Улаанбаатар өчигдөр дэлхийн анхааралд 6 цаг орох шиг болов. Агуу эх оронч орос гүрнийг дэлхийд дахин хүчирхэгжүүлж чадсан Ерөнхийлөгч Путин манай улсад айлчилсан нь энэ. Халх голын дайнд цусаа урсгаж Монголын нутагт ясаа тавьсан ахмад дайчдынхаа байгуулсан ялалт, түүхэн алдар гавьяаг хүндэтгэн дурсахаар ирсэн гэдгээ Путин хэвлэлийнхэнд дахин дахин онцоллоо.

6

Энэ нь “Би тийм их юм амлахгүй шүү” гэсэнтэй агаар нэг сонсогдож байлаа.  Гэхдээ Путин энгэртээ баярын тууз хадчихаад шампанск буудуулчихаад явчихсангүй. Нөлөө бүхий хэдэн сайддаа суудал гарган онгоцондоо багтааж Монголд дагуулж ирлээ. Айлчлалын хүрээнд хамтын ажиллагааны чиглэлээр 15 гэрээ санамж үзэглэсэн гэж мэдээлэгдлээ. Энэхүү гэрээ бичгийн хэтийн хаялга хийгээд манай хөрсөн дээр хэрхэн буух тусгалын талаар хангалттай бичиж прогнозолж байгаа тул энд давтан нурших нь илүүц биз.

6

Путиний энэхүү айлчлал урьдынхаас олон талаар өөр байгааг ажиглагчид онцолж байсан. Нутгаа эргэж байгаа мэт хөмсөг зангидан дайраад гардаг байсан урьдын айлчлалуудтай адил болсонгүй. Хүндэтгэл нөхөрсөг байдал давамгайлсан дүр байдал тод харагдаж байлаа. Толгойд нь дэлхий бүхлээрээ  багтаж яваа Путин гэх энэ хүн миний Монголын ард түмэнд болоод хоёр орны цэрэг эрс цусаа урсган байгуулсан ялалтад ач холбогдол өгч байгаагаа цаг зав гарган хийсэн энэхүү айлчлалаараа дэлхийд харууллаа. Нөгөө талдаа Монгол нь Оросын хөрш төдийгүй сайн холбоотон гэдгийг гуравдагчуудад чангахан хэлж өгөх гэсэн улс төрийн зорилготой ч байсан байх. Манай улсын түүхэнд хоёр хөршийн тэргүүн нар ар араасаа ирж нөхөрсөг бүтээлч саналуудыг тавьж харилцааны шинэ үеийг эхлүүлсэн гэдгээрээ 2014 оны энэ намар гадаад харилцааны түүхэнд үлдэхээр болж байх шиг байна. Энэхүү айлчлалаар хоёр хөрш Монголын тал дээр нэг байр суурьтай болсноо олон улсад харуулсан хэрэг гэж болно. Өргөнөөс нь манайх, өндрөөс танайх ав гэдэг шиг илүү харсан бус энэ тэнцүү дундаа байлгаж хөгжүүлэх алтан дундаж дээр хоёр хөрш санал нэгдсэн байна гэж хэлж болохоор байгаа юм.  Магадгүй Хятад сэтгүүлчийн бичсэнээр Монголыг эрчим хүчний баазаа болгож хариуд нь  хөгжих бололцоо олгоё гэсэн гар барилтаа баталгаажуулж ийнхүү хоёр хөршийн тэргүүн нар дараалан айлчилсан байж болох. Си Зиньпин даргын айчлалаар тодорхойлсон хамтын ажиллагааны бодлого, зээл тусламжийн амлалтыг бид бас дэмжиж байгаа гэдгээ Оросын Ерөнхийлөгч ялалтын баяртай хамтатган ёсчлоод буцах шиг боллоо.

6

Айлчлалаар худалдаа эргэлт, гааль татварын хөнгөлөлт, харилцан визгүй зорчих зэрэг олон талт гэрээ хэлцэл хийгдэж хамтын ажиллагааны эхлэл тавигдсан ч хүлээлт үүсгэсэн транзит тээвэр, хийн хоолой зэрэг том төслийн хариулт “за”, “үгүй” хоёрын завсарт Путиний уруулынх нь цаана үлдлээ. Гэхдээ бид Оросын төрийн тэргүүний айлчлалаас авах гэснээ авсан гэж болно. Дэлхийн тэнхлэгийг бүтэн эргүүлчих гээд байгаа Орос гүрний төрийн тэргүүн манай Ерөнхийлөгчид хандаж бүх талын хамтын ажиллагааг “амлалаа”. Махны экспорт тодорхой шийдэгдсэнгүй гэж гонсойх хүн байгаа байх. Роснефтийн 100 ШТС-ыг Монголд барих саналтай манай махны наймаа барьцаалагдсан байдалтай тавигдлаа. Мах яах вэ. Мөнгө  авчрах ч харагдаж байгаа бусад боломжийн дэргэд бага зүйл.

6

Өнгөрсөн өдрүүдэд бид тусгаар Монгол улсынхаа нэр хүндийг олон улсад шинэ тавцанд гаргаж, хүчирхэг хоёр гүрний сонирхлын төвд байгаагаа дэлхийд харууллаа. Нэр хүнд дагаж эд баялаг урсдаг ч гэдэг. Бидэнд хандаж байгаа хоёр хөршийн ойлголцол, дэмжих бодлого нь бусад улстай харьцах манай төрийн итгэлцүүрийг нэмэгдүүлж байна.

6

Одоо Монгол улс газрын баялгаа зараад өрөө дарчих гэсэн өнөө маргаашаа аргацаасан бус хөрштэйгээ хөтлөлцөөд хол алхах хөгжлийн тодорхой зураглалтай болж  шинэ цаг үеийг эхлүүлж байгаа гэж дэлхийд танигдлаа. Энэнээс илүү өөр юу хэрэгтэй гэж. Энэ нэр хүндээр бидний дуугарах дуу итгэлтэй болж бусдад тавих санал маань үнэтэй болж ирнэ. Ийм өнцгөөс харвал энэхүү айлчлалаас бид дэлхийд харуулах шинэ нэрийн хуудастай болж авлаа.

6

Монголын ард түмэн Ерөнхийлөгч В.В.Путинд элгэмсүү дотно байж, халуунаар угтан авч үдэн гаргалаа. Харин Путин яагаад ч юм нулимс дуслуулсан л гэж байна.

6

Пүрэвжавын Баярхүү /тоймч/