... Банкуудын чанаргүй зээлийн хэмжээ -900 тэрбум төгрөг Улсын нийт гадаад өр -22 тэрбум ам доллар  боллоо. Төсөв алдагдалтай, үүнийгээ зээлээр санхүүжүүлж байгаа . Монголбанк бодлогын хүүгээ 1.5 хувиар бууруулж, 10.5 болголоо.

Энэ шийдвэр үйлдвэрлэгч, өрх айл, банкны зээл, хүмүүсийн хадгаламжийн хүүнд, өөрөөр хэлбэл бодит амьдралд энэ оны 10-11 дүгээр сараас нөлөөлж эхэлнэ . Сонгуульд шоовдорлогдсон эдийн засаг бараг элгээрээ мөлхөөд байна... Энэ бол сонин хэвлэлд хаяа үзэгдэх болсон стандарт шахуу болсон мэдээ. Хүн сонирхох сэдэв биш. Цаана чинь "сонгууль наадам" дөхөж сургууль цэцэрлэг барих, шинэ зам нээх тууз хайчлах ёслолын дугараа эргэчихлээ.

Товчдоо Монгол улс АСЕМ-ын том зочид ба Оюутолгойн 5 тэрбум долларын сурагт нозоорсон байдалтай “Монголын минь буян их дээ, болох байлгүй дээ” гээд тааваараа зусаж байна. Сонгуулийн хэмнэлд зугуухан шилжсэн улс орны амьдрал зуны амралт эхэлсэн сургуулийн орчин мэт эл хуль санагдана. Сонгууль хэмээх наадамд улс төрчдийн бужигнуулсан болоод сунжирсан барилдааныг харьцуулан хүүрнэлдэж уйдах завгүй Монголчууд амарч байна.  

Барилдах бөхчүүд цолоо дуудуулаад дэвэхийг хүлээж буй сонгогч наадамчид энэ жилийн ноцолдоонд гэнэтийн “юм” ихтэй болно доо гэж таавар бооцоогоо тавиад эхэлжээ. Яагаад З.Энхболд амаа солино гэж шуугиулав. Баянголд нэг дэвжээний бөх Батбаатар нь ороод ирэхээр бултаж байна гэж харагдуулах гэсэн тактик уу. Хөл авах гэсэн хууралт уу. Өвөрхангайд дэвээд эхэлсэн байсан Ч.Даваабаяр хэний таалал гажаад буцаад суучихав. Баянаа аваргын хайртай охиныг Увсын тойрогт сойчихоод яагаад давхиулсангүй вэ. Наадмын комисс элдвийг үзүүлдэг. Гэхдээ ингэж тулгаж байгаад уясан сойсноо буцааж татаж байсан учраа тохироо  байл уу гэж яриагаа халааж сууна.

Н.Энхбаяр  аварга их бужигнуулсан даа. Даан ч шийдсэн мэхээ хийхгүй тойрч явсаар хөлдөө суулгачихлаа. Одоо дахиад том наадамд барилдах хол. Нас нь бас явж байна. Гэхдээ заалны барилдаанд бол тасралтгүй сайн барилддаг болсон байна лээ. Жижиг бөх дасгаж байгаад ганц суугаад л аваад явчихлаа. Бас л хурдтай мэдрэмжтэй юм даа  гэж тааварт байсан бөхөө дэмжих өрөвдөхийн завсар хүүрнэж хөх утаатай гаансаа сэтгүүрдсэн шиг хөдөөгийн наадамчид яриагаа халааж тойрч суусан харагдана.

Энэ жил сонгуулийн бөхчүүд сэргээш хэрэглэж чадахгүй. Шалгадаг мэддэг юм “компүүтэржсэн” гэнэ лээ. Харин мөнгө бол том хаялцах байх гэж сонгуулийн наадамчид шинжээ хийж сууна. Мөн сунжирсан барилдааны шодоонд зоос шидэлгүй  том цолтойд нь  эхэлж барьц сонгуулсан нь унаа холтой шийртэй бөхчүүдийг эвгүй болгочлоо хэмээн дол цохисон наадамчид таавраа мухарлаад эхэлжээ.. Хашир нэг нь  “ хоёр бөх тэнцээд ирлээ гэхэд хөлийн цэцийн хар хайрцаг нь хаашаа ч зааж мэдэх юм билээ” гэж мэдэмхийрч нэр цохож бөх хэлэхгүй жишүү суучихсан ч харагдана.

“За тэгээд засуулаа загнахгүй, танхимаа унжихгүй элдэв булхайгүй шудрага сайхан үзчихвэл болоо доо” гэж  таавар дүүрэн наадамчид тамхиа нэрээд тойроод суучихжээ.

Улс төрийн, улс хувьсгалын гэсэн хоёр том наадамтай дэлгэр Монголын сэтгэл цагаан ард түмэн тааваараа зуншиж байна даа.

Б.Хэгжүүн