Өнгөрсөн сараас эхлэн Оросын арми Украины дэд бүтэц, тэр дундаа эрчим хүчний объектуудад пуужингаар цохилт өгөх нь эрчимжиж, улмаар Украин даяар эрчим хүчний хомсдол нүүрлэх болсон юм. Энэ хомсдолын улмаас Украины нийслэл цахилгаан эрчим хүч, ус, дулаангүй өвөлжиж болзошгүй болсон талаар Киев хотын дарга Виталий Кличко Ройтерс агентлаг өгсөн ярилцлагадаа онцолжээ. 

"Холливудийн кинонд гардаг хүйтэн гэрт амьдрах боломжгүй нөхцөл үүсдэг шиг сүйрэл манайд ч тохиолдохоор байна" хэмээн Кличко мэдэгджээ.

Одоогоор цахилгаан эрчим хүчний хомсдол нэг их биш учраас Киевээс оршин суугчдыг нүүлгэн шилжүүлэх шаардлага хараахан гараагүй байгаа хэмээн тэрбээр өгүүлсэн байна. Гэхдээ хүйтний улиралд эрчим хүчний хомсдол хэвээр үргэлжилвэл хотын зарим дүүргүүдэд дулааны системээс ус шахахаас аргагүй болно хэмээн тэрбээр онцолжээ.

"Одоогоор бид хамааралгүй ажиллах боломжтой халаалтын 500 цэгийг бэлтгэсэн. Гэхдээ гурван сая хүн амтай хотын хувьд 500 гэдэг маш бага тоо" хэмээн Кличко мэдэгдсэн байна. 

Г.Бямбасүрэн