“Монгол цэрэг-бүтээн байгуулалт” хөтөлбөрийг УИХ батлаад багагүй хугацаа өнгөрч байна. Гашуун Сухайт, Сайншанд, Бичигт-Хөөтийн чиглэлд тавих төмөр замын ажилд 10 мянган цэрэг дайчлахаар төсөвт 24 тэрбум төгрөг суулгасан. Төсөв хөрөнгө нь ч батлагдаж, хэрэгжүүлэх үйл явцыг нь ярьж буй энэ үед уг хөтөлбөрийн талаар эерэг, сөргөөр яригчид гэнэт гарч ирэв. УИХ дээр яригдаж байх үед МАН-ынхаас өөр эсэргүүцэгчгүй байсан хөтөлбөрийг батлагдсаны дараа яагаад ярих болов.
Хотын дарга Э.Бат-Үүл цэрэгжсэн эдийн засгийг бий болгож, ардчилал, чөлөөт эдийн засгийг сүйтгэнэ хэмээн гэнэт олныг цочтол ярив. Тэрбээр “Ардчилал хөгжсөн Монгол оронд 25 жилийн дараа их цочирдмоор зүйлийг олж харлаа. Уг нь хувийн хэвшлээ дэмжих тал дээр улам л их хүч хаях шаардлага тулгараад байгаа. Гэтэл төмөр замыг 10 мянган цэрэг татаж бариулах тухай яригдаж байна. Энэ чинь чөлөөт эдийн засаг, ардчиллыг сүйтгэнэ гэсэн үг юм. Цэргийн эдийн засаг бий болно гэсэн үг. Хэрвээ ажил хийе гэж хүсвэл цэрэгт л орох шаардлагатай болно. Ийм аймшигтай зүйлийг манай улстөрчид яриад сууж байна. Ийм үйл ажиллагааг дарангуйлагч нар л хийж байсан. Х.Баттулгыг Сталин, Гитлерийн сүнсийг босгож ирэх юм гэж би яаж мэдэх вэ” хэмээн их л эмоцитойгоор үзэл бодлоо илэрхийлэв.
УИХ-ын гишүүн Ч.Хүрэлбаатарын хэлдгээр “Э.Бат-Үүл Хойд Солонгос яваад их юм ойлгосон бололтой”. Түүний араас Э.Бат-Үүлийн зөв, буруу гэж бодлоо илэрхийлэгчид цөөнгүй гарч ирэв.
Л.Чинбат: Э.Бат-Үүл "солиорсон" байна
Гацуурт компанийн захирал Л.Чинбат “Э.Бат-Үүл "солиорсон" байна. Ажил хийж үзээгүй хүний үг ийм байдаг. Хөгжлөөрөө 50 жил хоцорсон манайх шиг улсад хөдөлмөр хийх боломжтой хүн бүр ажиллаж байх ёстой! Цэрэг байна уу хэн байх нь хамаагүй. Бүх хүчийг дайчлах ёстой! Гадаадуудад мөнгө өгч Монголчууддаа дамлаж зарахыг боддог хүмүүс зөвхөн өөртөө л ашигтай байдаг” гэж хотын даргыг үгүйсгэв.
Ч.Хүрэлбаатар: Тэр Хойд Солонгос яваад их юм ойлгосон бололтой
Харин УИХ-ын гишүүн Ч.Хүрэлбаатар хотын даргыг дэмжиж буйгаа мэдэгдэв. Тэрбээр “10 000 цэргээр төмөр зам бариулах нь манай улсын хөгжлийн бодлоготой нийцэж байгаа юу? гээд Засгийн газар, УИХ-ын дарга нараас хариулт авч чадаагүй асуултандаа Бат-Үүл даргаас хариулт авлаа. УИХ дээр энэ асуудлыг биднийг эсэргүүцэж байхад Бат-Үүл нэг ч үг дуугараагүй. Одоо ингэж хэлж байхыг бодоход тэр Хойд Солонгос яваад их юм ойлгосон бололтой. Оройтож дуугарч буй ч Бат-Үүл даргад баярлалаа. Амаа үдүүлээд чимээгүй болчихгүй байхыг танаас гуйя” гэж аминчхан захиас үлдээв.
Төмөр замын ажилд 10 мянган цэрэг дайчлах хөтөлбөрийг хэрэгжүүлэх ажилд ханцуй шамлан ороод буй. Хөтөлбөрийн авторын нэг УИХ-ын дарга З.Энхболд холбогдох яамдын сайд, газрын дарга нарыг Батлан хамгаалах яаманд цуглуулж, их л нухацтай ярилцсан дуулдана лээ. Тэрбээр төмөр замд ямар хэмжээний ажиллах хүч хэрэгтэй байгаа хийгээд хөтөлбөрийг хэрэгжүүлэх ажлын явцтай танилцаж, санаачилсан ажилдаа чамгүй ач холбогдол өгч буйгаа харуулсан.
УИХ-ын даргад танилцуулсан судалгаагаар төмөр замын бүтээн байгуулалтын ажилд одоогоор 3362 ажилтан шаардлагатай байгаа аж. Гэхдээ нь энэ төмөр замын газар шорооны ажил буюу хүнд машин, механизмын оператор, завсарчин, мэргэшсэн жолооч, бетон арматурчин, геодезийн техникч гэх мэт ажлын байр шаардлагатай ажилтнуудын тооцоо аж.
Хөдөлмөрийн насны залуусыг бүтээн байгуулалтад дайчилна, дайчилж болохгүй гэсэн талцаан үргэлжилж байна. Хамгийн гол асуудал нь орсон борооны араас яагаад цув нөмрөв?!
В.Хэрлэн
| Уншиж байна |