Н.Энхбаяр иржээ. Түүнийг Ерөнхий сайд Ч.Сайханбилэг “тосч авчээ”. Ерөнхий сайд Н.Энхбаярыг нисэх буудалд тосч, гар барин угтсан эсэхийг нүдээр хараагүй ч таамаг дэвшүүлэх нэгэн сэжим байна. Ерөнхий сайд өчигдөр Чингис хаан олон улсын нисэх буудалд хийгдэж буй засвар, шинэчлэлийн ажилтай танилцахаар тэнд очжээ. Гэнэтийн гэж тодотгосон энэ танилцах үйл явц Сөүл-Улаанбаатар чиглэлийн онгоц буух үетэй давхацжээ. Яг л хувьсгалын тохироо бүрдсэн гэдэг шиг Ерөнхий сайд Ч.Сайханбилэгийг нисэх буудлын үйл ажиллагаатай танилцах яг тэр үеэр Н.Энхбаярын зорчсон онгоц газардаж. Нөгөө талаас нь Н.Энхбаярыг ирэх үетэй давхцуулж, Ерөнхий сайд нисэх буудлын үйл ажиллагаатай танилцах нэрээр түүнийг тосч, “Ах аа намайг бодоорой” гэсэн ч юм билүү, хэн мэдлээ. Санаатай, санаандгүй нь бүрхэг энэ давхцал Шийдлийн Засгийн газрын хувь заяатай шууд холбоотой байхыг үгүйсгэмгүй.

Н.Энхбаяр өдгөө ч Монголын улс төрд том орон зайг эзэлж буй гэдгээ ирж, буцахдаа харуулсан. Солонгост амьдарч, эх орондоо бууж мордохдоо л Шинэчлэлийн Засгийн газрын “хойдох”-ыг уншчихаад явсан удаатай. Н.Алтанхуягтай хамтран ажиллах гэрээ байгуулж, намдаа ирэх сонгуулийн баталгааг гаргуулж авсан нь АН-ынхныг хэсэгтээ л сандаргасан. Үүнээс үүдэж, Монгол Улсын Ерөнхий сайд, АН-ын дарга байсан Н.Алтанхуяг шахагдаж, сул гишүүн болохдоо тулсан. Харин одоо тэр Ч.Сайханбилэгийг аргагүй байдалд оруулахаар ирэв бололтой. МАН-ыг Засгийн газраас хөөж гаргасан АН-ынханд өдгөө тулж түших ганц хүчин нь МАХН, ганцхан үгээр хэлбэл Н.Энхбаяр болоод байна. Тиймдээ ч Шадар сайдын суудлыг Н.Энхбаяр эсвэл түүний хүү Н.Батшугарт хадгалж буй гэх цуу ч тархсан. Н.Энхбаярын далбаан дор ТОМ байгаа Шударга ёс эвслийнхэн Засгийн газраас дөрвөн суудал шаардаж, эх баригчдын толгойны өвчин болсон сураг ч бий. Ямар нь ч байсан Ч.Сайханбилэгийн Засгийн газарт Н.Энхбаяр түүний тойрон хүрээлэгчид том тоглогч болох нь нэгэнт тодорхой болов.

МАН-ын сайд нарыг хөөх сургаар АН-ынхан дараагийн сайд нараа тодруулж, тамга тэмдгийг нь гардуулах л үлдээд байсан. Гэвч бүтэн долоо хоног өнгөрч байхад энэ асуудал таамаг дагуулан таг чиг байсаар байна. Өнгөн дээрээ АН-ынхны зодоон мэт харагдах ч үнэн хэрэгтээ энэ асуудал Н.Энхбаярыг хүлээж байсан байж ч болох. Магадгүй “том ах” Сөүлээс хүлээх тушаалыг өгсөн ч юм билүү. Харин одоо тэр ирлээ. Ажлын өдрүүд дуусахтай зэрэгцэн Ерөнхий сайд Ч.Сайханбилэг сайд нарынхаа нэрийг өргөн барих л үлдлээ.

УИХ-аар Өршөөлийн хуулийг яаран баталсан нь ч Н.Энхбаяртай холбоотой биз ээ. Энэ хуулийн ачаар тэр “цэвэршиж”, дахин төрийн толгойд суух ч бүрэн боломжтой. Тэр суудал руу ахих шатыг Ч.Сайханбилэгийн Засгийн газар хэмээн харсан байж ч болох. Зуны сар шувтарч, сэрүүн намар ирж байгаа ч Н.Энхбаярын “ач”-аар улс төрийн уур амьсгал халуунаас халуунаар өрнөх нь ээ.

В.Хэрлэн