Монголын хөлбөмбөгийн холбооны ээлжит IV их хурал сарын дараа болно. Энэ хурлаар холбооны ерөнхийлөгчийн сонгууль болж, тус холбоонд салхи оруулах эсэхийг шийдвэрлэх юм. Холбооны ерөнхийлөгчид нэр дэвшигчид ч аль хэдийнэ тодорч, өрсөлдөөн ч ил, далд явагдаж байгаа бололтой. Энэ удаагийн сонгуульд зургаан хүн өрсөлдөхөөр нэр нь тодорчээ.

6

Б.Ганболд- Монголын хөлбөмбөгийн холбооны ерөнхийлөгч

Т.Лхагвадорж- “Вульф Петролеум” ХК-ийн ТУЗ-ийн дарга

Э.Амарсайхан- “2050” ТББ-ын захирал

Б.Мэдрээ- Худалдаа хөгжлийн банкны гүйцэтгэх захирал

Г.Ганхүү- “Дэрэн-хөлбөмбөг” спорт клубийн ивээн тэтгэгч

А.Ганбаатар- Монгол улсын Ерөнхийлөгчийн зөвлөх, МХБХ-ны дэд ерөнхийлөгч гэсэн эрхмүүд өрсөлдөхөөр болсон байна.

 6

Спортын холбоодыг бэл бэнчинтэй хүн удирдах ёстой гэсэн өнцгөөс харвал хэн нь ч гоочлогдохгүй. Саяхан Монголын жүдо бөхийн холбооны ерөнхийлөгч Х.Баттулга Өдрийн сонинд ярилцлага өгөхдөө жүдогийнхонд “хөрөнгө мөнгө-бэлтгэл хийх заал-сайн багш” гэсэн гуравхан зүйлийг шийдвэрлэж өгсөн хэмээн ярьсан байна билээ. Хөлбөмбөгийн холбооны ерөнхийлөгчид нэр дэвшигч эрхмүүдэд энэ хэмжээний бэл бэнчин бий. Харин Монголд хөлбөмбөгийг хөгжүүлье, Азид цаашлаад дэлхийд өрсөлдөх хэмжээний болгох сэтгэл бий эсэх хэн гэх эрхэм тодрохоос ихээхэн шалтгаална.

 6

Одоо хөлбөмбөгийн холбооны ерөнхийлөгчөөр ажиллаж буй Б.Ганболдод ийм сэтгэл огтхон ч байхгүйг өнөөгийн дүр төрхөөс харж болно. 1997 оноос тус холбооны Ерөнхий нарийн бичгийн даргаар ажиллаж, 2010 оноос Ерөнхийлөгч нь болсон. Б.Ганболд гэх хүний албан тушаал л ахиснаас Монголын хөлбөмбөг алхам ч урагшилсангүй. Жүдо, бокс, буудлагын тамирчдын нэгэн адил эх орныхоо хөлбөмбөгчдийн дэмжин, ялж ялагдахад нь хамт байх боломж байсан. Гэвч өдгөө ч Бразил, Англи, Италийн баг хэмээн зурагтаас цааш хэтэрч хараагүй хүмүүсийг балиашиглаж сууна. Товчхондоо Монголд хөлбөмбөгийн спорт сонирхогчийн, балиашгийн түвшнээс цааш хэтэрсэнгүй. Ямар сайндаа л учир мэдэх хүмүүс “олон сайхан аавын хүү зэвэрлээ” хэмээн халаглаж суухав.

