Ибаримт аппликейшн-д тээврийн хэрэгслийн татварын мэдээлэл иржээ. Дэлгэрүүлэн үзвэл

Автын агаарын бохирдлын төлбөр- 1 800

Авто тээвэр, өөрөө явагч хэрэгслийн татвар- 43 128

Зам ашигласны төлбөр- 20 000 төгрөгийн татварыг төлнө үү гэжээ. Нийтдээ 65 орчим мянган төгрөг.

Татвар албадлага учраас хүн бүхэн төлнө. Төлөхгүй бол торгоно, шийтгэнэ. Дээр нь машины татвар тийм ч өндөр биш. Товчхондоо цааргалах асуудал биш.

Гэхдээ татвар шударга зарчимтай байх ёстой. Нийслэлчүүдийн хувьд энэ өвөл машин нь бараг хөдлөөгүй гэхэд хилсдэхгүй. Өнгөрсөн оны 12 дугаар сарын дундаас эхлээд өнөөдрийг хүртэл улсын дугаарын тэгш, сондгойгоор хязгаарлуулж, долоо хоногийн 2-3 өдөр машин нь яваагүй. Өөрөөр хэлбэл нийслэлийн замыг ашиглаагүй, агаарын бохирдолд хувь нэмэр оруулаагүй гэсэн үг.

Дугаарын хязгаарлалт 2023 оны 12 дугаар сарын 18-наас эхэлсэн. Тухайн сарын ажлын 10 хоногийн 5 өдөр нь машинаараа ажилдаа явж, хүүхдээ зөөж, 5 өдөр нь зогссон. Энэ оны 01 дүгээр сард гэхэд ажлын 22 өдрийн талд нь буюу 11 өдөр машинаа унаж, 11 өдөр зогсоолд үлдээсэн. Тэгэхээр яваагүй өдрийнхөө татварыг төлөхгүй байж болох уу, Х.Нямбаатар дарга аа?

Тухайн өдрүүдийн татвар нь 100 эсвэл 1 000 төгрөг байсан ч хамаагүй, төлөхгүй байж болох уу?

Хэдийнэ сая гаруй хүн амтай болж, цаашид ч иргэдийн тоо өсөн нэмэгдэх нь тодорхой Улаанбаатар хотын асуудлыг хаяж, өнөөдрийн арчаагүй байдалд хүргэсэн эрх мэдэлтэн, албан тушаалтнуудын балгийг ард түмэн үүрэх ёсгүй. Ядаж л нийтийн тээврээ цаг тухай бүрт нь шинэчилж, зөв зохион байгуулалттай болгосон бол өнөөдрийн шиг толгойтой бүхэн машин унах гэж дайрахгүй, түгжрэл үүсэхгүй байлаа. Хүйтэн хөндий, эвдэрхий, хэзээ ирэх нь тодорхойгүй автобус хүлээхээс залхсан иргэд хямд төсөр ч хамаагүй хөл дүүжлэх унаатай болж, дулаан явахыг илүүд үзнэ. Гэтэл хахир өвлийн хүйтнээр дугаарын хязгаарлалт хийж, машиныг нь зогсоочихоод татвараа бүтэн авах чинь шударга ёс уу!

Татварын төлөгчдийн мөнгийг хувааж идсэн, төсвийн хөрөнгийг үр ашиггүй зарцуулсан, байгалийн баялгийг ил далд хулгайлсан нь иргэд биш эрх мэдэлтнүүд. Тэдний тарьсан балгийг иргэд үүрч байгаа нь энэ хотод төрж, амьдарч байгаагийн үйлийн үр гэж үү?!

Б.Хэрлэн