бүтэн алхаа догонцлоо.

Анхнаасаа Засгийн газрын бүтэц бүрэлдэхүүний тухай хуулийн төсөл дээр нь Ерөнхийлөгч хоёр удаа хоолой засан сануулсан боловч төдий л анхаарсангүй. Шинэ Ерөнхий сайд Ерөнхийлөгчийн шүүмжлэл тээсэн төслөө бариад шууд Их хурлын даргын гарт өгсөн нь анхны түргэдсэн алхам нь болов. Араас нь Ерөнхийлөгч ахин дуугарч санал бичиг илгээгээд Отонтэнгэр шүтээнээ тахихаар гарч одов. Энэ хооронд гөжүүдлэн зүтгүүлсэн шинэ Засгийн газрын томилгоон дээр АТГ дүгнэлтээ гаргаж, дөрвөн сайд түр үүдэнд хүлээх хэрэгтэй болов.

Ер нь бол АСЕМ-ийн араас МАН-ын УЗ энэхүү томилгоо тойрсон асуудлаараа олон нийтийн анхааралд шууд орж ирэхийг намын нөхөд нь хаана хаанаа бодитой харах ёстой байсан талаар энд дурдья.

Ойрын өдрүүдэд МАН-ын зүгээс гаргаж буй шийдвэр бүрийг иргэд ирэх 4 жилийн дүр зураг, өдөр тутмын  амьдралынхаа луужин болгон харж байгаа нэн онцгой гэмээр үед сайдуудаа хэтэрхий булагнаж тодрууллаа. Бас харьцангуй шинэ кандитатуудаа олон нийтэд танилцуулж ойртуулалгүйгээр нэр зарлачихав. Энэ нь магадгүй нүдээ олсон, олоогүй бүх нэр дэвшигчийг хамарсан буруутгал болж, МАН амласнаасаа ухарлаа гэсэн гомдлын утсыг хөвөрдөв. Сайдад нэр дэвшүүлэх эрх ялсан нам, түүний удирдлагад байгаа боловч итгэлээ өгсөн сонгогчдын хүлээлттэй томилгоогоо уяж гэмээнэ шинэ төрд итгэх иргэдийн итгэл илт сэргэх байв.

Мөн сайдад  дэвшигчид нь горилогч нар төдий бус салбараа аваад явах туршлага мэдлэгтэй талаар олон нийтэд таниулах талаар бодох л ёстой байлаа. МАН-ын хэвлэл мэдээлэл олон нийттэй харьцах нөхдүүд сайд нараа тойрсон “ЯАГААД” гэсэн дуулианд тус бүрт хариу тайлбарыг яаралтай өгсөнгүй. Хол мөсөн уулын оройгоос нэрийг нь зарлаж, зургийг нь хуурай магтаалтай хэт холоос гялалзуулаад байсан нь дөнгөж сарын өмнө ширүүхэн сонгуульдсан олон нийтийн омогшилтой тулчихлаа.

Зарим талдаа өнөөх нь туйлшрал болох хандлага сошиалд давамгайлж нэгэн удаа Насанбаярыг “МҮҮН-дсэн шиг зураг хөргийг нь матарлах, гутаах, дайрах хандлага ч гарч эхэлсэн. Нэг ёсны төрийн сайд болж, нэр дэвшсэнийхээ төлөө элдэв дээдээр гүтгүүлэх дөхөж байгаа юм.  

"Яагаад энэ хүн сайдад нэр дэвшсэн бэ" гэсэн хамгийн эхний зайлшгүй босох асуултад хариулт байхгүй хаяснаар үүсэж буй үр дагавар багадсангүй. Яг үнэндээ бол үнэмлэхүй олонх болсон тул доогуур хэн нь юу гэж шаагилдах нь хамаагүй гэж ихэрхсэн тал ч ажиглагдлаа.  

Ингэснээр МАН сайдад нэр дэвшигчдээ болоод намынхаа анхны хамгийн том багын томилгоог олон нийтэд зөв хүргэж чадсангүй. Дөрвөн сайд дээр асуултын тэмдэгтэй үлдлээ. Төрийн шийдвэрийн тусгал нь бидний маргаашийн амьдралын нэг тал гэдгийг иргэд сайн мэдэх болсон. Тиймээс ч олонхоор итгэлээ өгсөн МАН-д хандаж танай намын шийдвэрийн зөв, буруу бол одоо манай гэр бүлийн асуудал. “МАН-ыг манайх” гэж ойлгоно гэдгээ сайд нарын томилгоон дээр нь олон нийт эрх баригчдад санууллаа.

Пүрэвжавын Баярхүү /тоймч/