АН-ын даргын сонгуулийн цахим санал хураалт өчигдөр явагдлаа. АН-ын даргын сунгааны явцад одоогийн намын удирдлагууд зөвшилцөлд хүрч чадаагүй. Тиймээс намын даргын  сунгаа хоёр талд явагдсан. Тодруулбал, АН-ын дарга С.Эрдэнийн фракцаас УИХ-ын гишүүн асан Л.Гүндалай, Ц.Оюунгэрэл, НИТХ-ын төлөөлөгч М.Тулгат, АН-ын дэд дарга Ц.Уртнасан, АН-ын дэд дарга Ч.Өнөрбаяр нар, АН-ын даргын үүрэг гүйцэтгэгч Ц.Тувааны талаас УИХ-ын гишүүн О.Цогтгэрэл, МҮХАҮТ-ын тэргүүн О.Амартүвшин, нийслэлийн АН-ын дарга Д.Пүрэвдаваа, Ардчилсан залуучуудын холбооны Ерөнхийлөгч С.Эрдэнэболд нар АН-ынх даргын сонгуульд нэр дэвшин, сурталчилгаа ч хоёр талд өрнөж байлаа.

Хоёр талд явагдсан АН-ын даргын сонгуулийн цахим санал хураалтаар УИХ-ын гишүүн О.Цогтгэрэл, НИТХ-ын төлөөлөгч М.Тулгат  нар тус тус олонхийн санал аваад байна.

УИХ-ын гишүүн О.Цогтгэрэл:

• 1998 онд ТИС-ийн Компьютерын техник менежментийн сургууль, эдийн засагч

• 2008 онд Удирдлагын академи, докторант

• 1998-2011 онд ТЭСО ХХК-ийн захирал

• 2012-2015 онд Монгол Улсын Ерөнхий сайдын зөвлөх

• 2015-2017 онд Увс аймгийн Ардчилсан Намын дарга

• 2015-2020 онд ТЭСО корпорацын ерөнхийлөгч

• 2020 оноос Монгол Улсын Их Хурлын гишүүн

 НИТХ-ын төлөөлөгч  М.Тулгат:

• 1994-1996 онд нийслэлийн 1 дүгээр сургууль

• 1998-1999 онд Осака гадаад хэлний сургууль

• 1999-2003 онд Киотогийн их сургууль эдийн засгийн ухаан /БАКАЛАВР/

• 2003-2005 онд Киотогийн их сургууль эдийн ухаан /МАГИСТР/

• 2005-2009 онд Япон улс “Софтбанк инк” санхүүч

• 2010-2013 онд “Бекфорс” ХХК-ийн захирал

• 2013 оноос “Хишиг арвин” групп ерөнхий менежер, дэд захирал

• 2016 оноос нийслэлийн ИТХ-ын төлөөлөгч

Ийнхүү АН-ын даргын  сонгуулийн урьдчилсан дүн ийнхүү гарсан ч намын гишүүдийн төдийгүй олон нийтийн дунд төөрөгдөл үүсгэсэн хэвээр үргэлжилж байна. Дотоод хагарал, маргаан, хуваагдлаа шийдэж, зөвшилцөлд хүрч чадаагүй эхлүүлсэн АН-ын даргын сунгааны үр дүн гарах уу? Ерөнхийлөгчийн сонгуулийн цаг хугацааны хайлчилбарт баригдаж, албан ёсны даргаа тодруулах гарцгүй байдал АН-д үүссэн.  УИХ-ын сонгуулийн дараагаар хариуцлагаа ухамсарлан намын дарга С.Эрдэнэ УИХ-ын гишүүн Ц.Туваанд  шилжүүлэн өгсөн байдаг. Атал орон нутгийн сонгуулийн дараагаар “эргэн ирсэн”-ээр будилаан даамжирсан. Энэ нь эцэстээ намын даргын сунгааг хоёр талд зохион байгуулахад хүргэсэн нь энэ. С.Эрдэнэ АН-ын тамга, намын нэр өөрийнх нь нэр дээр хуулийн дагуу бүртгэлтэй  гэдэг. Гэсэн хэдий ч АН-ын даргын үүрэг гүйцэтгэгчээр Ц.Тувааныг томилж, тамгаа хүлээлгэн өгснөөс бус, буцааж авч чадаагүй нь басхүү үнэн.  АН-ын албан ёсны тамга хуулиараа С.Эрдэнийн нэр дээр байгаа ч албан ёсоор Ц. Туваанд хадгалагдаж байгаа гэж ажиглагчид үзэж байна.

Тиймээс л энэ удаагийн хоёр талд явагдсан АН-ын даргын сонгуулийн үр дүнгээр хэнийг даргаар томилох вэ гэдэг дараагийн маргаан үүслээ. Өнөөдөр намын гишүүдийн олонхийн санал аваад байгаа УИХ-ын гишүүн О.Цогтгэрэл, НИТХ-ын төлөөлөгч М.Тулгат нарын хэнийг нь даргаар сонгохыг дахин санал хураалт бус АН-ын фракцуудын тохироо шийдвэрлэх юм. Эс бөгөөс даргаа сонгож чадаагүй АН Ерөнхийлөгчийн сонгуульд оролцох эрхгүй болох нөхцөл үүснэ гэдгийг намын удирдлагууд өглөө бүр мэдэрч сэрж байгаа. 

Н.Энхлэн