МАН-ын дарга М.Энхболд, МАХН-ын дарга Н.Энхбаяр хоёр их л сэтгэл хангалуунаар инээмсэглэж, эзэн Чингис хааны хөшөөнд хүндэтгэл үзүүлэхээр шатаар өгсөж буйг та бүхэн харж байна. Одоо тэдний дунд хэн нь намаа удирдаж, сонгуульд оруулах вэ гэсэн асуулт л үлдэж буй болов уу.
Өвлийн эхэн сард яригдаж эхэлсэн МАН, МАХН-ын нэгдэх асуудал бараг тодорхой болов. Хоёр намын ахмадууд сонгуульд хамтран орох өргөх бичиг барьж эхэлсэн уг асуудал анхандаа гишүүд, дэмжигчдийн санал санаачилга болон харагдаж байв. Улс төрийн энэ тоглолт өдгөө тайзнаа ил тавигдаж, баяраа ч хамтран тэмдэглэв. Угшил нэгт МАН, МАХН улс орны язгуур эрх ашиг, сайн сайхны төлөө хувийн эрх ашгийг хойш нь тавьж хамтарч нэгдэж, ойлголцон зөвшилцөж ажиллах нь чухал хэмээн их том бас энэрэнгүй агуулгаар баяраа илэрхийлж, хамтрах эхлэлийг баярын маршаар эхлүүллээ.
Нэгдэхийг үгүйсгэхгүй, нэгдэхээс татгалзахгүй, нэгдэж магадгүй гэсэн үгс хоёр намын удирдлагуудын амнаас байнга гарч буй. Баярын хурлын үеэр ч энэ үгсээ бататгаж байв. Гэхдээ нэгдэж нийлэх асуудал сонгуулийн дараа л шийдэгдэх болов уу. Хуулиар сонгуулийн өмнө намууд нэгдэх боломжгүй. Харин эвсэх нь нээлттэй.
МАХН-ын дарга Н.Энхбаяр “Бидний цаашдын үйл ажиллагаа тус тусдаа үргэлжилсэн хэвээрээ байх уу, эсвэл хамтдаа өрнөх үү гэдэг нь олны сонирхол, анхаарал татсан асуудал гэдгийг та бид бүгдээрээ ойлгож байгаа. Та биднийг хамтраасай гэж хүсч байгаа нэг хэсэг байхад, тус тусдаа байгаасай гэж харж байгаа өөр нэг хэсэг хүн байгааг бид ойлгож байна. Хоёр нам нэгдэх асуудал хууль эрх зүй, бэлтгэл ажил, цаг хугацааны болон сэтгэл зүйн хувьд боломжгүй болсныг хаа хаанаа ойлгож байгаа. Харин УИХ, орон нутаг, Ерөнхийлөгчийн сонгуульд эвсч, нэг субьект болж орох боломж бололцоо та бидэнд нээлттэй байгаа. Хийх хүсэл эрмэлзлэлийн хувьд та бидний хооронд босгосон нурааж дийлэхгүй тийм том хана хэрэм байхгүй гэдэгт илтгэлтэй байдаг” гэв. Түүний хувьд сонгуульд хүч хавсрах саналаас татгалзахгүй гэдгээ товч бөгөөд тодорхой илэрхийлсэн нь энэ.
Харин МАН-ынхан хамтрах асуудлыг үгүйсгэхгүй байгаа ч харзнасан байр сууринаас хандаж буй. МАН-ын Ерөнхий нарийн бичгийн дарга Ж.Мөнхбат “хамтрах асуудлаар хоёр нам тодорхой санал тавиагүй байгаа. Баярын дараа хамтдаа хэлэлцэнэ” гэсэн хариултыг өгөөд байгаа.
Өнгөрсөн дөрвөн жилийн хугацаанд цөөнх болж, үгээ хэлэх гэж үйлээ үзсэн МАН-ынханд МАХН-тай хамтрах нь алтан боломж. Өчигдрийн баярын хурлаас ажиглахад МАН-ын М.Энхболд бус МАХН-ын Н.Энхбаяр танхимд цугласан хоёр намын гишүүд, дэмжигчдэд илүү таалагдаж буй нь харагдсан. Тэгэхээр ирэх дөрвөн жилд дахин танхимын гадна үлдэхгүйн тулд Н.Энхбаяр гэх фигурыг ашиглах нь МАН-д өлзийтэй болов уу. Харин МАХН-ын хувьд парламентад одоогоос илүү олон суудал авах нөхцөл бүрдэнэ. Тиймээс ч Н.Энхбаяр хамтрах саналд илт уриалгахан хандаж, өнөөдөр ч асуудлыг шийдэхэд бэлэн буй.
Ийн угшил нэгт улс төрийн хүчнүүд хамтарч эвсэх асуудалд цэг тавигдах дөхөж буй бололтой. Тэдний хамтын ажиллагаа нэг хэсэгт түгшүүр, нөгөө талд баярын мишээл авчирна. Баярын марш хойшид хэрхэн үргэлжлэн эгшиглэх нь ч сонирхол татах асуудал хэвээр үлдэнэ.
В.Хэрлэн
| Уншиж байна |