Цаана чинь, УИХ-ын гишүүд Ерөнхий сайдыг огцруулах авторыг булаацалдаад сүйд. Би анхны санааг гаргасан, бид эхэлж баримтыг гаргаж ирсэн гээд л ар араасаа сайхан явж байна аа.

Эхлээд УИХ-ын гишүүн Г.Уянга, Х.Болорчулуун, Ц.Даваасүрэн, Б.Бат-Эрдэнэ нар Ерөнхий сайдыг огцруулах бичиг сэлт бэлдэж байгаагаа хэвлэлийнхэнд мэдэгдэв. Энэ үеэр Г.Уянга “Би Ч.Сайханбилэгийг Ерөнхий сайд болох үед Оюутолгойн гэрээг муу явуулбал огцруулах саналыг өөрийн биеэр өргөн барина гэж хэлсэн. Тиймээс би өнөөдөр Ерөнхий сайдыг огцруулах саналыг гаргаж байна” хэмээн дурсамжаа нэхэн санав. Ерөнхий сайд болоогүй байхад нь л огцруулна гэдгээ хэлсэн юмдаг уу даа. Тэгэхээр Ч.Сайханбилэгийг огцруулах автор яах аргагүй Г.Уянга гишүүнийх бололтой.

Г.Уянгаа гишүүн ингэж хэлээд шүлс нь хатаж амжаагүй байтал Өргөдлийн байнгын хорооны дарга О.Баасанхүү “Ерөнхий сайдыг огцруулах асуудлыг анх би гаргаж тавьсан” гээд хэлчихэв. Үнэндээ тэр хэдхэн хоногийн өмнө “Ерөнхий сайд хийж чадах хүн олон байгаа” гэж том дуугарах нь ч дуугарсан шүү. Гэхдээ Ч.Сайханбилэгийн Ерөнхий сайд болж амжаагүй байхад нь огцруулах тухай ярьсан Г.Уянга анхдагч баймаар. Тэгтэл О.Баасанхүү гишүүн автор минийх гэх юм. Огцруулах санаачилга үнэхээр том гавьяа бололтой.

За ингэж байтал УИХ-ын гишүүн С.Ганбаатар Оюутолгойн гэрээ Монгол Улсыг дааж давшгүй өрөнд оруулсан, аймшигтай гэрээ болсон гэж ярив. Монгол мөддөө ашиг хүртэхгүй харин ч 8.1 тэрбум ам.долларын өрөнд орно гэхчлэнгээр эрхэм гишүүн их л нухацтайгаар бараг заалт бүрийг нь бидэндээ тайлбарлаж өгсөн. Ер нь энэ Ч.Сайханбилэг чинь хаа байсан Арабд очоод Монголыг худалдчихаад ирсэн юм биш үү гэж бодох шахсан шүү.

Ингэж өдөр нь бөөн тоо баримтаар бөмбөгдүүлж, энэ Ганбаа гишүүн үнэхээр мундаг шүү гэж биширч шүтэхийн даваан дээр түүнийг хэн нэгнээс будаа идсэн гэдгийг зурагтаар ярьж байхын. УИХ-ын гишүүн Д.Тэрбишдагва ТВ5 телевизээр “Манай Ганбаатар энэ тэрийн яриад байгаа тоог чинь бид гаргаж ирсэн юм ш дээ. Хоёр тэрбум гаруй долларын зөрчлийг бид илрүүлсэн” гэж авдаг байгаа. Нэг үгээр бол Ерөнхий сайдыг огцруулах шалтгаан болоод байгаа Оюутолгойн но-г илрүүлсэн анхдагчид нь Шинэчлэлийн Засгийн газрынхан болоод явчихав. Ингэхээр Ерөнхий сайдын суудалд суухаас өмнө огцруулна гэдгээ мэдэгдсэн Г.Уянга гишүүний санаачилга уначихаж байгаа юм. Бас огцруулах асуудлыг анх гаргаж тавьсан гэж ярьсан О.Баасанхүү гишүүн бол бүр цаашаа болчихов. Ганбаа ах бол бүүр худлаа боллоо. Тэр будаа идсэн нь баригдсан учраас бүр навс унав. Тэгэхээр явж явж Шинэчлэлийнхэн Шийдлийнхийг унагаах болчихов уу. Нөгөө Шонхорынхон Алтангадасыг авч хаясан шиг.

Ёстой бүү мэд ээ. Ер нь энэ Ч.Сайханбилэгийг огцруулах автор яг хэнийх юм бэ. Ямар ч байсан энэ огцруулах санаачилга их том гавьяа бололтой. Минийх, биднийх гээд байхыг бодоход эндээс их л том зүйл олж долоох нь гарцаагүй. Иргэдээс эсвэл бүр сэтгүүлчдээс гэж тусгайлан санал аваасай, Ч.Сайханбилэгийг унагаах талаар. Тэгвэл хамгийн түрүүнд овог, нэрээ бүтнээр нь бичмээр байна. Юмыг яаж мэдэхэв, ямар нэг зүйл долоочих ч юм билүү.

В.Хэрлэн