Аймгийн төвүүдийг засмал замаар холбосон гавьяа хэнийх вэ?, ТҮЦ машин нэвтрүүлж, төрийн үйлчилгээг түгжрэлгүй болгосон гавьяа хэнийх вэ? гэхчлэнгээр хэн нэгэн гавьяатныг хайсан асуулга бүхий самбар хотын төвөөр “дүүрэн”. Шууд утгаар нь ойлгож, хариулах гэж үзвэл энэ бүх ажлыг эхлүүлсэн Шинэчлэлийн Засгийн газар, тэргүүн Н.Алтанхуягийн гавьяа. Цаашлаад түүний ажлыг үргэлжлүүлж байгаа Шийдлийн Засгийн газар, тэргүүн Ч.Сайханбилэгийн гавьяа болж харагдана. Энэ өнцгөөс нь харвал Н.Алтанхуяг эсвэл Ч.Сайханбилэг өөрийн хийсэн ажлаа рекламдах гэсэн оролдлого гэж хардаж болно.

Бүр цаашлаад АН-ынхны 25 жилийн ойн баяртаа барьсан бэлэг ч гэж тайлбарлаж болно. Ардчиллынхан энэ сарын 6-нд баяраа тэмдэглэж, хундага өргөнө. Өнөө, маргаашгүй болох ойн баяртаа зориулж, олон нийтийн ой санамжийг шалгасан байж болох талтай.

Бүр нөгөө талаас нь бол АН-ынхны Х.Баттулгад өгч буй сөрсөн базаа ч байж болох. АН-ын томчуудын нэг Х.Баттулга МоАХ-ны салбар зөвлөлийн удирдлагуудад мэдэгдэл хүргүүлж, 25 жилийн ойн баярыг тэмдэглэхгүй гэдгээ албан ёсоор сануулсан. Тэрбээр “...та бидний итгэл сэтгэлээр төрийн өндөр албан тушаалуудад олон жил суусан зарим хүмүүс төрийн ажлыг гацаан, төгс замхруулж байгаа энэ үед Ардчилсан хувьсгалын 25 жилийн ойг баяр хөөр, шагнал цэнгүүнээр тэмдэглэх нь өнөөгийн нөхцөлд нийцэхгүй” учраас баяр болгон тэмдэглэхгүй гэх том даалгаврыг өгсөн. Хэдийгээр МоАХ-ынхонд хандсан мэт боловч түүний албан бичигт намынхаа удирдлагуудад хаягласан үг, өгүүлбэр олон бий. Товчхондоо Х.Баттулга АН-ын доторх бүлэглэлийн зөрчил ардчиллыг үгүй хийж буйг сануулж, явсан замаа эргэж харах, өөрчлөгдөх, алдаа оноогоо цэгнэх цаг болсныг хэлсэн.

Ингэж баярлах замд нь садаа болсон учраас АН-ынхан Х.Баттулгад “бэлэг” барьж, хотын гудамжаар “дүүрэн” гавьяатныг хайсан самбар байрлуусан байж болох. Энэ бүхнийг АН хийсэн, үүний гавьяатан нь АН учраас баярлах эрхтэй гэдгийг намын нөхөртөө сануулсан байхыг үгүйсгэмгүй.

Ардчиллын баярыг АН-ын томчууд хундага харшуулж, нэгнээ шагнаж тэмдэглэдэг. Ер нь бол дарга нарын баяр л гэсэн үг. Харин энэ баярт нь Х.Баттулга гашуун үгээр хачир нэмж, тэмдэглэбэл та нар “хөгийн гар”-ууд гээд хэлчихсэнд нь уурссан АН-ын томчуудын хариу үйлдэл, санаа хотын гудамжинд заларчихаад байгаа ч юм билүү, хэн мэдлээ дээ.

В.Хэрлэн