Цар тахлын энэ үед У.Хүрэлсүхийн Засгийн газар огцорч, дараагийн Засгийн газраа шуурхай бүрдүүлнэ гэдгээ эрх баригчид онцолж байсан. Тиймээс баасан гаригт МАН-ын бага хурал цахимаар хуралдаж, Удирдах зөвлөлөөс  санал болгон Ерөнхий сайдад нэрийг нь дэвшүүлсэн Л.Оюун-Эрдэнийг  дэмжиж, хуулийн дагуу Ерөнхийлөгчтэй зөвшилцөхөөр хүргүүлсэн билээ. Ерөнхийлөгч өнөөдөр Ерөнхий сайдад нэр дэвшигчийг хүлээн авч уулзахаар болсон байна.  Дараагаар нь байнгын хороо хуралдаж, Ерөнхий сайдад Л.Оюун-Эрдэнийг томилох асуудлыг хэлэлцэх юм. 

Ямартай ч Монгол Улсын 32 дахь Ерөнхий сайдаар Л.Оюун-Эрдэнийг үнэмлэхүй олонхи эрх баригчид хэлэлцэн томилоно. Харин Л.Оюун-Эрдэнийн танхим ямар бүрэлдэхүүнтэй байх нь олны анхаарлын төвд байна. Шинэ Ерөнхий сайд Л.Оюун-Эрдэнэд танхимаа өөрөө бүрдүүлэх эрх нь байгаа ч цаг үе гэхээсээ улс төрийн тохироогоор  У.Хүрэлсүхийн танхимын бүрэлдэхүүнийг өөрчлөхгүй байх нөхцөл үүсч байгаа.

Шадар сайд Я.Содбаатар, ЭМ-ийн сайд Т.Мөнхсайхан нар албан тушаалаасаа чөлөөлөгдөх өргөдлөө өгсөн байсан. Тиймээс Шадар сайд, ЭМ-ийн сайдад нэр дэвшигчдийн таамаглал өнгөрсөн хугацаанд явагдсан. Шадар сайдад Ж.Энхбаяр, ЗГХЭГ-ын даргаар Д.Амарбаясгалан нар томилогдох магадлал өндөр байна. Харин ЭМ-ийн сайдад экс дэд сайд Т.Цолмон гээд  олон таамаглал явж байгаа ч шийдэлд хүрээгүй байгаа боллоо.

Басхүү Соёлын сайд С.Чулуун, УУХҮ-ийн сайд Г.Ёндон, БШУ-ны сайд Л.Цэдэвсүрэн  нар огцрох жагсаалтад орсон байна лээ. Дээрх яамдын сайд нарын томилгоо гаднаас хийгдэнэ. Учир нь Үндсэн хуулийн өөрчлөлтөөр Ерөнхий сайдаас гадна гурав хүртэлх сайд "давхар дээл"-тэй байж болох заалттай.  У.Хүрэлсүхийн танхим дахь Сангийн сайд У.Хүрэлсүх, БОАЖ-ын сайд Д.Сарангэрэл, ХЗДХ-ийн сайд Х.Нямбаатар нар "давхар дээл"-тэй. "Давхар дээл"-тэй гурван сайдаас гадна Гадаад харилцааны сайд Н.Энхтайван, Батлан хамгаалахын сайд Г.Сайханбаяр, БХБ-ын сайд Б.Мөнхбаатар, Хөдөлмөр, нийгмийн хамгааллын сайд А.Ариунзаяа, Эрчим хүчний сайд Н.Тавинбэх нар танхимдаа үлдэнэ гэсэн "бор шувуу" нисч байгаа. 

Эрх баригч намын дарга У.Хүрэлсүх Ерөнхий сайдыг танхимаасаа томилж, бүрэлдэхүүнээ хэвээр үлдээж байна. Эндээс харахад У.Хүрэлсүх шинэ Засгийн газрыг дотроос бус гаднаас нь удирдах нь тодорхой харагдана. МАН-ын даргын хувьд зөвхөн Засгийг төдийгүй парламентыг чиглүүлэх эрх түүнд бий. Харин  Л.Оюун-Эрдэнийн тухайд Ерөнхий сайдын ямбыг нь эдлэх ч бүрэн эрх нь хязгаарлагдмал, дээрээс өгсөн үүргийг гүйцэтгэж,  урваж, шарвахгүй, итгэл даан ажиллах  Ерөнхийлөгчийн сонгуулийн жилийн ирэх зургаан сарын хугацаатай "бонус"-аа авч байна.

Н.Энхлэн