Оросын Ерөнхийлөгч Владимир Путиний ээж гэж өөрийнхөө тухай ярьж байсан эмэгтэй 97 настайдаа Гүржид нас баржээ. Түүнийг Вера Путина гэх бөгөөд нөхрийн хамт удаан амьдарсан Метеха тосгонд Вераг оршуулсан гэж Mtavari суваг мэдээлсэн байна.
Гүржийн хэвлэлүүдийн мэдээлснээр, Вера Путина 1926 онд Оросын Перм мужид төржээ. Тэрбээр амьд ахуйдаа сэтгүүлчдэд ярилцлага өгөхдөө, техникумд суралцаж байхдаа нэгэн эртэй учирсан бөгөөд түүнийг гэр бүлтэй гэдгийг нь мэдээгүй байсан гэнэ. Ингээд Терехино дахь ар гэрийнхэн дээрээ эргэн ирж, 1950 онд Владимир Путинийг төрүүлсэн аж. Дараа нь гүрж эртэй гэрлэж, хүүгийн хамт Гүржийн Метеха сууринд суурьшжээ. Хойд эцэг нь Владимирт таагүй ханддаг байсан тул хүүгээ эмээ өвөө рүү нь явуулсан гэнэ.
Путинийг телевизээр гарч байхад нь хүүгээ гэж шууд л таньсан гэж Вера Путина хэлж байжээ. Түүний өгүүлснээр, Ерөнхийлөгч Путин ээжээсээ татгалзаж, түүнтэй харилцаагүй байсан гэнэ. Метеха тосгоныхон ч энэ яриаг ам дамжин ярьцгаадаг бөгөөд нэг хэсэг Вераг тусгай хамгаалалтад оруулж байсан, мөн ДНХ-ийн шинжилгээ ч авч байсан гэж ярьцгаадаг аж.
Оросын Ерөнхийлөгчийн албан ёсны намтараар бол тэрбээр 1952 онд Ленинградад төрсөн, эцэг нь Владимир Спиридонович Путин харин ээж нь Мария Ивановна гэсэн нэртэй юм.
Г.Бямбасүрэн
| Уншиж байна |