Энэ үгийг Ерөнхий сайд өчигдрийн Засгийн газрын хуралдааны үеэр Хуульзүйн сайдад хандаж хэлсэн гэнэ. Үүнээс үүдэж, Д.Дорлигжав сайд Засгийн газрын хуралдааны танхимын хаалгыг саваад гарсан сураг байна. Ерөнхий сайд аргаа ядаад энэ үгийг хэлсэн биз. Шийдлийн гэж нэрлэгдсэн Засгийн газрын түүх бичигдэх хугацаа хоёрхон сарын дараа дуусна. Ийм бага хугацаанд танхимаа өмөлж, цөмлөх сонирхолгүй байгаа ч дуугүй сууж тэвчээгүй байх.

Д.Дорлигжав Монгол Улсын Хуульзүйн сайд учраас тэр хуулийг дээдлэгч, хэрэгжүүлэгч, товчхондоо үлгэр жишээ үзүүлэгч байх учиртай. Харамсалтай нь Хуульзүйн сайдын нэрийг барьж, хуулийг хэрхэн завхруулж болдгийг хангалттай харууллаа.

УИХ-ын гишүүн Х.Баттулгын туслах нарыг шалгаж, саатуулж эхэлснээс энэ асуудал үүдэлтэй. Х.Баттулгын туслах Г.Түвшинжаргалыг цагдаагийн байгууллагаас шалгаж, саатуулав. Үүнийг Х.Баттулга өөрийг нь улс төрөөс шахан гаргах зорилготой хууль зөрчсөн үйлдэл хэмээн харж, Хуульзүйн сайдаас тусламж хүсэв. Харин Хуульзүйн сайд Д.Дорлигжав тэр даруй нь Шүүхийн Ерөнхий зөвлөлийн дарга, Улсын дээд шүүхийн ерөнхий шүүгч, Улсын ерөнхий прокурор, Цагдаагийн ерөнхий газрын дарга нарт яаран албан бичиг илгээж, тус хэрэгт биечлэн анхаарал тавихыг эелдгээр даалгасан. Хуульзүйн сайдын нэр барьж, шалгагдаж буй хэрэгт нөлөөлөхийг санаархсан эхний оролдлого нь энэ.

Үүний дараа хуулийнхан “Баялгийн хувь”, "Түмэн хишигтэн" компанийн санхүүгийн тайланд нэгжлэг, шалгалт хийхэд Х.Баттулга мөн л Хуульзүйн сайдад хандсан. Тэрбээр нэгжлэг шалгалт хийхдээ хуулийнхан хүч хэрэглэж, амь насанд нь халдахыг завдсан хэмээн ЦЕГ-ын дарга Р.Чингисийг шалгаж өгөхийг хүссэн. Үүнтэй зэрэгцэн УИХ-ын гишүүн Л.Эрдэнэчимэг мэдээлэл хийж, Р.Чингисийг цагдаагийн байгууллагаас зайлуулахгүй бол Засгийн газрыг чинь унагаана хэмээн Ерөнхий сайдыг сүрдүүлэв.

Х.Баттулгын хүсэлт, Л.Эрдэнэчимэгийн сүрдүүлгийг харгалзан үзсэн Хуульзүйн сайд Д.Дорлигжав ЦЕГ-ын дарга Р.Чингисийг үүрэгт ажлаас нь чөлөөлөх хүсэлтийг Ерөнхий сайдад илгээв. Р.Чингисийг ажлаас нь чөлөөлөх Д.Дорлигжавын үндэслэл үнэндээ бол өрөвдөлтэй. Салбарын яамыг мэдээллээр хангадаггүй, гаргасан шийдвэр нь хууль болоод нөхцөл байдалд нийцдэггүй гэх мэт дулимагхан шалтгааныг тооцсон. Р.Чингисийг чөлөөлөх саналд улс төрийн зорилго байхгүй гэж Хуульзүйн сайд ярьсан ч бодит байдлыг, үнэнийг хүмүүс харж, мэдэж байгаа. Эрх мэдэл, албан тушаалаа ашиглаж, хуульд халдсан бас нэг оролдлого нь энэ.

Харин энэ бүхнийг Ерөнхий сайд хүлээж аваагүй, тэвчээгүй нь Д.Дорлигжавын уурыг хүргэжээ.

УИХ-ын гишүүн Ц.Нямдорж ньюс.мн сайтад өгсөн ярилцлагадаа “Н.Энхбаярыг баривчлахыг мэдсэн үү? Телевизээр харсан уу, яагаад цагдаагаа татаагүй юм” гэж тал, талаас нохой шиг боргоод байхаар нь зэвүү хүрээд “Би унтаж байсан” гээд хэлчихсэн юм. Яагаад гэвэл хэрэг бүртгэх, мөрдөн байцаах, гүйцэтгэх ажиллагаанд хөндлөнгөөс оролцож саад учруулахыг хуулиар тас хориглосон, зөрчвөл шийтгэх ёстой юм” хэмээн ярьжээ. Тэр Хуульзүйн сайдын хэм хэмжээ болоод зангарагийг харуулснаа өнөөдөр бахтайгаар ярьж байна. Яагаад Д.Дорлигжав өмнөх сайд Ц.Нямдорж шиг байж болдоггүй юм бэ.

Тухайн үед Н.Энхбаяр, Ц.Нямдорж нар өнөөгийн Д.Дорлигжав, Х.Баттулга хоёроос ялгаагүй нэг намын нөхөд байгаад зогсоогүй хамтран ажиллагсад байсан. Гэтэл Ц.Нямдорж яагаад Н.Энхбаярыг өмөөрч, элдэв бичиг ийш тийш нь шидэж, гүйцэтгэх ажиллагаа явуулсан хуулийн байгууллагын даргыг зайлуулах гэж улайраагүй юм бэ. Түүнд Д.Дорлигжав шиг аашлах албан тушаал, эрх мэдэл нь байсан. Гэхдээ тэр хэрэг бүртгэхээс эхлээд гүйцэтгэх ажиллагаа явуулах, хорьж цагдах ажиллагаанд хэнбугай ч хөндлөнгөөс оролцохыг хуулиар хориглосныг мэддэг учраас “унтаж байсан”.

Харин Д.Дорлигжав хуулийг зөрчиж, хэрэгт хөндлөнгөөс оролцож, бүр нөлөөлөхийг санаархсан. Хэсэг бүлэгт төрийн сайд бүр хуульзүйн салбарыг толгойлж буй хүн улаан цайм ингэж үйлчилж болох уу. Тэр энгийн нэг иргэний өмнөөс ингэж гүйдэг бол хэлэх үг алга, ажлаа л хийж байна гэж ойлгогдоно. Гэвч шалгагдаж, хоригдсон Дорж, Батын төлөө Хуульзүйн сайд хуруугаа ч хөдөлгөдөггүй. Харин хэсэг бүлэг улстөрчийн төлөө албан тушаалаа ашиглаад байгаа нь зүйд нийцэх үү?!

В.Хэрлэн