Өнгөрсөн жилийн намрын чуулган эхлэхэд ямар байлаа даа. Ам.доллар наадмын тоостой дээшилж 1700 хүрч, гадаадын хөрөнгө оруулалт тэг зааж, төсвийн орлого 1.5 их наяд төгрөгөөр тасалдаад байлаа. Хөрөнгө оруулалтын тухай хуулийн төсөл, Хөрөнгө оруулалтын сангийн тухай хуулийн төсөл, Алтны худалдаанд ил тод байдлыг бүрдүүлэх тухай хуулийн төсөл мөн залгуулаад урт нэрээ улам урт болгосон Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хийх, ашиглахыг хориглох тухай хуульд нэмэлт өөрчлөлт оруулах тухай хуулийн төсөл гэж хэлэлцэгдэх хуулиудын нэр жагсааж байлаа. Ард нь төсвийн тодотгол хийнэ гэсэн хүлээлт байлаа. Энэ чуулганы нээлт хүртэлх нэг жилийн хугацаанд эдийн засаг хямарсан хямраагүй гэсэн талцаан нэг талдаа гарсан. Одоо улстөрчид эдийн засагчид бүгд л эдийн засаг хямарсан, гадаад валют нөөц багассан гэдэг дээр дуу нэгтэй болсон.
6
Хууль батлах дээд байгууллагаас иргэд юу хүлээж байна. УИХ-ын намрын чуулганаар хэлэлцэх асуудлын эхний тавд багтаж байгаа Засгийн газрын бүтцэд оруулах өөрчлөлтийн асуудал энэ чуулганы топ сэдэв мөн боловч иргэд эдийн засагт шууд тусгалаа өгөх эрх зүйн өөрчлөлтүүдийг хийгээсэй гэж хүсч байгаа. Худалдааны тухай хуулийн төсөл, Татварын хууль тогтоомжид нэмэлт, өөрчлөлт оруулах тухай хуулийн болон шинэчилсэн найруулгын төсөл, Хөдлөх эд хөрөнгө болон эдийн бус хөрөнгийн барьцааны тухай хуулийн төсөл зэрэг нь бизнес эрхлэгч ААН-үүдийн өнөөгийн дарамтыг хөнгөлөх алхам болно гэсэн хүлээлт байгаа. Мөн эдийн засгийн хямралын суурь шалтгаан болоод байгаа засаглалын хямрал, нам төрийн хэтэрхий ах дүүссэн тогтолцоог халах найдвар тээж буй Монгол Улсын сонгуулийн нэгдсэн хуулийн төсөл, Улс төрийн намын тухай, Улс төрийн намын санхүүжилтийн тухай хуулийн төсөл энэ чуулганаар хэрхэн батлагдах бол гэсэн том хүлээлт иргэдэд байна. Энэ чуулганы хэлэлцэх асуудлын хоёрт тавигдсан Төрөөс төмөр замын тээврийн талаар баримтлах бодлогын хэрэгжилтийг хангах зарим арга хэмжээний тухай” Улсын Их хурлын тогтоолын төсөл олон нийтийн онцгой анхааралд байх нь тодорхой. Өргөн цариг, нарийн цариг гэж талцаад арай заамдалцалгүй салсан талуудын баярлах гомдохыг энэ тогтоол батлагдсанаар нэг мөр шийднэ. Хоёр хөршийн тэргүүний хийсэн айлчлалын дараа чуулганаар дахин орж байгаа төрөөс төмөр замын талаар баримтлах бодлогын бичиг баримт хавар Засгийн газраас зүтгүүлж байсан төслөөсөө нэг их өөрчлөгдөхгүй гэж ажиглагчид хэлж байна. Оросын төмөр замын Якунин дарга нь Ерөнхий сайдад цахилгаан цохиж өргөн царигийн талаар гоомой хандахгүй байхыг сануулсан талаар хэвлэлийнхэн хэсэг шуугилаа. Энэ захиа нь Ерөнхий сайдад гэхээсээ бодлогыг соёрхон батлах эрхэм гишүүдэд давхар хаяглагдсан байж таарна.
7
Жил жилийн намрын чуулганы уламжлалт болсон нэг стресс байдаг нь дараа оны төсвийн төслийн хэлэлцүүлэг байдаг. Жил бүр цагийг нь тулгаж хуулийн хугацаанд нь шахагдан яаран баталдаг энэ жишиг 2015 оны төсвийн төслийн хэлэлцүүлэг дээр давтагдах магадлал өндөр. Энд хэлэхэд сөрөг хүчний улс төр зөв, эх оронч байхаас энэ чуулганы ажил хэрэгч байх, үр дүнтэй ажиллах нь их хамаарна. Чуулганы эхэн дээр Засгийн бүтцийн асуудал орж ирснээр талцаан, завсарлага тасралтгүй үргэлжилж намрыг өвөлтэй нь элээж цаг хугацаанд шахагдсан түүхий хуулиудыг бөөндөх болж мэдэх тул намрын чуулганд намчирхсан нанжилдаан хэрэггүй гэж олон нийт хэлж байна.
7
Пүрэвжавын Баярхүү /тоймч/
| Уншиж байна |