Ч.Сайханбилэгийн Засгийн газар, Сангийн сайд Б.Болорын зоригийг үнэлье. Амнаас унах үг бүрийг улстөржүүлж, ажил явуулдаггүй өнөө цагт том зориг гаргаж, төрийн том бүтцийг жижгэрүүлэх тухай ярьж, 2016 оны төсвийн төсөлд тусгаж, эхний алхмаа хийж чадлаа. Монголын нийгмийг төрийн албан хаагч, ажилгүйчүүд гэж хоёр л хуваах хэмжээнд хүртэл данхайсан бүтцэд таналт хийх цаг аль хэдийнэ өнгөрсөн ч, хэн ч гараа хөдөлгөөгүй. Харин Шийдлийнхэн энэ яриаг ажил болгож чадлаа. 15 яамыг 9 болгож, хумина. 19 агентлагийг ч зүгээр орхихгүй. Татварыг Гаалийн газартай, статистикийн байгууллагыг бүртгэлийн газартай гэхчлэнгээр нэгтгэж,Худалдан авах ажиллагааны газар, Төрийн өмчийн хороог татан буулгана. Мөн дэд сайд гэх албан тушаал ч Монголд хэрэггүй.

Энэ бүхнийг зоригтойгоор хийснээр төсвийн зарлагыг 1.6 их наядаар хэмнэнэ. Төрийн данхар бүтцээс болж, 8.6 их наяд төгрөгт хүрээд байсан төсвийн зарлагыг 7 их наяд руу оруулжээ. Долоон их наяд гэдэг нь ч том тоо. 2016 оны төсвийн орлого 6.9 их наяд төгрөг байхаар тооцсон байгаа. Тэгэхээр төрийн бүтцэд үүнээс ч илүү их таналт хийж, зардлыг бууруулах ёстой. Гэхдээ эхлэл бол хамгаас чухал.

Сүүлийн 6-7 жилд Монголын төр барилгын компани шиг ажиллаж ирсэн гэж Сангийн сайд Б.Болор туйлын үнэнийг хэлжээ.Төрийн бүх байгууллага өөр өөрийн байшин савтай. Тэр нь хэдэн арван давхар. Тухайлбал, Татвар, гаалийн ерөнхий газрууд тус бүртээ найман давхар байшин эзэгнэдэг. Энэ хоёр байгууллагыг нэгтгэснээр найман давхар нэг байшингийн урсгал зардал хэмнэгдэнэ. Мөн суларсан байшинг борлуулж, төсөвт нэмэр хийнэ. Агентлагуудыг нэгтгэж, татан буулгаснаар дарга, жолооч нарын тоо ч багасч, унааны зардал танагдана. Сул зогсох машинуудыг хувьчлах зэргээр хэдэн жилийн турш хий дэмий урсгаж байсан төсвийг хөрөнгийг хэмнэж, зөв голдрилд нь оруулна.

Төрийн бүтцийн өөрчлөлтийг 2016 оны төсвийн төсөлд тусгаж, эхний алхмыг амжилттай хийлээ. Харин одоо дараагийн алхамд УИХ-ын дэмжлэг хэрэгтэй байна.УИХ ирэх оны төсвийг арванхоёрдугаар сарын 1-нээс өмнө батлах учиртай. Хуулийн хугацаанд батлах нь тодорхой. Харин батлахдаа Засгийн газраас оруулж ирсэн төслийн өнгө зүсийг битгий их өөрчлөөсэй. Наанадаж л төрийн бүтцэд өөрчлөлт оруулах хугацааг сонгуулийн дараа гэж бүү хойшлуулаасай. 2016 оны төсөв шинэ оны эхний өдрөөс эхлэн хэрэгжих ёстой ч манай улстөрчид эрх ашгийнхаа төлөө яаж ч өөрчилж магадгүй. Цалин тэтгэврийг нэмэх боломжгүй гэж хэлсэн Б.Болорын шүлс хатаж амжаагүй байхад МАН-ынхан нэмэх ёстой хэмээн улстөржүүлж л байгаа. УИХ-ынхан хүнд хэцүү цагт төрийн албан хаагчдыг цомхотгож, ард түмэндээ хатуурхлаа хэмээн өр зөөлөн дүр гаргаж чадах л нөхөд. Өнөөдөр эхийнхээ хэвлийд бойжиж буй ургаас эхлээд зах дээр тэрэг түрж буй залуу, гудамжинд жин үзүүлж суугаа өвөө эмээ, татварынханд дансаа хаалгачихаад аргаа барьж байгаа хувийн хэвшлийнхэн, байрны зээлэндээ дээрэлхүүлж буй залуу гэр бүл, хүүхдүүдийнхээ өвлийн хувцсанд санаа зовниж буй эцэг эх гээд Монголын гурван сая хүний асуудал учраас улстөржүүлж болохгүй.

Ерөнхий сайд Ч.Сайханбилэг ч шинэ оны ажлын эхний өдөр Засгийн газрын бүтцийн төслөө УИХ-д мэдүүлж, эхэлсэн ажлаа яаравчлах хэрэгтэй. Нам, улс төрийн карьер, нэр хүнд, дараагийн сонгуулийг бодох цаг хугацаа, боломж бололцоо байхгүйн дээр байдлыг улам л хүндрүүлнэ. Аргалж, аргацааж болох ч зориг гаргаж эхэлсэн зүйлээ тууштай үргэлжлүүлж, дуусгавал энэ ажил Шийдлийн Засгийн газарт том оноо өгөх авчрах нь дамжиггүй.

В.Хэрлэн