 6

Б.Ганболд гэх хүн мөнгөгүйдээ эсвэл Монголын хөлбөмбөгийн холбоо хөрөнгө санхүүгүйдээ энэ спорт хөгжихгүй байгаа юм биш. Манай улс 1998 онд Азийн болон дэлхийн хөлбөмбөгийн холбоонд элссэн байдаг. Энэ үеэс л Монгол руу орж ирэх мөнгөн болон эд материалын тусламж тасраагүй. Үүнийг спортын сэтгүүлч Б.Батзаяа “Монголын Хөлбөмбөгийн холбоо” нийтлэлийнхээ I хэсэгт тодорхой дурдсан байдаг. Тэрбээр нийтлэлдээ “Гоол” төслийн хүрээнд Монголд дэлхийн стандартын шаардлага хангасан хиймэл зүлэгтэй цэнгэлдэх хүрээлэн барих төсөл 2001-10-29-ны өдөр батлагдаж, 450 мянган ам.доллар эхний ээлжинд орж ирэв. Нарийн бичиг Б.Ганболд “Таван цагариг” сонины 2001-09-26-ны өдрийн №324-т өгсөн ярилцлагадаа “Бидэнд 40.000 хүний суудалтай цэнгэлдэх хүрээлэн барьж өгнө, нээлтийн үйл ажиллагаанд Пэлэ, Марадона, Платини, Круйфф нар ирж оролцоно. Англиас 3000 ам.долларын цалинтай хоёр дасгалжуулагч ирж, бүх зардлыг ОУХБХ-ноос хариуцна” гэж хэлж билээ. Гэтэл одоо баригдчихсан байгаа нь 40 биш 4 мянган хүний ч багтаамжгүй байгаа нь ам ажил хоёрын тэнгэр газар шиг зөрөөг харуулж байна. Төслийн дараагийн санхүүжилт 2004-09-22 онд батлагдаж 400.000 ам.доллар орж ирлээ” хэмээн тодорхой баримтыг дурджээ. Энэ мэтээр Монголын хөлбөмбөгийн холбоонд ирэх тэтгэмж, тусламж тасрахгүй. Манай холбоо ч алгаа тосоод сууж байна. Зөвхөн Азийн хөлбөмбөгийн холбооноос манайд жилд 250 мянган ам.доллар өгдөг. Монгол Улсад хөлбөмбөгийн спортыг хөгжүүл гээд шүү дээ. Гэвч энэ тусламж дэмжлэгийн үр дүн харагддаггүй. Хаашаа, хэний халаас руу урсаад байгаа нь тодорхой ч, тодорхойгүй. “Гоол” төслийн хүрээнд баригдсан нэг цэнгэлдэх, хотын төсөв, хувийн хөрөнгөөр байгуулагдсан хэдэн ногоон зүлгээр л Монголын хөлбөмбөгийн бааз суурь төсөөлөгдөж байна.

 6

Монголын хөлбөмбөгийн холбооны ерөнхийлөгч Б.Ганболд “Том мөрөөдөл тээж амьдарцгаая, мөрөөдөлд хүрэх алхмаа бага багаар ахиулж, жигд хурдаар ажиллая!” гэсэн зарчимтай. Түүнийг томоор мөрөөдөж суух хооронд хөлбөмбөгийн спорт улам эрчээ авч, маньтай л адил сураггүй эхнээс гараагаа эхэлсэн улсууд дэлхийн ногоон зүлгэн дээр гишгэж байна. Аль нэг салбар, хүн ч ялгаагүй хурдан өсч дэвжихийг боддог. Гэтэл спортын бүхэл бүтэн холбоог удирдаж байгаа хүн мөрөөдөл яриад, түүнийгээ бага багаар ахиулна гээд сууж байгааг юу гэж ойлгох вэ? Ажиллах зарчим, зорилгоо ингэж хойрго тодорхойлсон хүнээс илүүг хүлээх шаардлагагүй. Манай хөлбөмбөгчид дэлхийд өрсөлдөж, бид Бразил, Испанийг биш Монголын багаа дэмжмээр байна.

 6

Монголд хөлбөмбөгийн спорт хөгжих бүрэн боломж байгаа. Нөөц боломж, тоглогчид гээд. Тиймдээ ч Азийн, дэлхийн хөлбөмбөгийн холбоо “халамж, хайраа” үзүүлдэг. Харин энэ дэмжлэг тусламжийг өөртөө бус хөлбөмбөгийн спортод цаашлаад эх орныхоо нэрийг гаргахад ашиглах хүн энэ салбарт хэрэгтэй. Хөлбөмбөгийн спортыг сонирхдог, үүнд залуу насаа зориулж яваа хэсэг бүлэг хүмүүсийн хүч хөдөлмөрийн үр шимийг тэд ч, бид ч үзмээр байна. Үүний тулд Монголын хөлбөмбөгийн холбоонд одоо л салхи оруулъя.

 6

В.Хэрлэн