Өчигдөр Монгол Улсын 29 дэх Ерөнхий сайд тамгаа магнайдаа өргөснөөр баяр наадмын төв асарт хойморлох төрийн 3 өндөрлөг тэгширлээ. Төрт ёсны их баяр тул эрэмбэ дараа, эрхэмсэл хүндлэл хэн дээр байх нь хоёрдолгүй байх учиртай. Наадмын нээлт, хаалтын дэглэлтийг гавьяат Н.Наранбаатар өрөөд тавьчихсан байгаа гэсэн. Сур харваа, хурдан морь, хүчит бөх аяндаа жигдрээд ирнэ. Монгол наадам хаяанд иржээ.

Сүүлийн жилийн наадмуудын дуудлага гуншинд  “Ардын хувьсгал” гэж үгнээс цэрвэх нэг хэсэг бий болоход, авч үлдэх гэсэн нөгөө талынхан гээд арч ирээд сонин хэвлэл сошиал сайтаар жаал гөвөлцдөг нь бараг уламжлал болох дөхөөд байлаа. Хөөрхий 21 оны хувьсгалын нэг тугыг өргөсөн цагаан дээлт Дамдины хүү Сүхбаатар, Ардын хувьсгал хоёр орчин цагийн монгол наадамд дуудагдах нь ёс бус гэх шахсан хийрхэл гараад авсан. Төв талбайг эзэн Чингэсийн нэрээр сольж, түрдээ Д.Сүхбаатарын хөшөөг нүүлгэн шилжүүлэхээ больсоноор хоёр намын мөчөөрхөл нэг намдсан. Түүхээ хүртэл улаан цэнхэрээр тасчих шахсан сүрхий хийрхэл дахин бүү гараасай гэсэндээ таагүй дурсамж хөндлөө.   Энэ жилийн сонгуульд МАН аваргалсан тул 95 жилийн ойдоо хүрч буй  “Ардын хувсгал”-ыг ад үзсэн яриа ахин гарахгүй чих амар наадах нь гэж ард олон ам зөв байна.

Шинэ ерөнхий сайд цэнгэлдэхийн хойморт айраг шимэнгээ бодлоо цэгцэлж, гарцаа нягталж суух биз. Алгандаа аз хийморь хурайлах амны хишигтэй ард түмнийг ахиад сөхрүүлэхгүй татаад босгох ачааг нэг сонгуулийн бүтэн итгэлтэй хамт үүрсэн хүн бодох дүгнэх юм ихтэй байгаа.   

Сонгуулийн сүрэнд дарагдсан ч гэсэн баяр наадмын бэлтгэл сайн хангагдсан гэж  “ Мэргэжлийн комисс”  шинэ Ерөнхий сайддаа мэдэгдсэн байх. Хуушуур нь элбэг, айраг нь амттай, хүнс нь аюулгүй, гол ус нь үергүй бол Монгол наадам тэгээд хар аяндаа сайхан болчихдог юм даа  гэж зурагт манадаг зуслангийн өвгөчүүл хуучилж сууна лээ.

Энэ жилийн наадамд 1024 бөх барилдана. Мөн энэ зуны аймгуудын наадмын тов зөрж байгаа учраас хөдөө орон нутагт амьдарч байгаа улсын цолтой  бөхчүүд бүгд ирж зодоглоно гэнэ. Тэгэхээр нэг, хоёрын даваа сулрахгүй гэсэн үг. Хатуу ам ихтэй, унаа холтой наадам болж, гал ассан барилдаан ар араасаа өрнөх бололтой. Шинээр 12-13 хүн улсын цол хүртэх, наймд үлдэж заан цол авах бөхийн нэрс ч тааварт орж иржээ.

Бөхчүүд маань засуулаа зандрахгүй тахимаа унжихгүй шудрага жудагтай барилдахад наадмын хойморт  эвийн өнгө сүлэлдээд ирнэ дээ гэж ахмадууд үг дайж байна лээ. Шинэ засаг төр барилцахаар тодорч буй улс төрчдөд буурлуудын энэ үгийг давхар даймаар санагдлаа.

Нийтээрээ ес хоног амрах буюу ер бусын урт наадам үргэлжлэх юм байна.

Хүй долоон худагруу хурдан буянууд хөдлөөд эхэлсэн. Хуушуурын гэрүүд хүрээлээд буучихсан байна.  Баяр наадмын хурдан морины хүүхдүүд хамгаалалт хувцасаараа жигдэрсэн, бариа зурхайд бүрэн ирнэ гэж найдья.  

Нийт нутгийн 70 хувьд зуншлага сайхан байгаа тул эх орны аль ч хязгаарт эрийн гурван наадам өнгөтэй хиймортой өрнөх нь ээ. Сэтгэл цагаан Монгол түмний сонгуультай жилийн наадмын өнгө сайхан бууж  байна.

Пүрэвжавын Баярхүү / тоймч /