Сэтггүүлч Л.Болормаа агсан гэнэт нас барсан мэдээ олныг цочирдуулж байлаа. Тэрээр өнгөрсөн сарын 20-21-нд шилжих шөнө гэртээ нас барсан ба тухайн үед хүчний байгууллагаас “Талийгаачийн үхэлд гаднын ямар нэгэн нөлөө байгаагүй” гэсэн анхны дүгнэлтийг  хэлж байлаа. Гэвч үхлийн шалтгааныг тогтоох шинжилгээний хариу гаднын нөлөөтэй байж болохоор гарчээ.

Энэ талаар тус хүрээлэнгийн чанарын менежер С.Одончимэг “Дагзны яс хугарснаас үүдэн хүчтэй доргилт үүссэн. Доргилттой холбоотой гэмтлийн гаралтай цус харвалт болсон. Энэ нь шууд үхэлд хүргэсэн” хэмээн мэдэгдлээ.  Ийм төрлийн гэмтэл нь савж унахад эсвэл гаднын нөлөөллөөс болдог мэргэжлийн эмч нар тайлбарлажээ. 

Сошиал хүрээнд сэтгүүлч Л.Болормаа агсаныг гадны нөлөөтэй амиа алдсан байж магадгүй гэсэн таамаг жиргээ ихээр явсан ч талийгаачийн гэр бүлийнхнийг хүндэтгэх үүднээс шинжилгээний хариу хүлээн тэгсгээд намжсан.

Л.Болормаа агсан уул уурхайн сэдвээр судалгаа шинжилгээтэй дагнан бичдэг байсан. Түүний сүүлийн нийтлэлүүд хөрөнгө оруулалт, эдийн засгийн томоохон асуудлуудаар бичсэн эрэн сурвалжлах өнгө аястай байсан ба энэ нь түүний амь насаа алдахад хүргэсэн байж болох таамаг сэжиг нийгэмд үлдсэн. Үүний мухарлаж сэтгүүлч бусгүй бусдын гарт амиа алдсан эсэхийг тогтоох ажлыг цагдаагийнхан эхлүүлж байгаа бололтой.

Машинаа тавихаар гэрээсээ гараад сураггүй болж Хөвсгөл далайгаас цогцос нь олдсон байгаль хамгаалагч залуугийн учир битүүлэг үхлийн шуугианы араас сэтгүүлч бүсгүйн гэнэтийн үхлийн шалтгаан нь гаднын нөлөөтэй байж болохоор гарсан нь Монголд үнэний төлөө явсан, шудрага ёсны төлөө тэмцсэн хүмүүс амиа алдаад байна уу гэсэн түгшүүр айдсыг нийгэмд бий болголоо. Энэ бүхний хариултыг олж хэрвээ гаднын нөлөөтэй бол гэм буруутныг олж тогтоох шаардлага  олон нийтийн зүгээс тавигдаж байгаа юм. Энэ хэргүүд дээр шуурхай ажиллаж хэргийн үнэн мөнийг олох нэлээн хүнд үүрэг цагдаагийнханд оногдож байна.

Д.Баяр