Зуны адаг сар хэдий ч наймдугаар сарын аагим халуун бус хүйтэн бороо шаагисан сэрүүхэн өдрүүд үргэлжилж байна. Энэ нь хангай дэлхий ирэх өвлийн бэлтгэлээ эртнээс сайн хангахыг хэлээд байгаа дохио биз ээ. Онцгой байдлын газраас ч ойрын өдрүүдэд орон нутагт дуу цахилгаантай бороотой тул ард иргэд үер усны аюулаас сэрэмжлэхийг сануулж байгаа. Иргэд бороотой өдрүүдэд шаардлагагүй тохиолдолд цахилгаан хэрэгслээ салгах, гар утсаараа ярихгүй байх, нийтээрээ амарч аялж байгаа хүмүүс гол мөрөн үерийн уснаас сэрэмжлэх гээд бүх талын сэрэмжлүүлгийг өгч байна. Ахмадууд тэнгэрийн өнгө, байгаль цаг уурын дохиогоор ирэх өвөл хатуухан болох нь дээ хэмээн өөр зуураа шинжиж байна лээ. Харин наадмаас наадам хэссэн дарга нар одоо ажилдаа орох цаг болжээ. Ялангуяа аймгуудын Засаг дарга нар доорх албан тушаалтнууддаа үүрэг даалгавар өгч, тариа ногоо, хадлан тэжээл хураахаас эхлээд өвлийн бэлтгэлийг эхлүүлж баймаар. Харамсалтай нь аймгийн Засаг дарга нар өчигдрийн байдлаар албан өрөөндөө лав байхгүй байна лээ.
1
Засгийн газраас сард нэг удаа хийдэг цахим хуралдаанд ихэнх аймгийн Засаг даргын орлогч нар оролцсон. ЗГХЭГ-ын дэд дарга Ч.Сайнбилэг “нэг ч Засаг даргад амрах тушаал гаргаагүй атал яагаад өөрсдөдөө амралт өгөөд байна вэ” гэж гайхаж байв. Өвлийн бэлтгэл эхлүүлэхээс гадна Засгийн газар эдийн засгийг эрчимжүүлэх “Эзэн-100” аяныг хэрэгжүүлэх шийдвэрийг УИХ-аас авсан. Энэ аяныг дүгнэх хугацаа юу юугүй тулж ирээд байгаа. Тиймээс “Эзэн-100” аяны хүрээнд төсвөө хэрхэн танаж, зардлаа бууруулсан тайлангаа Засаг дарга нараас шаардах гэтэл тэд амарсан байлаа. Үүнд бухимдсан Ч.Сайнбилэг дарга “Засаг даргаа над руу ярь гэж хэлээрэй” хэмээн орлогч нарт нь тушааж, дэмий л уураа барав.
1
Наймдугаар сар хэдийнэ гарсан найр наадам дуусаагүй. Улсын баярын дараагаас сумын ой үргэлжилж эдүгээ шувтрах талдаа орж байгаа. Наадам шувтарч байгаа ч найр үргэлжилсээр, жилийн тэгш, сайн өдрүүд үргэлжилж, залуу хосууд гэр бүл болж, аав ээж, ах дүү, найз нөхөд хамаатан саднаараа цэнгэн наадаж, найр хавтгайрч эхэллээ. Гэр бүл, төрөл төрөгсдийн найр наадам ч яах вэ сарын сайныг саатан хүлээж, өдрийн сайныг өнжин хүлээж товлож байгаа монгол ёс. Иргэд ах дүү, төрөл төрөгсдөөрөө наадан цэнгэж болох ч Засгийн газрын хувьд наадам дууссаныг ЗГХЭГ-ын дарга дахин сануулсан. Арга ч үгүй биз, эдийн засгийг эрчимжүүлэх аяныг дүгнэх, өвлийн бэлтгэл гээд үстэй толгойноос их ажил хүлээж байхад орон нутгийн удирдлагууд хуралдаа ч суухгүй, том толгойлон амралт хөөж одсонд бухимдал, сандралыг давхцуулсан биз. Архангай, Булган, Говь-Алтай, Дархан-Уул, Завхан, Өвөрхангай, Өмнөговь, Ховд гээд аймгийн Засаг дарга нар амралтаа авчээ. Дарга амарна гэдэг ньтухайн байгууллагын ажил ерөнхийдөө назгайрдаг. Албан хаагчид үндсэн ажлаа хийх хэдий ч гэнэтийн тушаал шийдвэр ирэхгүй болохоор дор бүртээ амралтын шинжтэй байх нь ердийн үзэгдэл. Өнөөдөр УИХ-ын хаврын чуулган завсарласан болохоор Төрийн ордон ч эл хуль байна. Албан байгууллагуудаар ч хүний хөл татарсан, үүдний хамгаалагч, үйлчилгээний ажилтан хоёр л угтан авч, үдэн гаргаж байгаа гэхэд хилсдэхгүй.
1
Уг нь ч Шинэчлэлийн Засгийн газрыг анх байгуулах үед Ерөнхий сайд Н.Алтанхуяг “Сайд болох хүмүүст амралт байхгүй. Бүтэн хагас сайнд ч ажиллана. Манай Засгийн газар амралтгүй ажиллана гэдэг гэрээ хүртэл хийнэ” гэж хэлж байсан. Сайд нартай энэ гэрээг хийсэн байх талтай ч орон нутгийн Засаг дарга нарт энэ нь үйлчилдэггүй бололтой. Хэрвээ дээрх гэрээг орон нутгийнхантай хийсэн бол дээрээс тушаал ирээгүй байхад тэд өөрсдөдөө юунд амралт өгөх билээ. Гэхдээ тушаалгүй амрагчид удахгүй дуудагдан ажилдаа орох байх. Засаг дарга нар байтугай УИХ-ын гишүүдэд “ээлжит бус чуулганыг хуралдуулахаар дуудна шүү” гэдэг УИХ-ын даргын санамжтай, завсарлуулсан. Тиймээс Засаг дарга нар ч зуны дэлгэр цагт наадаж, наадамлаж дуусаад амрах бус ажлаа хийцгээхийг тэнгэр хангай ч “анхааруулж байна”.
1
Н.Энх
| Уншиж байна |