Бид эзэн Чингисээ шүтэж юм бүхэн дээр жишээлэн омогших хэрнээ сургаалийг нь дагахгүй юм.
Чингис өвөө эзэн хаанаасаа үйл хэргээс урвасан арчаагүй шарваачдыг хатуу шийтгэдэг байсан. Хаан Жамухаа хүлээд ирсэн урвагчдыг цаазаар авч залхаасан байдаг.
Урвалтыг бид дайн самууны үед байдаг зүйл шиг л санах болж. Хүн чанараасаа урвах, анд нөхөрлөлөө алдах гээд жирийн хүний ёс зүйн хэмжээнд үнэтэй бүхэн улс төрд шалны алчуур болж байна. Ойрын саруудад МАХН-ын дарга Н.Энхбаярын хүрээнд хөгийн дүр зураг харагдах болов.
Кино жүжигтэй зүйрлэвэл “Энхбаярын толгой энэ байна” гээд бариад ирэхээсээ сийхгүй нөхдүүд их харагдах боллоо. Танилцуулга, намтар сэлтийг нь харвал Шударга ёс эвсэл бүлэгтэй болж, засаг барилцаж ид байхад "под" хийсэн албан тушаал авч амьжиргаа амьдарлаа өөд татаж амжсан нөхдүүд байх юм. ОБЕГ-ын дарга асан Т.Дуламдорж, МХЕГ-ын дарга асан Д.Батмөнх, Худалдан авах ажиллагааны газрын дарга асан Д.Энхжаргал гээд л. Багын дарга ч улс төрийн албан тушаал болсон энэ цагт манайдаа том албан тушаалууд. Энэ эрхмүүд төрийн албан хаагчдын шалгалт өгч өрсөлдөөд энэ албан тушаалыг аваагүй нь тодорхой. Нам минь, дарга минь гэж гүйсээр тамга атгаж, хямсгар зан гаргаж суусан цаг нь ердөө саяхан юм байна.
Намын бодлого болоод удирдлагад сэтгэл ханамжгүй болж, бодол санаа эргэсэн байж болно. Шүүмжлэлтэй хандаж болно. Хувь хүний бие даасан шийдвэрээ гаргаж болно. Бүр шулуухан энэ нам ирээдүйгүй болоо гэж харсан байж болно. Харин яагаад намаас гарч байгаагаа хэвлэлийн хурлаар зарлаж, өөрийн мөнгө, сэтгүүлчдийн цагийг үрж суух болов.
Албан тушаал аливаа явцуу сонирхолгүй, сэтгэл зөв жирийн гишүүд хөөрхий хэзээ ч ийм хударгагүй авир гаргахгүй. Үнэхээр үзэл бодол намын байр суурь зөрчилдөөд ирвэл зүгээр л дэмжихээ болчихно. Энэ бол буруу бодлого чиг барьж яваа хөлгийн ахмад буюу намын даргад хэдэн урвагч давалгаанд урсгаж алдахаас ч том хохирол болно. Хэдэн албан тушаал горилогч явуулах бол толгойн сэргийлэхээ алдахтай л адил.
МАХН-ын даргын улс төрийн алхмууд буруу зөв тухай энд ярихгүй. Нам дагахыг албан тушаалын бооцоо болгосон барьцаалагч гишүүд жирийн дэмжигчдийнхээ сэтгэл рүү ус цацаж, лидерийг гутаах замаар дараагийн албан тушаалын замаа засаж байгааг хэн ч харж байна. Энэ бол улс төрд хөл тавьж буй залууст маш буруу үлгэр тогтоож байгаа жишиг. Цаашид ийм нөхдүүдэд памперс зүүлгэх багадах ба зүгээр л улс төрөө орхи гэж зөвлөмөөр.
МАН-ын хувьд ч ялгаагүй. Тугаа алдах дөхөж, сонгуульд дараалан ялагдаж явахад нь нүүр буруулж хил дамнан алга болсон зүс буруулагчдын жагсаалт цөөнгүй л байгаа. Тэд одоо бүгд Тусгаар тогтнолын ордны шатаар гүйдэлтэй болсон сураг байна.
Улс төр бохир гэдэг ч ёс зүйгүй, хүн чанаргүй улс төр хийхийг хүлцэх хэмжээнд ард түмэн хүлээж авахгүйг сануулмаар.
Пүрэвжавын Баярхүү / тоймч/